"Túrkııada munaı men gaz bolsa kórseter edik álemge kim ekenimizdi"

3374
Adyrna.kz Telegram

Tamyz aıynda Astanadan Almatyǵa keldim. Ushaqta qasyma túrik azamaty jaıǵasty. Birden sóılese kettik. Astanada óziniń kafesi bar bıznesmen eken. Almatyǵa jetkenshe saıası áńgimege tarttym. Kózi ashyq, kókiregi oıaý azamat ekeni kórinip tur. Áńgime qyza ketti. Ózim 2 jyl Túrkııada júrgende syrt kóz synshy degendeı artyqshylyǵy da, kemshiligi de kózge uryp turatyn. Aınaldyryp ákelip "Eki jyl Qazaqstanda turyp jatyrsyz. Bizdiń el jaıly ne oılaısyz?" degen taqyrypta ýaqyttyń basym bóligin ózine berip, sóıletip tyńdap kelemin. Sondaǵy aıtqandary:

1. Qazaqstanda daıyn ónim shyǵaratyn zavod, fabrıka salmaıdy ekensińder. Senderde eń kóp salynatyn nárse kafe, restoran, oıyn-saýyq ortalyqtary, torgovyı entrlar jáne meshitter. Kıimdi, kúndelikti tutynatyn zattardy shyǵaratyn fabrıka, zavodtardy nege salmaısyńdar?!

2. Astanada bir kósheden kórgen adamdy kelesi kúni basqa kósheden kórip qalasyń. Stambýldan keıin shaǵyn qala sekildi kórinedi. Almaty jaqsy. Halqy salystyrmaly túrde kóp. Ornyqqan qala ári jyly.

3. Saıasattaryńda Nursultannan basqany aıtpaıdy. Ózderińe osy unaıdy ma? Álde shynymen Qazaqstanda basqa biri joq pa?

4. Kafemde jumys isteıtin qazaq jumysshylar meni oryssha túsinbeıdi dep sol tilde boqtaıdy, ózara oryssha kóp sóılesýge tyrsady. Al men 60-70% ne aıtqanyn túsinemin. Biraq bildirmeımin. Oryssha bilmeımin dep aıtamyn. Solaı olardyń ne oıy baryn túsinip júremin.

5. Jumys bite salysymen kafemde isteıtin adamdar jınalyp aptasyna bir ret túngi klýbtarǵa, kafelerge ketedi. Alatyn jalaqylary 80-90 myń. Men mundaı aılyq alsam múlde qydyrmas edim. Qazir bıznesim bolsa da kóp únemdeýge tyrysamyn. Bos nársege kóp shashylasyńdar.

6. Jumysshylarym kóp suranady. Týǵan kún, aýyldan qonaq keldi, Býrabaıǵa baramyn t.b. syltaýlary kóp. Sharshadym osylarynan.

7. Qazaqtar shetel azamattary bıznes ashsa jaqtyrmaıdy eken. Biraq ózderi de istemeıdi. Aldymen barlyq salada óziń kásip ashyp, bos jer qaldyrmaı tastaýyń kerek. Sodan keıin biz de kelmeımiz bul elge.

8. Orysshaǵa qumarsyńdar. Bul endi Sovet zamanynan qalǵan erekshelik. Biraq, ońtústikten kelgender qazaqsha sóıleıdi. Bul da jaqsy ǵoı?!

9. Qazaqstandaǵy saıası partııalar deısiń be? Shynymen Nursultannan basqasyn bilmeımin.

10. Baı elsińder ǵoı. Túrkııada munaı men gaz bolsa kórseter edik álemge kim ekenimizdi.

11. Negizi jalqaýsyńdar. Myna jatqan bos dalanyń bárin aýyl sharýashylyǵynda, egistikte qoldansa bolady ǵoı. Biraq bos jatyr. Bul salada da óz bıznesimdi bastasam taǵy jaqtyrmaısyńdar. Ne ózderiń istemeısińder.

12. Astanada kóp zat joq. Bolsa da qymbat. Kafeme kerekti zattar alý úshin Almatyǵa kele jatyrmyn. Bul jerde arzan ári izdegenińdi tabýǵa bolady.

Osylaı áńgime qyzyp jatqanda Almatyǵa da kelip jettik. Sizder de sheteldikterdi bizdiń el týraly ashyq áńgimege tartasyzdar ma? Ne aıtady jalpy?..

Baýyrjan Serikbaevtyń Feısbýk paraqshasynan

Pikirler