Halyqtyń "zar-aıǵaıyn" Danıal Ahmetov elegisi de kelmeıdi

4417
Adyrna.kz Telegram

Danıal Ahmetov Shyǵys Qazaqstan oblysynda birde-bir aýdan ashylmaıtynyn málimdedi dep habarlaıdy inbusiness.kz saıty.

Ortalyq kommýnıkaııalar qyzmetinde ótken baspasóz máslıhatynda BAQ ókilderiniń saýaldaryna jaýap bergen ShQO ákimi Danıal Ahmetov óńirdegi shekaralyq aýdandardy damytýdyń baǵdarlamasy jasalatynyn aıtty.  «Marqakóldiń aqsaqaldary maǵan keldi. 45 adam bolyp, suraqtar qoıdy. Men ol kisilerge: «Týysqandarym, aıtyńyzdarshy, 45 kisi keldińizder. Aralaryńyzda qansha kisi Kúrshim men Marqakólde turady?», – degen bir ǵana suraq qoıdym. Qalaı oılaısyzdar, qansha kisi Marqakólden kezdesýge kelgen? Bir kisi ǵana. Qalǵanynyń bári Óskemen men Semeıde turyp jatqanyna 20 jyldan asqan. Biraq ta óte durys másele kóterildi. Sol sebepten men arnaıy komıssııa qurdym. Qazir bes aýdanda jumys istep júrmiz. Úrjar, Tarbaǵataı, Zaısan, Katonqaraǵaı, Kúrshim aýdandaryna arnaıy baǵdarlama jasaımyz. Áleýmettik jumystardy kóterip, qosymsha qarjy bólemiz. Osy jumys aıaqtalǵannan keıin ondaǵy halyqpen ózim kezdesemin. Aqyrǵy suraq. Bir de bir jańa aýdan ashpaımyz. Nege deseńiz,  aýdan ashqanda tek qana jańa jumyskerlerdiń baspana máselesin sheshý úshin 9 mlrd teńge ketedi.  Sonda ne kerek halyqqa? Jańa sheneýnikter me? Oǵan qaraǵanda arnaıy baǵdarlama kerek. Kelgen 45 aqsaqaldyń bári menimen kelisti. Biz osy jobany iske salamyz», – dedi ShQO ákimi.

Oblys ákiminiń bul sózine belgili saıasattanýshy Erlan Saıyrov áleýmettik jelide óz kózqarasyn bildirdi. Saıasattanýshynyń óz Feısbýk paraqshasyndaǵy sózin qaz-qalpynda berip otyrmyz.

"Aıtpasań sóziń atasy óledi"...
Ókinishti. Erteń, osynaý qıǵash qadamdaryna qatysty, áttegen-aı aıtatyndyǵy anyq. Óıtkeni, Danıal Ahmetov tárizdi tájirıbeli, sharýashylyqty dóńgeletýge qabiletti deıtin azamattar qarakózdiń áleýmettik psıhologııasyn túsinbeıdi, halyqtyń shynaıy muń-muqtajyna "qyryn" qaraıtyndyǵyn taǵy da kórsetti. "Qyzyl dırektor" degender bolǵan kezinde, keńes zamanynda iri sharýashylyqtardy basqaryp, josparly ekonomıka kezinde qyzmet istep, ujymnyń múddelerimen kelispeı sheshim qabyldaıtyn "qyrsyq" basshylar. Halyqtyń aıtqanyn istese, "taǵynan" túsip qalatyndaı áser alady, olar. Ózderi tákapar, menmenshil, halyqqa mensinbegen kózqaraspen qaraıdy. ShQO-nyń basshy da sol "qyzyl dırektorlyqqa" salynyp otyrǵan tárizdi. Ózderi basqaryp otyrǵan jerdiń tarıhynda, halqynyń minez-qulqyn da túsinbeıdi, túsinýge peıil de tanytpaıdy. Bile-bilgen adamǵa Shyǵys Qazaqstannyń Katon-Qaraǵaı, Marqakól, Tarbaǵataı aýdandary qazaq halqyna bizdiń ata-babamyzdyń qany, olardyń qanshamasynyń qıylyp ketken ómiri arqyly kelgen, ol jerler úshin búkil qazaq qanquıly soǵysa otyryp, ıelengen. Sol ata-babamyzdyń erligi, órligi, bizge degen qamqorlyǵynyń arqasynda kelgen jerlerden búginde, el aman, jurt tynyshta halyq údere kóship jatyr. Nelikten? Halyq Úkimetke, memleketke jaqyn bolǵysy keledi. Sondyqtan ortalyqqa Óskemen, Semeı, Almaty, Nur-Sultanǵa aýyp jatyr. Shekara bos qaldy. Sol shekaraǵa beket retinde, aýdandardy qalypqa keltirý jónindegi jergilikti halyqtyń "zar-aıǵaıyn" oblys ákimi Danıal Ahmetov elegisi de kelmeıdi. Halyqtyń jan-tánin túsinbeýshilik degenimiz osy. "Halyqty tyńdaýǵa qabiletti memleket" bul sheneýikter úshin jáı ǵana sóz. Eshqandaı qundylyǵy, máni joq. Bul másele tek oblystyq deńgeıde emes elimizdiń ulttyq qaýipsizdigine tikeleı áseri bar respýblıkalyq másele. Sondyqtan Qazaqstan Respýblıkasynyń Úkimetine, Parlament depýtattaryna osy máseleni memlekettik múdde turǵysynan qarastyrý úshin úndeý jarııalaımyn! Bul elimizdiń terrıtorııalyq tutastyǵynyń negizgi máselesi.
"Arǵymaqqa mindim dep, artqy toptan adaspa. Kúninde ózim boldym dep, keń peıilge talaspa!" degen qanatty sózdi bul kisilerge kim aıtar eken?
Al, dál osy kezde, halyq bosyp kóship jatyr, aqsaqal muńyn aıtar adam tappaı sabylyp, oblys basshylyǵynyń tabaldyryǵynda júr, aýdandar toqyrap jatyr. Búgingi kúnniń shyndyǵy osy.
Oblys basshysynda peıil bolmasa, halyqta qandaı meıir bolmaq?
Arty durys bolsyn...

"Adyrna" ulttyq portaly

Pikirler