Erdoǵannyń ornyn Imamoglý basa ma?

720

Ekrem Imamoglý Stambýl meri bolǵaly qalany ózine deıin basqarǵan Erdoǵannyń «Aq partııasy» jibergen qatelikterdi medıada ashyq jarııalaı bastady. Kóp sheshimder saıası turǵydan qabyldanyp, ekonomıkalyq tarapy durys qaralmaǵanyn, qala effektıvti basqarylmaǵanyn, shyǵyndar bos jerge jumsalǵanyn aqyryndap halyqqa estirtip jatyr. Evropadaǵy eń iri avtovokzaldy jóndep, aınalasyn tazartyp, halyq demalatyn orynǵa aınaldyrdy. Eń qyzyǵy, Ankarada otyrǵan basshylar Stambýlǵa qatysty sheshim qabyldarda jergilikti basqarý oryndarynyń (Stambýl ákimshiliginiń) kelisimin alyp, aqyldasýy kerektigin basa aıtýda. Burynǵydaı Erdoǵan málimdeıtindeı,  "Evropanyń eń úlken aeroportyn myna jerden salamyz" degen sekildi birjaqty sheshimder qabyldaı beretin dáýren aıaqtalǵanyn  Imamoglý astarlap bolsyn jetkizýde. "Týrızm mınıstrligi Stambýlǵa týrıster tartý josparyn jasarda bizben aqyldasýy qajet" degendi de jıi aıtyp júr. Negizi ol basshylyqqa kelgeli jumysyn jaqsy júrgizip keledi. Al 16 mln halqy bar Stambýl halqynyń júregin jaýlap alsa arǵy jaǵynda prezıdent saılaýynda jeńiske jetýi de ǵajap emes. Stambýldy kim bılese Túrkııany sol basqaratyn zańdylyq bar.

Bul degen sóz - Erdoǵanǵa qamshy basý kerek. Uzaq jyldardan keıin ózinen jas, ekonomıkadan túsinetin, múldem jańasha oılaıtyn jas lıder shyǵyp keledi. Saıası júıedegi bul báseke elge, halyqqa jaqsy. Moıyndaý kerek, Túrkııada qoǵamnyń kóńilin tabý úshin eki ese eńbektenetin basshylardy ortaǵa shyǵaratyn júıe bar.

 

 

Baýyrjan SERIKBAEV,

«Adyrna» ulttyq portaly

Pikirler