شىعىس قازاقستاننىڭ اكىمى دانيال احمەتوۆ ايماقتا مەديتسينا سالاسى قالاي دامىپ جاتقانىن ايتتى، دەپ حابارلايدى قازاقپارات ءتىلشىسى.
اكىمنىڭ ايتۋىنشا، الداعى جىلدارى سەمەيدەگى جەدەل مەديتسينالىق كومەك اۋرۋحاناسى JCI حالىقارالىق ستاندارتىنا سايكەستەندىرىلەدى. ول سونداي-اق، وڭىردەگى ەلدىمەكەندەردە كارديولوگيالىق ورتالىقتار اشىلىپ جاتقانىن اتاپ ءوتتى.
«مەديتسينا ساپاسى - زامانعا ساي جابدىقتاردى يگەرىپ، ساتىپ الۋ، فيليالداردى اشىپ، مەديتسينالىق ۇيىمداردىڭ حالىقارالىق ستاندارتقا كوشىرىلۋىمەن ەسەپتەلەدى. سونىمەن قاتار، ءبىز تەك جەتەكشى ايماقتىق كلينيكالاردى دامىتۋدى ماقسات تۇتىپ وتىرعان جوقپىز. رەسپۋبليكادا ءبىرىنشى بولىپ ەكى اۋدان ورتالىعىندا - اياگوز بەن التايدا ينسۋلت ورتالىعىن اشتىق. تۇرعىندار الدىمەن جاڭا حالىقارالىق ستاندارتتاردىڭ نە ەكەنىن كوردى. ءتورت ايدىڭ ىشىندە ءبىز سول ەلدىمەكەندەردە كارديولوگيالىق ورتالىقتاردى اشامىز. ارتىنشا اياگوز مەن التايدا شۋنتتى وپەراتسيالار جاسالادى»، - دەدى شىعىس قازاقستان وبلىسىنىڭ اكىمى وكق-دا وتكەن ءباسپاسوز ءماسليحاتىندا.
دانيال احمەتوۆ سونىمەن قاتار، ايماقتا نۇر-سۇلتان مەن الماتىدا ورنالاسقان جەتەكشى مەديتسينالىق ورتالىقتاردىڭ فيليالدارىن اشۋ قاجەتتىگىن اتاپ ءوتتى.
«ەكى-ءۇش قالاداعى جوعارى تەحنولوگيالىق ورتالىقتارعا سۇيەنەتىن بولساق، پروگرەسسيۆتى مەديتسينانى دامىتا المايمىز. ءبىز سەمەي قالاسىنداعى اۋرۋحانادا تراۆماتولوگيا ينستيتۋتىنىڭ فيليالىن ۇيىمداستىردىق. وسكەمەندە كارديولوگيالىق ورتالىق سالۋدامىز. جاقىن ارادا سەمەي قالاسىندا نەيروحيرۋرگيا ينستيتۋتىنىڭ فيليالى اشىلادى»، - دەدى اكىم.
«ادىرنا» پورتالى
