Jambyl oblysynyń 80 jyldyǵyna oraı el ıgligine 80 nysandy paıdalanýǵa berilýde. Solardyń biri Taraz qalasyndaǵy toqsan páterli 9 qabatty eki turǵyn úı bolyp otyr.
Taraz qalasyndaǵy Qanysh Sátpaev kóshesinde qurylysy júrip jatqan «Nurly tań» kesheniniń aıaqtalyp, el ıgiligine berildi. Atalǵan turǵyn úıdi azamattar «Nurly jer» jáne «7-20-25» baǵdarlamasy boıynsha alyp otyr.
Oblys ákiminiń birinshi orynbasary Bekbolat Orynbekov páter kiltterin saltanatty túrde tabystap, qýanysh ıelerin quttyqtady.
«Búgin qalamyzdyń 44 otbasy jańa úıdegi óz páterleriniń tabaldyryǵyn attap otyr. Turǵyndardy turǵyn úımen qamtamasyz etý – memleket saıasatynyń negizi. Sondyqtan Memleket basshysy Qasym-Jomart Toqaevtyń tapsyrmasyn nazarǵa ala otyryp, jyl basynan beri óńirimizde 10 kóppáterli turǵyn úı paıdalanýǵa berildi. Al jańa jylǵa deıin oblys ortalyǵynyń jańa 15-shi shaǵyn aýdanynda taǵy tórt birdeı arendalyq jáne úsh nesıelik úı paıdalanýǵa beriledi. Az qamtamasyz etilgen, kópbalaly otbasylar da nazardan tys qalmaıdy. Olar úshin «Baqytty otbasy» baǵdarlamasy jumys istep tur. Onyń sheńberinde kezekte turǵandarǵa 146 páterdiń kilti berildi. Sondaı-aq, «Araı» jáne «Qarasý» alqaptarynda 360 páterlik segiz jataqhananyń qurylysyn aıaqtaý josparlanýda. Ózderińiz kórip otyrǵanymyzdaı, turǵyn úı máselesi ýaqytyly jáne sapaly sheshilip keledi, – dedi Bekbolat Orynbekov.
Erekshe úlgidegi toǵyz qabatty monolıtti úıler Taraz memlekettik ýnıversıtetiniń «Gıdro» keshenimen kórshiles ornalasqan. Saltanatty túrde kilt tabystaý rásiminde qurylysy aıaqtalǵan eki toǵyz qabatty úıge turǵyndar qonystandy. Solardyń biri Gúlsara Balkenova óz qýanyshymen bólisti.
«Áý basta úı alatyn kezde qalanyń ekologııalyq taza aýdanynan pter izdedik. Sondaı-aq qaýipsizdik máselesine nazar aýdardyq. Kórip otyrǵandaryńyzdaı, turǵyn úı kesheniniń aınalasy tolyqtaı qorshalǵan. Bul ásirese biz sııaqty kópbalaly otbasylar úshin óte qolaıly. Sonymen qatar aýlada turǵyndardyń yńǵaılylyǵy úshin oıyn alańdary, demalýǵa arnalǵan jasyl jelekti aýmaqtar bar. Eń bastysy turǵyn úı kesheniniń mańynda orta mektep pen «Daryn» mektebi ornalasqan. Aldaǵy ýaqytta jańa nysannyń aýmaǵyna 150 oryndyq balabaqsha salý josparlanyp otyr bir sózben aıtqanda óte qýanyshtymyz», – deıdi ol.
Atalmysh kópqabatty turǵyn úı qurylysyn «Taraz qurylys dızaın» kompanııasy qurylys jumystaryn bir jyl ishinde aıaqtaǵan.
«ADYRNA»
ulttyq portaly
