Şyǧys Qazaqstannyŋ äkımı Danial Ahmetov aimaqta medisina salasy qalai damyp jatqanyn aitty, dep habarlaidy QazAqparat tılşısı.
Äkımnıŋ aituynşa, aldaǧy jyldary Semeidegı jedel medisinalyq kömek auruhanasy JCI halyqaralyq standartyna säikestendırıledı. Ol sondai-aq, öŋırdegı eldımekenderde kardiologiialyq ortalyqtar aşylyp jatqanyn atap öttı.
«Medisina sapasy - zamanǧa sai jabdyqtardy igerıp, satyp alu, filialdardy aşyp, medisinalyq ūiymdardyŋ halyqaralyq standartqa köşırıluımen esepteledı. Sonymen qatar, bız tek jetekşı aimaqtyq klinikalardy damytudy maqsat tūtyp otyrǧan joqpyz. Respublikada bırınşı bolyp ekı audan ortalyǧynda - Aiagöz ben Altaida insult ortalyǧyn aştyq. Tūrǧyndar aldymen jaŋa halyqaralyq standarttardyŋ ne ekenın kördı. Tört aidyŋ ışınde bız sol eldımekenderde kardiologiialyq ortalyqtardy aşamyz. Artynşa Aiagöz men Altaida şuntty operasiialar jasalady», - dedı Şyǧys Qazaqstan oblysynyŋ äkımı OKQ-da ötken baspasöz mäslihatynda.
Danial Ahmetov sonymen qatar, aimaqta Nūr-Sūltan men Almatyda ornalasqan jetekşı medisinalyq ortalyqtardyŋ filialdaryn aşu qajettıgın atap öttı.
«Ekı-üş qaladaǧy joǧary tehnologiialyq ortalyqtarǧa süienetın bolsaq, progressivtı medisinany damyta almaimyz. Bız Semei qalasyndaǧy auruhanada travmatologiia institutynyŋ filialyn ūiymdastyrdyq. Öskemende kardiologiialyq ortalyq saludamyz. Jaqyn arada Semei qalasynda Neirohirurgiia institutynyŋ filialy aşylady», - dedı äkım.
«Adyrna» portaly
Ūqsas jaŋalyqtar
