پوليتسيا اقورداعا بەت العانداردى ۇستاپ جاتىر. نۇر-سۇلتان، 16 جەلتوقسان 2019 جىل.
پوليتسيا 16 جەلتوقسان كۇنى نۇر-سۇلتان قالاسىنداعى بيلىككە قارسى مارش كەزىندە ۇستالعان بەلسەندىلەردى الماتى اۋداندىق پوليتسيا بولىمشەسىنە جەتكىزگەن. پوليتسيا ۇستالعانداردىڭ ادۆوكاتتارىن ىشكى كىرگىزبەگەن. بۇل تۋرالى ازاتتىققا قۇقىق قورعاۋشى ەرلان قاليەۆ پەن ادۆوكات اسحات ورازباەۆ حابارلادى.
قۇقىق قورعاۋشى قاليەۆتىڭ سوزىنشە، الماتى اۋداندىق پوليتسيا بولىمشەسىندە ۇستالعانداردىڭ جاقىندارىنا ەشقانداي اقپارات بەرمەي وتىر.
- ءبىزدىڭ بىلۋىمىزشە، ۇستالعانداردىڭ ۇستىنەن قازىر پوليتسيا عيماراتىندا كوشپەلى سوت ءوتىپ جاتىر. سوتقا ادۆوكات اسحات ورازباەۆتى جىبەرمەدى. قانشا ادام ۇستالعانىن ايتپاي وتىر. ەسەپتەۋىمىزشە، شامامەن 25 ادامدار بار. ودان دا كوپ بولۋى مۇمكىن. ۇستالعانداردىڭ ۇستىنەن سوت ءوتىپ جاتقانى انىق. ۇستالعانداردىڭ اراسىندا بولاتبەك ءبىلالوۆ، دۋلات اعادىل بار. ولارعا ادۆوكاتىن جىبەرمەي، قۇقىقتارىن بۇزىپ جاتىر، - دەدى قاليەۆ.
ادۆوكات اسحات ورازباەۆ الماتى اۋداندىق پوليتسيا باسقارماسىنا ەكى ساعات بۇرىن كەلگەنىن، قورعاۋىنداعى ادامدارعا وتە الماي تۇرعانىن ايتتى.
- الماتى اۋداندىق پوليتسيا باسقاراماسىنا كەلگەنىمە ەكى ساعات بولدى. قورعاۋىمداعى بولاتبەك بىلالوۆكە، دۋلات اعادىلگە جانە ابىلاي ادىلحانوۆعا مەنى كىرگىزبەي تۇر. پوليتسياداعىلار كۇتىڭىزدەر دەپ وتىر. اكىمشىلىك ىسپەن، ايىپپەن تانىسا الماي وتىرمىن. ال الماتى اۋداندىق پوليتسياسىندا كوشپەلى سوت ءوتىپ جاتىر. وسى جەردە كەزەكشى پروكۋرور مەن كەزەكشى ادۆوكات بار دەپ وتىر. بىراق كەزەكشى ادۆوكاتتى كورگەن جوقپىن، تانىمايمىن، - دەيدى ادۆوكات.
16 جەلتوقساندا نۇر-سۇلتاندا جەلتوقسان جانە جاڭاوزەن وقيعاسى قۇرباندارىن ەسكە الۋ شاراسىنان كەيىن اقورداعا بەت العان ونداعان بەلسەندىنى جولدا پوليتسيا ۇستادى. ارنايى جاساق ولاردى اۆتوبۋسقا سالىپ، الىپ كەتكەن.
وسى كۇنى الماتىدا دا پوليتسيا بيلىككە تالاپ ايتقان ونداعان بەلسەندىنى ۇستاعان. ءىىم 16 جەلتوقساندا قانشا ادامنىڭ ۇستالعانى جايلى ازىرگە ەشقانداي اقپارات بەرمەدى.
"ازاتتىق" راديوسى
