كازنەتتە تارالعان شىمكەنت قالاسىنداعى ينفەكتسيالىق اۋرۋحانا ماڭىندا بولعان جاعداي بويىنشا جەدەل جاردەم دارىگەرى اقپاراتتىق-كوممۋنيكاتسيالىق ورتالىعىندا وتكەن بريفينگتە تۇسىنىكتەمە بەردى.
بەينەروليك يەسى ارمان حامزين مەديتسينالىق مامان بولعاندىقتان، ناۋقاستاردىڭ جاعدايى ءۇشىن الاڭداپ، وسى بەينەروليكتى تۇسىرگەنىن جەتكىزدى.
– وزدەرىڭىزگە ءمالىم، ءۇش ايدان بەرى العى شەپتە جۇمىس ىستەپ كەلەمىز. بۇل – وتە اۋىر. ناۋقاستاردى كورگەندە، ءتىپتى پسيحوەموتسيالىق جاعدايلار بولادى. وسى ورايدا ءوز دەنساۋلىعىمىز بەن وتباسىمىز ءۇشىن دە الاڭدايمىز. ال كەشە الەۋمەتتىك جەلىدە تاراعان بەينەروليككە توقتالسام، ءدال قازىرگى تاڭدا پنەۆمونيامەن اۋىرعان ناۋقاستاردىڭ سانى ءوستى. بۇل جاعدايدى قالىپتا ۇستاۋ ءۇشىن جان-جاقتى جۇمىستار جۇرگىزىلىپ، ستاتسيونارلىق ورتالىقتار اشىلۋدا. اتالعان وقيعا بولار كەزدە ناۋقاستى ينفەكتسيالىق اۋرۋحاناعا جاتقىزۋ تۋرالى كوورديناتسيا بەرگەن. بىراق ءبىز اۋرۋحانا الدىنا كەلگەندە جەدەل-جاردەم كولىكتەرىنىڭ كوبەيىپ كەتكەنىن كوردىك. ينفەكتسيالىق اۋرۋحانادا ورىن جەتىسپەۋشىلىگى تۋىندادى. ياعني، بىزگە ديسپەتتسەرلىك ورتالىق دۇرىس باعىت بەرمەگەن. ال ناۋقاس ەكى جاقتى پنەۆونيانىڭ اۋىر تۇرىمەن اۋىرعان، جاعدايى ناشار ەدى. سول سەبەپتى ناۋقاستى جەدەل ورنالاستىرۋ قاجەت بولاتىن. وسى ۋاقىتتا جاعداي ۋشىقتى. ناۋقاستىڭ ءحالى ناشارلاي بەردى. ونىڭ ومىرىنە الاڭداپ، بەينەروليككە ءتۇسىردىم. سودان كوپ ۇزاماي، ماسەلە شەشىلىپ، ناۋقاستى قايدا ورنالاستىرۋ تۋرالى حابارلاما كەلدى. وسى رەتتە بۇل ءتۇسىرىلىمنىڭ الەۋمەتتىك جەلىدە تاراپ، حالىقتىڭ دۇرلىككەنىن قالاماعانىمدى ايتا كەتەيىن. ەندى الداعى ۋاقىتتا مۇنداي ارەكەتتەر قايتالانبايتىنىن جەتكىزە وتىرىپ، كەشىرىم سۇرايمىن! – دەدى ارمان ساياتۇلى.
سونداي-اق، بەينەروليك يەسى بۇل جاعدايدان كەيىن تاڭعا دەيىن جۇمىس ىستەگەندەرىن جانە سول كۇنى ديسپەتتسەرلىك ورتالىق قىزمەتىندە كەلەڭسىزدىك تۋىنداماعانىن ايتتى.
بۇل رەتتە شىمكەنت قالاسىنىڭ اكىمى مۇرات ايتەنوۆ تە بەينەروليككە بايلانىستى ءوز پىكىرىن ءبىلدىردى.
– مۇمكىن دارىگەرلەر كىنالى ەمەس تە بولار. ويتكەنى جادەل جاردەم قىزمەتى بويىنشا شاقىرتۋلار كەيدە سايابىرسىپ، كەيدە كۇرت ءوسىپ كەتەدى. وسىلاي شاقىرتۋ تىم كوبەيگەن جاعدايدا بولعان جايتتى حالىق دۇرىس تۇسىنبەي، «شىمكەنت قالاسىنداعى اۋرۋحانالار ناۋقاستارعا مەديتسينالىق كومەك كورسەتە الماي وتىر» دەپ دۇرلىگۋدە. بىراق الەۋمەتتىك جەلىلەردە تاراپ جاتقان بۇل اقپاراتتار قيسىنعا كەلمەيدى. سوندىقتان، حالىققا دۇرىس اقپاراتتار تاراتۋعا تىرىسامىز، – دەدى قالا اكىمى.
بريفينگ سوڭىندا شىمكەنت قالالىق جەدەل جاردەم كورسەتۋ ستانتسياسى باس دارىگەرىنىڭ ورىنباسارى شولپان وسپانوۆا باق وكىلدەرى تاراپىنان بەينەروليك توڭىرەگىندە قويىلعان ساۋالدارعا جاۋاپ بەردى.
– بەينەروليك بويىنشا ايتسام، بۇل جاعدايدا جەدەل جاردەم كومەك كورسەتەتىن قىزمەتكەرلەردىڭ جىبەرگەن قاتەلىگى بار. بۇگىندە اتالعان جايت جونىندە كىنالىلەر انىقتالۋ ۇستىندە جانە ولارعا شارا قولدانىلادى. وسى رەتتە الەۋمەتتىك جەلىلەردە شىمكەنت قالاسىنداعى مەديتسينالىق قىزمەت كورسەتۋ ماماندارىنىڭ قىزمەتى بويىنشا تاراپ جاتقان كەلەڭسىز اقپاراتتاردىڭ جالعان ەكەنىن جەتكىزگىم كەلەدى، – شولپان قابىلقىزى.
شىمكەنت
