Jambylda múgedekterge járdemdesetin birneshe uıym jumys isteıdi

2908
Adyrna.kz Telegram

Halqymyz álimsaqtan «birinshi baılyq – densaýlyq» dep tegin aıtpaǵan. On eki músheń bútin, denińniń saý bolǵanyna teń keler eshteńe joq shyǵar, sirá! Dese de, qoǵamda asaý taǵdyrdyń jazýymen múmkindikteri shekteýli bola tura, ór minezdiń arqasynda ómirge qushtar, eńbekqor jandardy kórip kóz qýanady.

Búginde Jambyl oblysynda múmkindigi shekteýli azamattardyń múddelerin qorǵap, olarǵa jan-jaqty qoldaý kórsetetin «Asar», «Naqty kómek», «Asý», «Nur qaıyrym» qoǵamdyq birlestikteri jumys isteıdi.

Atalǵan qoǵamdyq birlestikter oblys ákimdigi jumyspen qamtýdy úılestirý jáne áleýmettik baǵdarlamalar basqarmasyna qarasty múgedekterdi beıimdeý jáne ońaltý ortalyǵymen tyǵyz baılanysta deýge bolady. Bul birlestikter múgedekterdiń muń-muqtajyn, qordalanǵan máselelerin sheshý maqsatynda atqarýshy bılik ókilderiniń qatysýymen alqaly basqosýlar uıymdastyryp turady.

Osynaý qoǵamdyq birlestikterdiń muryndyq bolýymen kemtar jandar arnaıy bilim alyp, tipti keıbiri turaqty jumysqa ornalasý múmkindigine de ıe bolyp otyr.  Máselen, «Naqty kómek» qoǵamdyq birlestigi ótken jyly 40 múgedek jandy tiginshilik, toqyma toqý, quraq quraý kásipterine oqytyp, arnaıy kýrs bitirgeni týraly sertıfıkat berse, bıyl bul úrdis óz jalǵasyn tapqan. Al  «Nur qaıyrym» qoǵamdyq birlestigi múmkindigi shekteýli jandardy uıaly telefon jóndeý sheberligine baýlyp otyrǵany da kóńil marqaıtady.

Deıturǵanymen,  «Naqty kómek» qoǵamdyq birlestiginiń tóraıymy Sholpan Ahmetova arnaıy bilim kýrstaryn aıaqtap, qoldaryna sertıfıkat alǵan  múgedekterge jumys tabý qıyn ekenin jasyrmaıdy.

«Biz ózimiz ótkizetin jıynǵa mindetti túrde basqarma men «Nur Otan» partııasy oblystyq fılıalynan ókilderin, birneshe kásiporyndardyń basshylaryn shaqyramyz. Basty maqsatymyz – múmkindigi shekteýli jandardy turaqty jumysqa ornalastyrý», – deıdi ol.

Al keıbir málimetterge súıensek, byltyr 300-den astam múgedek jandar mamandyqqa beıimdeıtin kýrstardan ótip, bul maqsatta oblystyq bıýdjetten 100 mıllıon teńge qarajat bólingen. Nátıjesinde óńirde 610 múgedek eńbekpen qamtylyp, onyń 300-i turaqty jumys tapqan.

Sondaı-aq, byltyr Tarazda múmkindigi shekteýli balalardy emdeýge arnalǵan ıppoterapııa klýbyn ashylǵan bolatyn. Ippoterapııa – atqa mingizip emdeý, ıaǵnı at bıoórisi erebraldyq sal aýrýmen aýyratyn adamdar úshin paıdaly. Attyń aıaǵy balanyń júrisin jiti qadaǵalap ári emdeıtinin alǵa tartady «Asar» múgedektermen jumysty uıymdastyrý uıymynyń tóraǵasy Rýslan Tólegenov.

Taǵy bir atap ótetin jaıt, qoǵamdyq birlestikterdiń uıymdastyrýymen múmkindigi shekteýli azamattar arasynda spartakıada turaqty túrde ótkizilip turady. Sonyń biri qazan aıynyń ekinshi jeksenbisi ıaǵnı múgedekter kúnine oraı ótkizligen.

Ortalyq stadıonda ótken bul sporttyq is-sharaǵa 120-dam astam múmkindik shekteýli jandar qatysyp, sporttyń 6-túrinen ózara saıysqa túsken.

Atap aıtqanda, 100 metrge múgedek arbada jarysý, qol kúresi, doıby, shahmat, toǵyzqumalaq jáne darts oıyndary taǵy da basqalary bar.

«Jarystyń maqsaty - múmkindigi shekteýli azamattardyń quqyqtaryn saqtaý, áleýmettik jaǵdaılaryn jaqsartý jáne salaýatty ómir saltyn ustanýǵa aıryqsha nazar aýdarý»,- deıdi uıymdastyrýshylar.

Tartysqa toly ótken sporttyq jıynda barlyq qatysýshylar syı-sııapatpen marapattaldy. Múmkindigi shekteýli jandardyń jarysyna Rıo-De-Janeıro Paraolımpıadasy oıyndarynyń jeńimpazy, dańqty sportshy Zýlfııa Gabıdýlına da turaqty qatysyp turady.

Buǵan qosa, múgedekterdiń múddesin kózderiniń qarashyǵyndaı qorǵap júrgen qoǵamdyq birlestikter, olardyń qoldarynan shyqqan óner buıymdarynyń kórmesin de udaıy kópshilik nazaryna usynyp keledi.

«ADYRNA»

ulttyq portaly

Pikirler