جامبىل وبلىسىندا كوپبالالى جانە از قامتىلعان وتباسىلاردى تۇرعىن ۇيمەن قامتاماسىز ەتۋ قارقىندى تۇردە جۇرگىزىلىپ جاتىر. وسىنداي ءبىر قۋانىشتى جاڭالىق وبلىسقا قاراستى جاڭاتاس قالاسىندا بولدى.
قر تاۋەلسىزدىك كۇنى مەن جامبىل وبلىسىنىڭ 80 جىلدىق مەرەيتويىنا وراي جاڭاتاس قالاسىندا 120 پاتەرلى كوپقاباتتى تۇرعىن ءۇي پايدالانۋعا بەرىلدى.
سارىسۋ اۋدانىنىڭ وراتىلىعى جاڭاتاس قالاسىنداعى بوس تۇرعان كوپپاتتەرلى ۇيلەردى قالپىنا كەلتىرۋ شارارلارى جالعاسۋدا. بۇل جولى قالاداعى 1-شاعىن اۋدانداعى 120 پاتەرلى №9 كوپقاباتتى ءۇي قالپىنا كەلتىرىلىپ، 120 وتباسى باسپانالى بولدى. پاتەر كىلتتەرىن تابىستاۋ سالتاناتىنا اۋدان اكىمى قاناتبەك مادىبەكوۆ ارنايى قاتىستى. ول الەۋمەتتىك جاعىنان از قورعالعان جانە جىلدار بويى پاتەر كەزەگىندە تۇرعان وتباسىلاردى باسپانامەن قامتۋ باستى ماقسات بولىپ وتىرعانىن جەتكىزدى.
«جىل ساناپ دامىپ كەلە جاتقان جاڭاتاسىمىز ءۇشىن تۇرعىن ءۇي ماسەلەسى كۇن تارتىبىنەن تۇسكەن ەمەس. وسى ورايدا، جارتى عاسىرلىق تاريحى بار قالامىزدا مەملەكەتتىك باعدارلامالار اياسىندا كوپقاباتتى تۇرعىن ۇيلەر قايتا جاڭعىرتىلىپ، پايلانۋعا بەرىلۋدە. جىلدان-جىلعا قالا تۇرعىندارىنىڭ سانى كوبەيىپ، تۇرعىن ءۇي كەزەگىندەگىلەر سانى دا ارتا تۇسۋدە. بۇگىنگى تاڭدا، كوممۋنالدىق مەنشىكتەگى تۇرعىن ۇيلەردەن پاتەر الۋ كەزەگىندە 2 مىڭعا جۋىق ادام تىزىمدە تۇر»، - دەدى ق.مادىبەك.
اۋدان باسشىسى اۋدانداعى پاتەر كەزەگى ماسەلەسىن شەشۋ، اسىرەسە جاعدايى تومەن وتباسىلارى مەن مۇمكىندىگى شەكتەۋلى ازاماتتاردى تۇرعىن ۇيمەن قامتۋ ءۇشىن بارلىق مۇمكىندىكتەر قاراستىرىلىپ جاتقانىن ايتتى. بيىلعى جىلدىڭ وزىندە ءۇش ءۇي پايدالانۋعا بەرىلىپتى. قاناتبەك مادىبەك اۋدان تۇرعىندارىن ايتۋلى مەرەكەمەن قۇتتىقتاپ، بەلگىلەنگەن قۇرىلىس جۇمىستارىن ساپالى اتقارىپ، ەل يگىلىگىنە ۇسىنا بىلگەن «اقوردا كورپوراتسياسى» ۇجىمىنا جانە جالپى اتسالىسقان بارشا ازاماتتارعا العىسىن ءبىلدىردى.
جاڭا قونىسقا كىرگەن كوپبالالى انالار قۋانىشتارىن جاسىرا الماي انالارعا ەرەكشە كوڭىل بولگەن اۋدان، وبلىس باسشىسىنا دەگەن العىستارىن جەتكىزدى.
تاۋەلسىزدىك ەلەڭ-الاڭىندا تۇرعىندارى جاپپاي كوشىپ، قاڭىراپ قالعان قالا قايتادان تۇلەپ جاتىر. بۇعان قالادا جاڭادان جۇمىس ورىندارى اشىلىپ، تۇرعىندارعا قولايدى جاعداي جاسالعانى ايرىقشا اسەر ەتىپ جاتىر.
«ادىرنا»
ۇلتتىق پورتالى
