ەكرەم يماموگلۋ ستامبۋل مەرى بولعالى قالانى وزىنە دەيىن باسقارعان ەردوعاننىڭ «اق پارتياسى» جىبەرگەن قاتەلىكتەردى مەديادا اشىق جاريالاي باستادى. كوپ شەشىمدەر ساياسي تۇرعىدان قابىلدانىپ، ەكونوميكالىق تاراپى دۇرىس قارالماعانىن، قالا ەففەكتيۆتى باسقارىلماعانىن، شىعىندار بوس جەرگە جۇمسالعانىن اقىرىنداپ حالىققا ەستىرتىپ جاتىر. ەۆروپاداعى ەڭ ءىرى اۆتوۆوكزالدى جوندەپ، اينالاسىن تازارتىپ، حالىق دەمالاتىن ورىنعا اينالدىردى. ەڭ قىزىعى، انكارادا وتىرعان باسشىلار ستامبۋلعا قاتىستى شەشىم قابىلداردا جەرگىلىكتى باسقارۋ ورىندارىنىڭ (ستامبۋل اكىمشىلىگىنىڭ) كەلىسىمىن الىپ، اقىلداسۋى كەرەكتىگىن باسا ايتۋدا. بۇرىنعىداي ەردوعان مالىمدەيتىندەي، "ەۆروپانىڭ ەڭ ۇلكەن اەروپورتىن مىنا جەردەن سالامىز" دەگەن سەكىلدى بىرجاقتى شەشىمدەر قابىلداي بەرەتىن داۋرەن اياقتالعانىن يماموگلۋ استارلاپ بولسىن جەتكىزۋدە. "تۋريزم مينيسترلىگى ستامبۋلعا تۋريستەر تارتۋ جوسپارىن جاساردا بىزبەن اقىلداسۋى قاجەت" دەگەندى دە ءجيى ايتىپ ءجۇر. نەگىزى ول باسشىلىققا كەلگەلى جۇمىسىن جاقسى جۇرگىزىپ كەلەدى. ال 16 ملن حالقى بار ستامبۋل حالقىنىڭ جۇرەگىن جاۋلاپ السا ارعى جاعىندا پرەزيدەنت سايلاۋىندا جەڭىسكە جەتۋى دە عاجاپ ەمەس. ستامبۋلدى كىم بيلەسە تۇركيانى سول باسقاراتىن زاڭدىلىق بار.
بۇل دەگەن ءسوز - ەردوعانعا قامشى باسۋ كەرەك. ۇزاق جىلداردان كەيىن وزىنەن جاس، ەكونوميكادان تۇسىنەتىن، مۇلدەم جاڭاشا ويلايتىن جاس ليدەر شىعىپ كەلەدى. ساياسي جۇيەدەگى بۇل باسەكە ەلگە، حالىققا جاقسى. مويىنداۋ كەرەك، تۇركيادا قوعامنىڭ كوڭىلىن تابۋ ءۇشىن ەكى ەسە ەڭبەكتەنەتىن باسشىلاردى ورتاعا شىعاراتىن جۇيە بار.
باۋىرجان سەرىكباەۆ،
«ادىرنا» ۇلتتىق پورتالى
