دانيال احمەتوۆ شىعىس قازاقستان وبلىسىندا بىردە-ءبىر اۋدان اشىلمايتىنىن مالىمدەدى دەپ حابارلايدى inbusiness.kz سايتى.
ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا باق وكىلدەرىنىڭ ساۋالدارىنا جاۋاپ بەرگەن شقو اكىمى دانيال احمەتوۆ وڭىردەگى شەكارالىق اۋدانداردى دامىتۋدىڭ باعدارلاماسى جاسالاتىنىن ايتتى. «مارقاكولدىڭ اقساقالدارى ماعان كەلدى. 45 ادام بولىپ، سۇراقتار قويدى. مەن ول كىسىلەرگە: «تۋىسقاندارىم، ايتىڭىزدارشى، 45 كىسى كەلدىڭىزدەر. ارالارىڭىزدا قانشا كىسى كۇرشىم مەن مارقاكولدە تۇرادى؟»، – دەگەن ءبىر عانا سۇراق قويدىم. قالاي ويلايسىزدار، قانشا كىسى مارقاكولدەن كەزدەسۋگە كەلگەن؟ ءبىر كىسى عانا. قالعانىنىڭ ءبارى وسكەمەن مەن سەمەيدە تۇرىپ جاتقانىنا 20 جىلدان اسقان. بىراق تا وتە دۇرىس ماسەلە كوتەرىلدى. سول سەبەپتەن مەن ارنايى كوميسسيا قۇردىم. قازىر بەس اۋداندا جۇمىس ىستەپ ءجۇرمىز. ءۇرجار، تارباعاتاي، زايسان، كاتونقاراعاي، كۇرشىم اۋداندارىنا ارنايى باعدارلاما جاسايمىز. الەۋمەتتىك جۇمىستاردى كوتەرىپ، قوسىمشا قارجى بولەمىز. وسى جۇمىس اياقتالعاننان كەيىن ونداعى حالىقپەن ءوزىم كەزدەسەمىن. اقىرعى سۇراق. ءبىر دە ءبىر جاڭا اۋدان اشپايمىز. نەگە دەسەڭىز، اۋدان اشقاندا تەك قانا جاڭا جۇمىسكەرلەردىڭ باسپانا ماسەلەسىن شەشۋ ءۇشىن 9 ملرد تەڭگە كەتەدى. سوندا نە كەرەك حالىققا؟ جاڭا شەنەۋنىكتەر مە؟ وعان قاراعاندا ارنايى باعدارلاما كەرەك. كەلگەن 45 اقساقالدىڭ ءبارى مەنىمەن كەلىستى. ءبىز وسى جوبانى ىسكە سالامىز»، – دەدى شقو اكىمى.
وبلىس اكىمىنىڭ بۇل سوزىنە بەلگىلى ساياساتتانۋشى ەرلان سايىروۆ الەۋمەتتىك جەلىدە ءوز كوزقاراسىن ءبىلدىردى. ساياساتتانۋشىنىڭ ءوز فەيسبۋك پاراقشاسىنداعى ءسوزىن قاز-قالپىندا بەرىپ وتىرمىز.
"ايتپاساڭ ءسوزىڭ اتاسى ولەدى"...
وكىنىشتى. ەرتەڭ، وسىناۋ قيعاش قادامدارىنا قاتىستى، اتتەگەن-اي ايتاتىندىعى انىق. ويتكەنى، دانيال احمەتوۆ ءتارىزدى تاجىريبەلى، شارۋاشىلىقتى دوڭگەلەتۋگە قابىلەتتى دەيتىن ازاماتتار قاراكوزدىڭ الەۋمەتتىك پسيحولوگياسىن تۇسىنبەيدى، حالىقتىڭ شىنايى مۇڭ-مۇقتاجىنا "قىرىن" قارايتىندىعىن تاعى دا كورسەتتى. "قىزىل ديرەكتور" دەگەندەر بولعان كەزىندە، كەڭەس زامانىندا ءىرى شارۋاشىلىقتاردى باسقارىپ، جوسپارلى ەكونوميكا كەزىندە قىزمەت ىستەپ، ۇجىمنىڭ مۇددەلەرىمەن كەلىسپەي شەشىم قابىلدايتىن "قىرسىق" باسشىلار. حالىقتىڭ ايتقانىن ىستەسە، "تاعىنان" ءتۇسىپ قالاتىنداي اسەر الادى، ولار. وزدەرى تاكاپار، مەنمەنشىل، حالىققا مەنسىنبەگەن كوزقاراسپەن قارايدى. شقو-نىڭ باسشى دا سول "قىزىل ديرەكتورلىققا" سالىنىپ وتىرعان ءتارىزدى. وزدەرى باسقارىپ وتىرعان جەردىڭ تاريحىندا، حالقىنىڭ مىنەز-قۇلقىن دا تۇسىنبەيدى، تۇسىنۋگە پەيىل دە تانىتپايدى. بىلە-بىلگەن ادامعا شىعىس قازاقستاننىڭ كاتون-قاراعاي، مارقاكول، تارباعاتاي اۋداندارى قازاق حالقىنا ءبىزدىڭ اتا-بابامىزدىڭ قانى، ولاردىڭ قانشاماسىنىڭ قيىلىپ كەتكەن ءومىرى ارقىلى كەلگەن، ول جەرلەر ءۇشىن بۇكىل قازاق قانقۇيلى سوعىسا وتىرىپ، يەلەنگەن. سول اتا-بابامىزدىڭ ەرلىگى، ورلىگى، بىزگە دەگەن قامقورلىعىنىڭ ارقاسىندا كەلگەن جەرلەردەن بۇگىندە، ەل امان، جۇرت تىنىشتا حالىق ۇدەرە كوشىپ جاتىر. نەلىكتەن؟ حالىق ۇكىمەتكە، مەملەكەتكە جاقىن بولعىسى كەلەدى. سوندىقتان ورتالىققا وسكەمەن، سەمەي، الماتى، نۇر-سۇلتانعا اۋىپ جاتىر. شەكارا بوس قالدى. سول شەكاراعا بەكەت رەتىندە، اۋدانداردى قالىپقا كەلتىرۋ جونىندەگى جەرگىلىكتى حالىقتىڭ "زار-ايعايىن" وبلىس اكىمى دانيال احمەتوۆ ەلەگىسى دە كەلمەيدى. حالىقتىڭ جان-ءتانىن تۇسىنبەۋشىلىك دەگەنىمىز وسى. "حالىقتى تىڭداۋعا قابىلەتتى مەملەكەت" بۇل شەنەۋىكتەر ءۇشىن ءجاي عانا ءسوز. ەشقانداي قۇندىلىعى، ءمانى جوق. بۇل ماسەلە تەك وبلىستىق دەڭگەيدە ەمەس ەلىمىزدىڭ ۇلتتىق قاۋىپسىزدىگىنە تىكەلەي اسەرى بار رەسپۋبليكالىق ماسەلە. سوندىقتان قازاقستان رەسپۋبليكاسىنىڭ ۇكىمەتىنە، پارلامەنت دەپۋتاتتارىنا وسى ماسەلەنى مەملەكەتتىك مۇددە تۇرعىسىنان قاراستىرۋ ءۇشىن ۇندەۋ جاريالايمىن! بۇل ەلىمىزدىڭ تەرريتوريالىق تۇتاستىعىنىڭ نەگىزگى ماسەلەسى.
"ارعىماققا ءمىندىم دەپ، ارتقى توپتان اداسپا. كۇنىندە ءوزىم بولدىم دەپ، كەڭ پەيىلگە تالاسپا!" دەگەن قاناتتى ءسوزدى بۇل كىسىلەرگە كىم ايتار ەكەن؟
ال، ءدال وسى كەزدە، حالىق بوسىپ كوشىپ جاتىر، اقساقال مۇڭىن ايتار ادام تاپپاي سابىلىپ، وبلىس باسشىلىعىنىڭ تابالدىرىعىندا ءجۇر، اۋداندار توقىراپ جاتىر. بۇگىنگى كۇننىڭ شىندىعى وسى.
وبلىس باسشىسىندا پەيىل بولماسا، حالىقتا قانداي مەيىر بولماق؟
ارتى دۇرىس بولسىن...
"ادىرنا" ۇلتتىق پورتالى
