حالقىمىز الىمساقتان «ءبىرىنشى بايلىق – دەنساۋلىق» دەپ تەگىن ايتپاعان. ون ەكى مۇشەڭ ءبۇتىن، دەنىڭنىڭ ساۋ بولعانىنا تەڭ كەلەر ەشتەڭە جوق شىعار، ءسىرا! دەسە دە، قوعامدا اساۋ تاعدىردىڭ جازۋىمەن مۇمكىندىكتەرى شەكتەۋلى بولا تۇرا، ءور مىنەزدىڭ ارقاسىندا ومىرگە قۇشتار، ەڭبەكقور جانداردى كورىپ كوز قۋانادى.
بۇگىندە جامبىل وبلىسىندا مۇمكىندىگى شەكتەۋلى ازاماتتاردىڭ مۇددەلەرىن قورعاپ، ولارعا جان-جاقتى قولداۋ كورسەتەتىن «اسار»، «ناقتى كومەك»، «اسۋ»، «نۇر قايىرىم» قوعامدىق بىرلەستىكتەرى جۇمىس ىستەيدى.
اتالعان قوعامدىق بىرلەستىكتەر وبلىس اكىمدىگى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا قاراستى مۇگەدەكتەردى بەيىمدەۋ جانە وڭالتۋ ورتالىعىمەن تىعىز بايلانىستا دەۋگە بولادى. بۇل بىرلەستىكتەر مۇگەدەكتەردىڭ مۇڭ-مۇقتاجىن، قوردالانعان ماسەلەلەرىن شەشۋ ماقساتىندا اتقارۋشى بيلىك وكىلدەرىنىڭ قاتىسۋىمەن القالى باسقوسۋلار ۇيىمداستىرىپ تۇرادى.
وسىناۋ قوعامدىق بىرلەستىكتەردىڭ مۇرىندىق بولۋىمەن كەمتار جاندار ارنايى ءبىلىم الىپ، ءتىپتى كەيبىرى تۇراقتى جۇمىسقا ورنالاسۋ مۇمكىندىگىنە دە يە بولىپ وتىر. ماسەلەن، «ناقتى كومەك» قوعامدىق بىرلەستىگى وتكەن جىلى 40 مۇگەدەك جاندى تىگىنشىلىك، توقىما توقۋ، قۇراق قۇراۋ كاسىپتەرىنە وقىتىپ، ارنايى كۋرس بىتىرگەنى تۋرالى سەرتيفيكات بەرسە، بيىل بۇل ءۇردىس ءوز جالعاسىن تاپقان. ال «نۇر قايىرىم» قوعامدىق بىرلەستىگى مۇمكىندىگى شەكتەۋلى جانداردى ۇيالى تەلەفون جوندەۋ شەبەرلىگىنە باۋلىپ وتىرعانى دا كوڭىل مارقايتادى.
دەيتۇرعانىمەن، «ناقتى كومەك» قوعامدىق بىرلەستىگىنىڭ ءتورايىمى شولپان احمەتوۆا ارنايى ءبىلىم كۋرستارىن اياقتاپ، قولدارىنا سەرتيفيكات العان مۇگەدەكتەرگە جۇمىس تابۋ قيىن ەكەنىن جاسىرمايدى.
«ءبىز ءوزىمىز وتكىزەتىن جيىنعا مىندەتتى تۇردە باسقارما مەن «نۇر وتان» پارتياسى وبلىستىق فيليالىنان وكىلدەرىن، بىرنەشە كاسىپورىنداردىڭ باسشىلارىن شاقىرامىز. باستى ماقساتىمىز – مۇمكىندىگى شەكتەۋلى جانداردى تۇراقتى جۇمىسقا ورنالاستىرۋ»، – دەيدى ول.
ال كەيبىر مالىمەتتەرگە سۇيەنسەك، بىلتىر 300-دەن استام مۇگەدەك جاندار ماماندىققا بەيىمدەيتىن كۋرستاردان ءوتىپ، بۇل ماقساتتا وبلىستىق بيۋدجەتتەن 100 ميلليون تەڭگە قاراجات بولىنگەن. ناتيجەسىندە وڭىردە 610 مۇگەدەك ەڭبەكپەن قامتىلىپ، ونىڭ 300-ءى تۇراقتى جۇمىس تاپقان.
سونداي-اق، بىلتىر تارازدا مۇمكىندىگى شەكتەۋلى بالالاردى ەمدەۋگە ارنالعان يپپوتەراپيا كلۋبىن اشىلعان بولاتىن. يپپوتەراپيا – اتقا مىنگىزىپ ەمدەۋ، ياعني ات ءبيوورىسى تسەرەبرالدىق سال اۋرۋمەن اۋىراتىن ادامدار ءۇشىن پايدالى. اتتىڭ اياعى بالانىڭ ءجۇرىسىن ءجىتى قاداعالاپ ءارى ەمدەيتىنىن العا تارتادى «اسار» مۇگەدەكتەرمەن جۇمىستى ۇيىمداستىرۋ ۇيىمىنىڭ توراعاسى رۋسلان تولەگەنوۆ.
تاعى ءبىر اتاپ وتەتىن جايت، قوعامدىق بىرلەستىكتەردىڭ ۇيىمداستىرۋىمەن مۇمكىندىگى شەكتەۋلى ازاماتتار اراسىندا سپارتاكيادا تۇراقتى تۇردە وتكىزىلىپ تۇرادى. سونىڭ ءبىرى قازان ايىنىڭ ەكىنشى جەكسەنبىسى ياعني مۇگەدەكتەر كۇنىنە وراي وتكىزلىگەن.
ورتالىق ستاديوندا وتكەن بۇل سپورتتىق ءىس-شاراعا 120-دام استام مۇمكىندىك شەكتەۋلى جاندار قاتىسىپ، سپورتتىڭ 6-تۇرىنەن ءوزارا سايىسقا تۇسكەن.
اتاپ ايتقاندا، 100 مەترگە مۇگەدەك اربادا جارىسۋ، قول كۇرەسى، دويبى، شاحمات، توعىزقۇمالاق جانە دارتس ويىندارى تاعى دا باسقالارى بار.
«جارىستىڭ ماقساتى - مۇمكىندىگى شەكتەۋلى ازاماتتاردىڭ قۇقىقتارىن ساقتاۋ، الەۋمەتتىك جاعدايلارىن جاقسارتۋ جانە سالاۋاتتى ءومىر سالتىن ۇستانۋعا ايرىقشا نازار اۋدارۋ»،- دەيدى ۇيىمداستىرۋشىلار.
تارتىسقا تولى وتكەن سپورتتىق جيىندا بارلىق قاتىسۋشىلار سىي-سياپاتپەن ماراپاتتالدى. مۇمكىندىگى شەكتەۋلى جانداردىڭ جارىسىنا ريو-دە-جانەيرو پاراوليمپياداسى ويىندارىنىڭ جەڭىمپازى، داڭقتى سپورتشى زۋلفيا گابيدۋلينا دا تۇراقتى قاتىسىپ تۇرادى.
بۇعان قوسا، مۇگەدەكتەردىڭ مۇددەسىن كوزدەرىنىڭ قاراشىعىنداي قورعاپ جۇرگەن قوعامدىق بىرلەستىكتەر، ولاردىڭ قولدارىنان شىققان ونەر بۇيىمدارىنىڭ كورمەسىن دە ۇدايى كوپشىلىك نازارىنا ۇسىنىپ كەلەدى.
«ادىرنا»
ۇلتتىق پورتالى
