26 جەلتوقساندا "قازاقستاننىڭ دەموكراتيالىق پارتياسىن" قۇرعىسى كەلەتىن باستاماشىل توپ وكىلدەرى مىڭنان استام ادامنىڭ قولى قويىلعان قۇجاتتى ادىلەت مينيسترلىگىنە تاپسىرىپ، قۇرىلتاي سەزىن وتكىزۋ ءۇشىن باستاماشىل توپتى تىركەۋدى سۇرادى.
قۇجاتتاردى ادىلەت مينيسترلىگىنىڭ وكىلى تالعات ابۋباكىروۆ قابىلداپ، تىركەلگەنى تۋرالى كۆيتانتسيانى بۇگىن ساعات 16.00-گە دەيىن بەرۋگە ۋادە بەردى.
باستاماشىل توپ وكىلى ينگا يمانباي مينيسترلىك توپتى تىركەمەگەن جاعدايدا مۇنى "ساياسي سەبەپپەن" بايلانىستىراتىنىن ايتتى.
- بىزگە سەزد وتكىزۋگە مۇمكىندىك بەرەدى دەپ ۇمىتتەنەمىز. دايىنداعان قۇجاتتارىمىز بەن جاقتاستارىمىزعا سەنەمىز. ەگەر ادىلەت مينيسترلىگى قانداي دا ءبىر سەبەپپەن تىركەۋدەن باس تارتسا، وندا ونى ساياسي سەبەپپەن باس تارتتى دەپ تۇسىنەمىز جانە ءارى قاراي ارەكەت جاسايمىز، - دەيدى ينگا يمانباي.
31 جاستاعى جۋرناليست، بەلسەندى جانبولات ماماي قازان ايىندا الماتىداعى جيىندا "قازاقستاننىڭ دەموكراتيالىق پارتياسىن" قۇراتىنىن مالىمدەگەن. ول “پارتيانىڭ ماقساتى سايلاۋعا ءتۇسۋ ەمەس، ەلدەگى بيلىك جۇيەسىنە وزگەرىس ەنگىزۋ، حالىقتىڭ ءۇنىن بيلىككە جەتكىزۋ” ەكەنىن ايتقان.
ول كەيىنىرەك وبلىستى ارالاۋعا پروباتسيا قىزمەتىنىڭ رۇقسات بەرمەي وتىرعانىن حابارلاعان. قاراشا ايىندا باستاماشىل توپ وكىلدەرىنىڭ ايماقتاعى كەزدەسۋلەرى كەزىندە بىرنەشە ادام شۋ شىعارعان.
قازاقستان زاڭناماسى بويىنشا، پارتيا قۇرۋ ءۇشىن الدىمەن مىڭ ادام قاتىساتىن سەزد وتكىزۋ قاجەت. ال پارتيانى رەسمي تۇردە تىركەۋ ءۇشىن 40 مىڭ مۇشەسى بولۋى كەرەك.
قازاقستان پرەزيدەنتى قاسىم-جومارت توقاەۆ 20 جەلتوقساندا "ۇلتتىق قوعامدىق سەنىم كەڭەسىنىڭ" وتىرىسىندا پارتيا قۇرۋعا قاجەتتى ادامدار سانىن 40 مىڭنان 20 مىڭعا ازايتۋ قاجەتتىگىن ايتقان.
قازىرگى كەزدە قازاقستاندا رەسمي تىركەلگەن التى پارتيا بار. پارلامەنتتە ءۇش پارتيانىڭ وكىلدەرى وتىر: بۇرىنعى پرەزيدەنت نۇرسۇلتان نازارباەۆ باسقاراتىن "نۇر وتان" پارتياسى، بيلىكشىل "اق جول" جانە "كوممۋنيستىك حالىقتىق پارتياسى".
"ازاتتىق" راديوسى
فوتو اۆتورى سانات ورىن ءالي
