جامبىل وبلىسىنىڭ 80 جىلدىعىنا ارنالعان مەرەكەلىك شارالار لەگى كەنەن ازىرباەۆ ەسكەرتكىشىنىڭ اشىلۋ سالتاناتىنا ۇلاستى. قازاقتىڭ ايگىلى حالىق اقىنى، ءانشى، كومپوزيتور، قازاقستاننىڭ ەڭبەك سىڭىرگەن ونەر قايراتكەرىنىڭ ەسكەرتكىشى «بالاساعۇن» ورتالىق كونتسەرت زالى عيماراتىنىڭ الدىنا ورناتىلعان.
كەنەن ازىرباەۆ - قازاق ونەرىندەگى سال-سەرىلىك جانە ايتىسكەرلىك داستۇرلەردى ۇزبەي، حح عاسىردىڭ 70-جىلدارىنا دەيىن جەتكىزگەن ونەرپاز. داستان جانرىن جاستايىنان جىرلاعان. قازاق حالقىنىڭ ايتىس ونەرىنىڭ ناسيحاتشىسى. 150-دەي ءان تولعاپ، اندەرى حالىق ءسۇيىپ ايتاتىن ماڭگىلىك رۋحاني قازىناعا اينالدى. كەنەن ازىرباەۆقا بيىل 135 جىل.
كەنەن ازىرباەۆ ەسكەرتكىشىن اشۋ قۇرمەتى قازاقستاننىڭ ەڭبەك سىڭىرگەن مادەنيەت قىزمەتكەرى، كۇيشى-كومپوزيتور ءابدىمومىن جەلدىباەۆ جانە كەنەن اتامىزدىڭ ۇرپاعى مۇرات كەنەنوۆكە بۇيىردى.
سالتاناتتى شاراعا ارنايى قاتىسقان قر مادەنيەت جانە سپورت ءمينيسترى اقتوتى رايىمقۇلوۆا مەن ايماق باسشىسى اسقار مىرزاحمەتوۆ بارشا جامبىلدىقتار اتىنان ەسكەرتكىشكە گۇل شوقتارىن قويدى. بۇدان سوڭ قوناقتار قورداي اۋداندىق ك.ازىرباەۆ ادەبي-مەموريالدىق مۋزەيى ازىرلەگەن كورمەنى تاماشالادى.
ايتا كەتەيىك، جىر الىبى – جامبىلدىڭ جانىندا جارتى عاسىر ۋاقىت ءجۇرىپ قازاق اۋىز ادەبيەتىنىڭ مول مۇراسىمەن قانىققان كەنەن اتى ۇلت مادەنيەتى تاريحىندا التىن ارىپپەن جازىلعان ەسىم سانالادى. وتكەن جىلى جىر ءدۇلدۇلىنىڭ ەسىمى وبلىستىق فيلارمونياعا بەرىلگەن بولاتىن. سوندىقتان دا ونىڭ ەسكەرتكىشى ءدال وسى وبلىستىق فيلارمونيا قونىستانعان «بالاساعۇن» ورتالىق كونتسەرت زالىنىڭ الدىنا قويىلۋى وتە ۇتىمدى ۇسىنىس بولىپ وتىر. دەمەۋشىلەر قاراجاتى ەسەبىنەن سالىنعان تاس ءمۇسىندى ءمۇسىنشى كولجىگىت تەمىرحان ازىرلەگەن.
«ادىرنا»
ۇلتتىق پورتالى
