Jambyl oblysynyń 80 jyldyǵyna arnalǵan merekelik sharalar legi Kenen Ázirbaev eskertkishiniń ashylý saltanatyna ulasty. Qazaqtyń áıgili halyq aqyny, ánshi, kompozıtor, Qazaqstannyń eńbek sińirgen óner qaıratkeriniń eskertkishi «Balasaǵun» ortalyq konert zaly ǵımaratynyń aldyna ornatylǵan.
Kenen Ázirbaev - qazaq ónerindegi sal-serilik jáne aıtyskerlik dástúrlerdi úzbeı, HH ǵasyrdyń 70-jyldaryna deıin jetkizgen ónerpaz. Dastan janryn jastaıynan jyrlaǵan. Qazaq halqynyń aıtys óneriniń nasıhatshysy. 150-deı án tolǵap, ánderi halyq súıip aıtatyn máńgilik rýhanı qazynaǵa aınaldy. Kenen Ázirbaevqa bıyl 135 jyl.
Kenen Ázirbaev eskertkishin ashý qurmeti Qazaqstannyń eńbek sińirgen mádenıet qyzmetkeri, kúıshi-kompozıtor Ábdimomyn Jeldibaev jáne Kenen atamyzdyń urpaǵy Murat Kenenovke buıyrdy.
Saltanatty sharaǵa arnaıy qatysqan QR Mádenıet jáne sport mınıstri Aqtoty Raıymqulova men aımaq basshysy Asqar Myrzahmetov barsha jambyldyqtar atynan eskertkishke gúl shoqtaryn qoıdy. Budan soń qonaqtar Qordaı aýdandyq K.Ázirbaev ádebı-memorıaldyq mýzeıi ázirlegen kórmeni tamashalady.
Aıta keteıik, jyr alyby – Jambyldyń janynda jarty ǵasyr ýaqyt júrip qazaq aýyz ádebıetiniń mol murasymen qanyqqan Kenen aty ult mádenıeti tarıhynda altyn árippen jazylǵan esim sanalady. Ótken jyly jyr dúldúliniń esimi oblystyq fılarmonııaǵa berilgen bolatyn. Sondyqtan da onyń eskertkishi dál osy oblystyq fılarmonııa qonystanǵan «Balasaǵun» ortalyq konert zalynyń aldyna qoıylýy óte utymdy usynys bolyp otyr. Demeýshiler qarajaty esebinen salynǵan tas músindi músinshi Kóljigit Temirhan ázirlegen.
«ADYRNA»
ulttyq portaly
