جامبىل وبلىسىنىڭ 80 جىلدىعىنا وراي ەل يگلىگىنە 80 نىساندى پايدالانۋعا بەرىلۋدە. سولاردىڭ ءبىرى تاراز قالاسىنداعى توقسان پاتەرلى 9 قاباتتى ەكى تۇرعىن ءۇي بولىپ وتىر.
تاراز قالاسىنداعى قانىش ساتپاەۆ كوشەسىندە قۇرىلىسى ءجۇرىپ جاتقان «نۇرلى تاڭ» كەشەنىنىڭ اياقتالىپ، ەل يگىلىگىنە بەرىلدى. اتالعان تۇرعىن ءۇيدى ازاماتتار «نۇرلى جەر» جانە «7-20-25» باعدارلاماسى بويىنشا الىپ وتىر.
وبلىس اكىمىنىڭ ءبىرىنشى ورىنباسارى بەكبولات ورىنبەكوۆ پاتەر كىلتتەرىن سالتاناتتى تۇردە تابىستاپ، قۋانىش يەلەرىن قۇتتىقتادى.
«بۇگىن قالامىزدىڭ 44 وتباسى جاڭا ۇيدەگى ءوز پاتەرلەرىنىڭ تابالدىرىعىن اتتاپ وتىر. تۇرعىنداردى تۇرعىن ۇيمەن قامتاماسىز ەتۋ – مەملەكەت ساياساتىنىڭ نەگىزى. سوندىقتان مەملەكەت باسشىسى قاسىم-جومارت توقاەۆتىڭ تاپسىرماسىن نازارعا الا وتىرىپ، جىل باسىنان بەرى وڭىرىمىزدە 10 كوپپاتەرلى تۇرعىن ءۇي پايدالانۋعا بەرىلدى. ال جاڭا جىلعا دەيىن وبلىس ورتالىعىنىڭ جاڭا 15-ءشى شاعىن اۋدانىندا تاعى ءتورت بىردەي ارەندالىق جانە ءۇش نەسيەلىك ءۇي پايدالانۋعا بەرىلەدى. از قامتاماسىز ەتىلگەن، كوپبالالى وتباسىلار دا نازاردان تىس قالمايدى. ولار ءۇشىن «باقىتتى وتباسى» باعدارلاماسى جۇمىس ىستەپ تۇر. ونىڭ شەڭبەرىندە كەزەكتە تۇرعاندارعا 146 پاتەردىڭ كىلتى بەرىلدى. سونداي-اق، «اراي» جانە «قاراسۋ» القاپتارىندا 360 پاتەرلىك سەگىز جاتاقحانانىڭ قۇرىلىسىن اياقتاۋ جوسپارلانۋدا. وزدەرىڭىز كورىپ وتىرعانىمىزداي، تۇرعىن ءۇي ماسەلەسى ۋاقىتىلى جانە ساپالى شەشىلىپ كەلەدى، – دەدى بەكبولات ورىنبەكوۆ.
ەرەكشە ۇلگىدەگى توعىز قاباتتى ءمونوليتتى ۇيلەر تاراز مەملەكەتتىك ۋنيۆەرسيتەتىنىڭ «گيدرو» كەشەنىمەن كورشىلەس ورنالاسقان. سالتاناتتى تۇردە كىلت تابىستاۋ راسىمىندە قۇرىلىسى اياقتالعان ەكى توعىز قاباتتى ۇيگە تۇرعىندار قونىستاندى. سولاردىڭ ءبىرى گۇلسارا بالكەنوۆا ءوز قۋانىشىمەن ءبولىستى.
«ءاۋ باستا ءۇي الاتىن كەزدە قالانىڭ ەكولوگيالىق تازا اۋدانىنان پتەر ىزدەدىك. سونداي-اق قاۋىپسىزدىك ماسەلەسىنە نازار اۋداردىق. كورىپ وتىرعاندارىڭىزداي، تۇرعىن ءۇي كەشەنىنىڭ اينالاسى تولىقتاي قورشالعان. بۇل اسىرەسە ءبىز سياقتى كوپبالالى وتباسىلار ءۇشىن وتە قولايلى. سونىمەن قاتار اۋلادا تۇرعىنداردىڭ ىڭعايلىلىعى ءۇشىن ويىن الاڭدارى، دەمالۋعا ارنالعان جاسىل جەلەكتى اۋماقتار بار. ەڭ باستىسى تۇرعىن ءۇي كەشەنىنىڭ ماڭىندا ورتا مەكتەپ پەن «دارىن» مەكتەبى ورنالاسقان. الداعى ۋاقىتتا جاڭا نىساننىڭ اۋماعىنا 150 ورىندىق بالاباقشا سالۋ جوسپارلانىپ وتىر ءبىر سوزبەن ايتقاندا وتە قۋانىشتىمىز»، – دەيدى ول.
اتالمىش كوپقاباتتى تۇرعىن ءۇي قۇرىلىسىن «تاراز قۇرىلىس ديزاين» كومپانياسى قۇرىلىس جۇمىستارىن ءبىر جىل ىشىندە اياقتاعان.
«ادىرنا»
ۇلتتىق پورتالى
