تۇركيادا بورتىندا 110 ادام بولعان تۋريستىك كەمە سۋعا باتىپ كەتتى، دەپ حابارلايدى «ادىرنا» ءتىلشىسى.
وقيعا 29 مامىر كۇنى دجەننەت ارالى ماڭىنداعى تەڭىز ايدىنىندا بولعان. الدىن الا مالىمەت بويىنشا، كەمە كاپيتانى سۋ كولىگىنە سۋ كىرە باستاعانىن بايقاعان. ول كەمەنى جاعاعا باعىتتاۋعا تىرىسقانىمەن، مينۋت سايىن سۋ باسۋ جىلدام كۇشەيگەن.
ەكيپاج جەدەل ارەكەت ەتىپ، شۇعىل ەۆاكۋاتسيا جاريالاعان. سۋ استىنا كەتىپ بارا جاتقان كەمەگە جاقىن ماڭداعى باسقا ەكسكۋرسيالىق قايىقتار مەن جاعالاۋ كۇزەتى كاتەرلەرى دەرەۋ كومەككە كەلگەن.
ناتيجەسىندە بارلىق 110 جولاۋشى دەر كەزىندە قۇتقارىلىپ، باسقا سۋ كولىكتەرىنە وتىرعىزىلعان. ەۆاكۋاتسيادان بىرنەشە مينۋت وتكەن سوڭ كەمە تولىقتاي سۋعا باتىپ كەتكەن.
جەرگىلىكتى بيلىكتىڭ مالىمەتىنشە، وقيعا سالدارىنان زارداپ شەككەندەر جوق. قازىر ماماندار كەمەنىڭ نە سەبەپتى سۋعا باتقانىن انىقتاپ جاتىر، رەسمي تەرگەۋ باستالدى.
