جامبىل وبلىسىندا «ەڭبەك» باعدارلاماسى ارقىلى ەكى قولعا ءبىر كۇرەك تاۋىپ، ەڭبەك ەتىپ جاتقان ازاماتتار بارشىلىق. سونىمەن قاتار وڭىردە شاعىن بيزنەسپەن اينالىسۋشى جاستاردىڭ دا سانى ارتىپ كەلەدى.
مويىنقۇم اۋدانىندا جاڭا جۇمىس ورىندارىن اشىپ، شاعىن بيزنەستى دامىتۋعا ۇلەس قوسىپ جاتقان جاستاردىڭ قاراسى قالىڭ. ءبىرى ستارتاپ جوبالاردى جۇزەگە اسىرىپ جاتسا، ەندى ءبىرى قايتارىمسىز گرانتتارعا قول جەتكىزۋدە. سولاردىڭ قاتارىندا نازگۇل ايداش پەن الۋا ورىنبەك بار. ولار «باستاۋ بيزنەس» جوباسى اياسىندا بەرىلەتىن قايتارىمسىز گرانتقا يە بولىپ شاشتاراز بەن سۇلۋلىق سالونىن اشىپتى. باعدارلاما اياسىندا بەرىلگەن 505 مىڭ تەڭگە قايتارىمسىز گرانتقا يە بولعان قىزدار اتالعان قارجىعا قاجەتتى قۇرال-جابدىقتاردى العان.
«بيزنەسپەن اينالىسۋدى جاس كەزىمنەن ارماندايتىنمىن. العاشىندا شاش قىرقۋ سىندى قىزمەتتەردى ءۇيدى ۇيگە بارىپ كورسەتتىم. بالامەن ۇيدە وتىرعاندا ارنايى كۋرستارعا قاتىستىم. قازىر ەڭبەگىمنىڭ جەمىسىن كورىپ ولتىرمىن. قايتارىمسىز گرانت الىپ بيزنەسىم وركەندەي باستادى، - دەيدى جاس كاسىپكەر
ال الۋا ورىنبەك اشقان سۇلۋلىق سالونى كوپسالالى قىزمەت كورسەتەدى. مۇندا قىز كەلىنشەكتەر شاش ساندەۋ، بويانۋ، ماسساج الۋعا كەلەدى.
«مويىنقۇم شالعاي جاتقان اۋدان بولسا دا شاعىن بيزنەس نىساندارى كوبەيىپ كەلەدى. اسىرەسە حالىققا كۇندەلىكتى قاجەت تۇرمىستىق دۇكەندەر مەن سۇلۋلىق سالوندارىن اشۋ ۇردىسكە اينالدى. مەن دە «اتامەكەن» كاسىپكەرلىك پالاتاسى ۇيىمداستىرعان كۋرسقا قاتىسىپ ءبىلىمىمدى جەتىلدىردىم. بيىل گرانتقا قول جەتكىزىپ كاسىپكەرلىكپەن اينالىسا باستادىم. جاستار جىلىندا جاستارعا ۇلكەن كومەكتەر كورسەتىلىپ جاتىر، - دەيدى الۋا.
مويىنقۇم اۋدانىندا «ەڭبەك» باعدارلاماسىنىڭ ەكىنشى باعىتى سانالاتىن جاپپاي كاسىپكەرلىكتى دامىتۋ بويىنشا نەسيە العانداردىڭ ءبىرى بەكەجان مامىشەۆ. ول 6- پايىزبەن 3 ميلليون تەڭگەگە قول جەتكىزىپتى. وعان ەندى 8 باس جىلقى ساتىپ العان.
«باعدارلامانىڭ ءتيىمدى تۇستارى وتە كوپ. مەن جىلقى باسىن كوبەيتىپ بولاشاقتا قىمىز وندىرسەم دەپ وتىرمىن, - دەيدى بەكجان مامىشەۆ.
بۇگىنگى تاڭدا مويىنقۇم اۋدانى بويىنشا 95- ادام قىسقا مەرزىمدى كاسىپتىك وقىتۋ كۋرستارىنا جولدانعان. ولار تراكتور جۇرگىزۋشىسى، شاشتاراز، اسپازشى سەكىلدى ماماندىقتاردى تەگىن وقيدى. ال، جاستار جىلىندا وڭىردەگى جاس كاسىپكەرلەردىڭ جوبالارىن قولداۋ جۇمىستارى جالعاسا بەرەدى.
«ادىرنا»
ۇلتتىق پورتالى
