قىتايدان قاشقان ەكى قازاق قىتايعا قايتارىلادى

3400
"قىتايدان قاشىپ كەلگەن" قازاقتار قاستەر مۇساحانۇلى (سول جاقتا) مەن مۇراگەر ءالىمۇلى (وڭ جاقتا) ءباسپاسوز ءماسليحاتىندا وتىر. الماتى، 14 قازان 2019 جىل.

قىتايدان قازاقستانعا "شەكارانى زاڭسىز كەسىپ ءوتتى" دەپ ايىپتالعان ەتنيكالىق قازاقتار قاستەر مۇساحانۇلى مەن مۇراگەر ءالىمۇلىن قىتايعا قايتارامىز دەپ مالىمدەدى قازاقستاننىڭ ۇلتتىق قاۋىپسىزدىك كوميتەتى توراعاسىنىڭ ورىنباسارى، شەكارا قىزمەتىنىڭ ديرەكتورى دارحان ءدىلمانوۆ. 6 جەلتوقساندا ۇلتتىق قاۋىپسىزدىك كوميتەتىنىڭ ءباسپاسوز قىزمەتى جاريلاعان ۆيدەوسۇحباتتا ءدىلمانوۆ وسىلاي دەگەن. بۇل تۋرالى "ازاتتىق" راديوسى حابارلايدى.

"سوت جانە بارلىق قىلمىستىق جاۋاپكەرشىلىككە تارتۋ شارالارى اياقتالعاننان كەيىن ءبىز بۇل ازاماتتاردى مەيلى قىتاي بولسىن، مەيلى باسقا مەملەكەت بولسىن، كەلگەن ەلىنە قايتارامىز. ناقتى جاعدايدا ءبىز قىتاي رەسپۋبليكاسىنا شەكارالىق وكىلدىك قىزمەتى ارقىلى تاپسىرامىز. ءارى قاراي كورشى مەملەكەت ماسەلەمەن ءوزى اينالىسادى" - دەدى دارحان ءدىلمانوۆ.

ءدىلمانوۆتىڭ ايتۋىنشا، ەكى ازاماتقا قاتىستى سوت جاقىندا باستالۋى ءتيىس. ول قازاقستاننىڭ زاڭسىز كوشى-قون پروتسەسىمەن "قاتاڭ كۇرەسەتىنىن" ايتقان.

قازان ايىنىڭ باسىندا قىتاي قازاقتارى قاستەر مۇساحانۇلى مەن مۇراگەر ءالىمۇلىنىڭ قازاقستانعا "شەكارانى زاڭسىز كەسىپ وتكەنى" تۋرالى اقپارات تاراعان. 14 قازاندا الماتىداعى ادام قۇقىعىن قورعاۋ بيۋروسىندا وتكەن ءباسپاسوز ءماسليحاتىندا قاستەر مۇساحانۇلى شىڭجاڭداعى "ساياسي لاگەردە قاماۋدا بولعانىن", مۇراگەر ءالىمۇلى قىتايدا "قىسىم كورگەنىن" ايتقان ەدى. قازان ايىنىڭ ورتاسىندا ۇقك ولاردى "شەكارادان زاڭسىز ءوتتى" دەپ ايىپتاپ، وسكەمەن قالاسىنداعى تەرگەۋ يزولياتورىنا جەتكىزگەن.

وسىدان بىرنەشە كۇن بۇرىن ولاردىڭ ادۆوكاتى ءلاززات احاتوۆا ازاتتىق تىلشىسىنە تەرگەۋ امالدارى اياقتالعانىن، ءىس ماتەريالدارىمەن تانىسىپ جاتقانىن حابارلاعان. ءلاززات احاتوۆا وسكەمەندە قاماۋدا وتىرعان ەكى جىگىتتىڭ قىتايدا قالعان تۋىستارىنا قىسىم جالعاسىپ جاتقانىن دا ايتقان.

قازاقستان بيلىگىنەن بوسقىن مارتەبەسىن سۇراعان قىتايدىڭ ەكى ازاماتىنا قازان ايىنىڭ سوڭىندا "پانا ىزدەۋشى تۇلعا" كۋالىگى بەرىلگەن ەدى.

مۇراگەر ءالىمۇلى مەن قاستەر مۇساحانۇلىنىڭ تاعدىرىنا الاڭداعان ءبىر توپ بەلسەندى بۇعان دەيىن ءباسپاسوز جيىنىن وتكىزىپ، ەگەر قىتايعا قايتارىلسا، ەكەۋىنىڭ ومىرىنە قاۋىپ تونەتىنىن ايتىپ، قازاقستان بيلىگىنەن ولارعا بوسقىن مارتەبەسىن بەرۋىن سۇراعان.

پىكىرلەر