Almaty túbinde apatqa ushyraǵan ushaq quıryǵymen alty ret, shassımen tórt ret jáne qanatymen bir ret ushý jolaǵyna soǵylǵan
NUR-SULTAN, 10 qańtar – Sputnik. Fokker 100 ushaǵynyń apatqa ushyraýyna baılanysty qurylǵan úkimettik komıssııa ushqyshtardyń áńgimesin zerttep shyqty. Osy jáne basqa da parametrlik kórsetkishterdiń negizinde apattyń hronologııasy jasaldy, dep habarlaıdy Sputnik Qazaqstan tilshisi.
Hronologııa
- 7:20:02 - ushaq jolaqqa shyǵady;
- 7:20:41 - ekıpaj aldyńǵy shassıdi kóterýdi bastaıdy;
- 7:20:45 - ushaq maksımaldy jyldamdyqpen jerden kóteriledi;
Indýstrııa jáne ınfraqurlymdyq damý mınıstri Roman Sklıardyń aıtýynsha, ushaq jerden kóterilgen boıda aldymen sol jaqqa, odan keıin oń jaqqa qısaıa bastaıdy. Ekıpaj ushý traektorııasyn ustap qalýǵa tyrysty. Osydan keıin negizgi shassı jáne ushaqtyń sol jaq qanaty jerge tıedi.
7:20:53 – ushaq ońǵa qaraı qısaıady. Osy kezde komandır: "Ne bolyp qaldy?", - dep suraıdy.
7:20:54 – ekinshi pılottyń jaýaby: "Ne bolǵanyn bilmeımin. Stabılızator... Toqta... Men bul jerge túsemin (ary qaraı boqaýyz sózder ketedi)".
"Osy kezde ekinshi ushqysh qozǵaltqyshtardyń jumysyn baıaýlatyp, ushýdy toqtatýǵa áreket jasaǵan sekildi. Alaıda birneshe sekýndtan keıin qozǵaltqyshtardyń jumysy taǵy 93-95 proentke artyp, áýe kemesi ushýdy jalǵastyrady", - deıdi Sklıar.
7:20:57 – komandır ekinshi ushqyshqa: "Kerek emes. Ne istep jatyrsyń?", - dep aıtady. Sóıtip, jyldamdyqty arttyryp, "Kettik! Kettik!" deıdi.
7:21:04 – komandır shassıdi alyp tastaýǵa buıryq beredi;
"Osydan keıin ushaq birneshe ret jerdi syzyp ótti. Quıryǵymen alty ret, shassımen tórt ret jáne qanatymen bir ret ushý jolaǵyna soǵylyp, sol jaq qaýipsizdik jolaǵyna syrǵanap ketken. Osy kezde ushý jolaǵynyń 38 shamy qırady", - dep atap kórsetti Sklıar.
7:21:15 – bes metr bıiktikte shassıdi alyp tastaǵan, artynan ushaq fıýzelıajben jerge jatyp, ushý alańynyń syrtyna shyǵyp ketken,
Apattyń negizgi sebebi
Búgin úkimettik komıssııa Almaty túbindegi Bek Air áýe kompanııasy ushaǵynyń apatqa ushyraý sebebiniń aldyn ala boljamyn jarııalady.
"Ushaq syrtyna muzdyń qatyp qalýy – negizgi sebep. Áýe kemesi turaqta eki táýlik turǵan", - dep málim etti premer-mınıstrdiń orynbasary, ındýstrııa jáne ınfraqurlymdyq damý mınıstri Roman Sklıar.
Komıssııa ushaqtyń syrtyndaǵy qatyp qalǵan muzdy eritý jumystary jartylaı ǵana jasalǵanyn anyqtaǵan.
"Ushaq komandıri arnaıy suıyqtyqpen tek stabılızatordy ǵana óńdeýge sheshim qabyldaǵan. Ushaqtyń qanattary óńdelgen joq. Ol kúni Atyraýǵa ushqan týra sondaı ushaqtyń da syrty suıyqtyqpen óńdelmegeni anyqtaldy", - dedi Sklıar.
Almaty túbindegi ushaq apaty
Ushaq apaty 27 jeltoqsan tańǵy saǵat jetide boldy. Bek Air áýe kompanııasynyń "Almaty – Nur-Sultan" baǵytyndaǵy Fokker 100 ushaǵy Almaty mańyna qulady.
Ushaqta 93 jolaýshy men 5 ekıpaj múshesi bolǵan. Apat 12 adamnyń ómirin qıdy, qaza bolǵandardyń ishinde ushaq komandıri bar. Ekinshi ushqysh jansaqtaý bólimine tústi. Qazir ol esin jıdy.
Ishki ister mınıstrligi áýe apatyna sebep bolǵan úsh jaǵdaıdy atady. Olar: ekıpaj qateligi, tehnıkalyq aqaý jáne navıgaııalyq qyzmet jumysy.
Ushaqtyń qara jáshigi Máskeýdegi memleketaralyq avıaııa komıtetine tapsyryldy. Tergeýdiń aldyn ala qorytyndysy 10 qańtarǵa deıin jarııalanady degen jospar bolǵan.
Prezıdent tapsyrmasymen premer-mınıstr jetekshilik etetin komıssııa quryldy. Toqaev apattyń sebebin anyqtap, kinálilerdi qatań jazalaýdy tapsyrdy. 28 jeltoqsan elimizde jalpyulttyq aza tutý kúni bolyp jarııalanǵan bolatyn.
Derekkózi: Spýtnık.kz
