"تۇركيادا مۇناي مەن گاز بولسا كورسەتەر ەدىك الەمگە كىم ەكەنىمىزدى"

3373
Adyrna.kz Telegram

تامىز ايىندا استانادان الماتىعا كەلدىم. ۇشاقتا قاسىما تۇرىك ازاماتى جايعاستى. بىردەن سويلەسە كەتتىك. استانادا ءوزىنىڭ كافەسى بار بيزنەسمەن ەكەن. الماتىعا جەتكەنشە ساياسي اڭگىمەگە تارتتىم. كوزى اشىق، كوكىرەگى وياۋ ازامات ەكەنى كورىنىپ تۇر. اڭگىمە قىزا كەتتى. ءوزىم 2 جىل تۇركيادا جۇرگەندە سىرت كوز سىنشى دەگەندەي ارتىقشىلىعى دا، كەمشىلىگى دە كوزگە ۇرىپ تۇراتىن. اينالدىرىپ اكەلىپ "ەكى جىل قازاقستاندا تۇرىپ جاتىرسىز. ءبىزدىڭ ەل جايلى نە ويلايسىز؟" دەگەن تاقىرىپتا ۋاقىتتىڭ باسىم بولىگىن وزىنە بەرىپ، سويلەتىپ تىڭداپ كەلەمىن. سونداعى ايتقاندارى:

1. قازاقستاندا دايىن ءونىم شىعاراتىن زاۆود، فابريكا سالمايدى ەكەنسىڭدەر. سەندەردە ەڭ كوپ سالىناتىن نارسە كافە، رەستوران، ويىن-ساۋىق ورتالىقتارى، تورگوۆىي تسەنترلار جانە مەشىتتەر. كيىمدى، كۇندەلىكتى تۇتىناتىن زاتتاردى شىعاراتىن فابريكا، زاۆودتاردى نەگە سالمايسىڭدار؟!

2. استانادا ءبىر كوشەدەن كورگەن ادامدى كەلەسى كۇنى باسقا كوشەدەن كورىپ قالاسىڭ. ستامبۋلدان كەيىن شاعىن قالا سەكىلدى كورىنەدى. الماتى جاقسى. حالقى سالىستىرمالى تۇردە كوپ. ورنىققان قالا ءارى جىلى.

3. ساياساتتارىڭدا نۇرسۇلتاننان باسقانى ايتپايدى. وزدەرىڭە وسى ۇنايدى ما؟ الدە شىنىمەن قازاقستاندا باسقا ءبىرى جوق پا؟

4. كافەمدە جۇمىس ىستەيتىن قازاق جۇمىسشىلار مەنى ورىسشا تۇسىنبەيدى دەپ سول تىلدە بوقتايدى، ءوزارا ورىسشا كوپ سويلەسۋگە تىرسادى. ال مەن 60-70% نە ايتقانىن تۇسىنەمىن. بىراق بىلدىرمەيمىن. ورىسشا بىلمەيمىن دەپ ايتامىن. سولاي ولاردىڭ نە ويى بارىن ءتۇسىنىپ جۇرەمىن.

5. جۇمىس بىتە سالىسىمەن كافەمدە ىستەيتىن ادامدار جينالىپ اپتاسىنا ءبىر رەت تۇنگى كلۋبتارعا، كافەلەرگە كەتەدى. الاتىن جالاقىلارى 80-90 مىڭ. مەن مۇنداي ايلىق السام مۇلدە قىدىرماس ەدىم. قازىر بيزنەسىم بولسا دا كوپ ۇنەمدەۋگە تىرىسامىن. بوس نارسەگە كوپ شاشىلاسىڭدار.

6. جۇمىسشىلارىم كوپ سۇرانادى. تۋعان كۇن، اۋىلدان قوناق كەلدى، بۋرابايعا بارامىن ت.ب. سىلتاۋلارى كوپ. شارشادىم وسىلارىنان.

7. قازاقتار شەتەل ازاماتتارى بيزنەس اشسا جاقتىرمايدى ەكەن. بىراق وزدەرى دە ىستەمەيدى. الدىمەن بارلىق سالادا ءوزىڭ كاسىپ اشىپ، بوس جەر قالدىرماي تاستاۋىڭ كەرەك. سودان كەيىن ءبىز دە كەلمەيمىز بۇل ەلگە.

8. ورىسشاعا قۇمارسىڭدار. بۇل ەندى سوۆەت زامانىنان قالعان ەرەكشەلىك. بىراق، وڭتۇستىكتەن كەلگەندەر قازاقشا سويلەيدى. بۇل دا جاقسى عوي؟!

9. قازاقستانداعى ساياسي پارتيالار دەيسىڭ بە؟ شىنىمەن نۇرسۇلتاننان باسقاسىن بىلمەيمىن.

10. باي ەلسىڭدەر عوي. تۇركيادا مۇناي مەن گاز بولسا كورسەتەر ەدىك الەمگە كىم ەكەنىمىزدى.

11. نەگىزى جالقاۋسىڭدار. مىنا جاتقان بوس دالانىڭ ءبارىن اۋىل شارۋاشىلىعىندا، ەگىستىكتە قولدانسا بولادى عوي. بىراق بوس جاتىر. بۇل سالادا دا ءوز بيزنەسىمدى باستاسام تاعى جاقتىرمايسىڭدار. نە وزدەرىڭ ىستەمەيسىڭدەر.

12. استانادا كوپ زات جوق. بولسا دا قىمبات. كافەمە كەرەكتى زاتتار الۋ ءۇشىن الماتىعا كەلە جاتىرمىن. بۇل جەردە ارزان ءارى ىزدەگەنىڭدى تابۋعا بولادى.

وسىلاي اڭگىمە قىزىپ جاتقاندا الماتىعا دا كەلىپ جەتتىك. سىزدەر دە شەتەلدىكتەردى ءبىزدىڭ ەل تۋرالى اشىق اڭگىمەگە تارتاسىزدار ما؟ نە ايتادى جالپى؟..

باۋىرجان سەرىكباەۆتىڭ فەيسبۋك پاراقشاسىنان

پىكىرلەر