بۇگىنگى جاستار-ەلىمىزدىڭ ەرتەڭى. تاۋەلسىز ەلىمىزدىڭ بولاشاعىنىڭ باياندى، كەلەشىگىنىڭ كەمەل بولۋى جاستارعا تىكەلەي بايلانىستى. سول سەبەپتى ەلدىڭ ەرتەڭگى ۇمىتتەرىن جەكە باستىڭ ەمەس، ەلدىڭ قامىن جەيتىن ۇلتجاندى، رۋحشىل ۇرپاق ەتىپ تاربيەلەۋدىڭ ماڭىزدىلىعى ەرەكشە. بۇگىنگى تاڭدا ەلىمىزدە مەكتەپ قابىرعاسىنان باستاپ پاتريوتتىق تاربيە بەرۋ، ۇلتتىق مۇددەنى بارىنەن دە بيىك قوياتىن ۇرپاق تاربيەلەۋ ماقساتىندا از جۇمىس جاسالىپ جاتقان جوق. اسىرەسە وسىدان ءبىر جىل بۇرىن قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ تىكەلەي قولداۋىمەن ءوز جۇمىسىن باستاعان «جاس سارباز» اسكەري پاتريوتتىق قوزعالىسى از ۋاقىتتا اۋقىمدى جۇمىستار جاساپ، وڭ ناتيجەلەر كورسەتە باستادى.
ەلباسى نۇرسۇلتان ءابىشۇلىنىڭ تياناقتى تاپسىرماسىنا ساي بۇگىنگى تاڭدا ەلىمىزدىڭ بارلىق ايماعىندا «جاس سارباز» قوزعالىسىنىڭ فيليالدارى اشىلدى. ايماقتارداعى فيليالداردىڭ قاي-قايسىنىڭ بولماسىن جۇمىسىنا زەر سالساڭىز، شىنىمەن-اق جالىندى جاستاردىڭ اۋىز تولتىرىپ ايتارلىقتاي يگى ىستەردىڭ باسىندا جۇرگەنىن اڭعارامىز. سونىمەن قاتار مەكتەپ وقۋشىلارىنىڭ قوزعالىس جۇمىسىنا قىزىعۋشىلىعى وتە جوعارى ەكەنىن بايقاۋعا بولادى. مىسالى «جاس سارباز» اسكەري-پاتريوتتىق جاستار قوزعالىسىنىڭ جامبىل وبلىستىق فيليالىنىڭ توراعاسى دۋلات ءابدۋساميتتىڭ ايتۋىنشا، قازىردىڭ وزىندە وبلىستا قوزعالىستىڭ 13 500 مۇشەسى بار ەكەن.
«قازىر ەلىمىزدە جاستارعا پاتريوتتىق تاربيە بەرىپ، ەلىن، جەرىن سۇيەتىن ازاماتتاردى قالىپتاستىرۋعا ايرىقشا نازار اۋدارۋدا. وسى ورايدا «جاس سارباز» قوزعالىسى بۇگىنگى كۇننىڭ كۇن تارتىبىندە تۇرعان ماسەلە بويىنشا جۇيەلى جۇمىستار جۇرگىزۋدە. ارينە قوزعالىستىڭ اشىلعانىنا كوپ ۋاقىت بولعان جوق. دەگەنمەن از عانا ۋاقىتتىڭ ىشىندە قوزعالىس جۇمىسى ءبىر جۇيەگە ءتۇسىپ، ءوز جولىن تاپتى دەۋگە بولادى. اتقارىلعان جۇمىس از ەمەس. بىراق اتقاراتىن جۇمىس ودان دا كوپ. سول سەبەپتى الداعى ۋاقىتتا قوزعالىس مۇشەلەرى ارتىلعان جاۋاپكەرشىلىك جۇگىن ابىرويمەن كوتەرە ءبىلىپ، بار مۇمكىندىكتەرىن كورسەتۋگە تىرىساتىن بولادى، – دەگەن دۋلات ەرجانۇلى قازىرگى تاڭدا وبلىستاعى ءبىلىم وشاقتارىندا، جوعارى وقۋ ورىندارىندا، كوللەدجدەردە ءتۇرلى باعىتتاعى كەزدەسۋلەر وتكىزىلىپ جاتقانىن ايتادى. وبلىستىق فيليالدىڭ كەلەسى جىلعا جوسپارى دا اۋقىمدى.
سونداي-اق تاراز قالالىق جاستار رەسۋرستىق ورتالىعىنىڭ ديرەكتورى نۇرلان قاناتوۆ كوپ جاعدايدا بارلىق ماسەلە اقشاعا بايلانىستى ەكەنىن، سول سەبەپتى دە كەلەسى جىلى فيليال جۇمىسىن جۇيەلەۋگە 2 ميلليون تەڭگە ءبولۋ جوسپاردا ەكەنىن ايتادى.
ەڭ باستىسى، جاۋاپتى باسشىلار «جاس سارباز» اسكەري-پاتريوتتىق جاستار قوزعالىسى جۇمىسىنىڭ اسا جاۋاپتى ەكەنىن ءتۇسىنىپ، قولداۋ كورسەتۋدە. ءسوزىمىزدىڭ دالەلى وبلىستىق فيليالعا ارنايى عيمارات بەرىپ، كەرەك-جاراقتارىمەن تولىقتاي قامتاماسىز ەتىپ بەرگەن.
«ادىرنا»
ۇلتتىق پورتالى
