Qytaıdan qashqan eki qazaq Qytaıǵa qaıtarylady

3399
"Qytaıdan qashyp kelgen" qazaqtar Qaster Musahanuly (sol jaqta) men Murager Álimuly (oń jaqta) baspasóz máslıhatynda otyr. Almaty, 14 qazan 2019 jyl.

Qytaıdan Qazaqstanǵa "shekarany zańsyz kesip ótti" dep aıyptalǵan etnıkalyq qazaqtar Qaster Musahanuly men Murager Álimulyn Qytaıǵa qaıtaramyz dep málimdedi Qazaqstannyń ulttyq qaýipsizdik komıteti tóraǵasynyń orynbasary, shekara qyzmetiniń dırektory Darhan Dilmanov. 6 jeltoqsanda ulttyq qaýipsizdik komıtetiniń baspasóz qyzmeti jarılaǵan vıdeosuhbatta Dilmanov osylaı degen. Bul týraly "Azattyq" radıosy habarlaıdy.

"Sot jáne barlyq qylmystyq jaýapkershilikke tartý sharalary aıaqtalǵannan keıin biz bul azamattardy meıli Qytaı bolsyn, meıli basqa memleket bolsyn, kelgen eline qaıtaramyz. Naqty jaǵdaıda biz Qytaı Respýblıkasyna shekaralyq ókildik qyzmeti arqyly tapsyramyz. Ári qaraı kórshi memleket máselemen ózi aınalysady" - dedi Darhan Dilmanov.

Dilmanovtyń aıtýynsha, eki azamatqa qatysty sot jaqynda bastalýy tıis. Ol Qazaqstannyń zańsyz kóshi-qon proesimen "qatań kúresetinin" aıtqan.

Qazan aıynyń basynda Qytaı qazaqtary Qaster Musahanuly men Murager Álimulynyń Qazaqstanǵa "shekarany zańsyz kesip ótkeni" týraly aqparat taraǵan. 14 qazanda Almatydaǵy adam quqyǵyn qorǵaý bıýrosynda ótken baspasóz máslıhatynda Qaster Musahanuly Shyńjańdaǵy "saıası lagerde qamaýda bolǵanyn", Murager Álimuly Qytaıda "qysym kórgenin" aıtqan edi. Qazan aıynyń ortasynda UQK olardy "shekaradan zańsyz ótti" dep aıyptap, Óskemen qalasyndaǵy tergeý ızolıatoryna jetkizgen.

Osydan birneshe kún buryn olardyń advokaty Lázzat Ahatova Azattyq tilshisine tergeý amaldary aıaqtalǵanyn, is materıaldarymen tanysyp jatqanyn habarlaǵan. Lázzat Ahatova Óskemende qamaýda otyrǵan eki jigittiń Qytaıda qalǵan týystaryna qysym jalǵasyp jatqanyn da aıtqan.

Qazaqstan bıliginen bosqyn mártebesin suraǵan Qytaıdyń eki azamatyna qazan aıynyń sońynda "pana izdeýshi tulǵa" kýáligi berilgen edi.

Murager Álimuly men Qaster Musahanulynyń taǵdyryna alańdaǵan bir top belsendi buǵan deıin baspasóz jıynyn ótkizip, eger Qytaıǵa qaıtarylsa, ekeýiniń ómirine qaýip tónetinin aıtyp, Qazaqstan bıliginen olarǵa bosqyn mártebesin berýin suraǵan.

Pikirler