ورالدا پوليتسيا كولىگى ادام قاققان جەردى تۇسىرگەن بلوگەرگە ايىپ تاقتى

682
پوليتسيا كولىگى قاققان لاريسا بەيسوۆانىڭ سۋرەتىن اۋرۋحاناعا ونىڭ جاعدايىن بىلۋگە كەلگەن تۋىستارى سمارتفوننان كورسەتىپ تۇر. ورال، 19 قاراشا 2019 جىل.

18 قاراشا كۇنى كەشكە باتىس قازاقستان وبلىسىنىڭ ورتالىعى ورال قالاسىندا پوليتسيا ءپاترۋلىنىڭ كولىگى كوشەنىڭ جاياۋ ادام وتەتىن تۇسىندا 21 جاستاعى بويجەتكەندى قاعىپ كەتكەن. دارىگەرلەر جەدەل جاردەم كولىگىمەن اۋرۋحاناعا جەتكىزىلگەن لاريسا بەيسوۆانىڭ جاعدايى اۋىر دەيدى. وبلىستىق دەنساۋلىق ساقتاۋ باسقارماسىنىڭ دەرەگى بويىنشا، بويجەتكەننىڭ باس سۇيەگى زاقىمدانىپ، ميى شايقالعان. اۋرۋحانادا ەس-ءتۇسسىز جاتقان قىزعا تۋىستارىن ءالى جولىقتىرماعان.

سەيسەنبىگە قاراعان ءتۇنى جول اپاتى بولعان جەرگە بارعان جەرگىلىكتى بلوگەر ايبولات بوكەنوۆ كورگەنىن سمارتفونعا تۇسىرگەن. بلوگەردىڭ سوزىنشە، ول ورالدىڭ زاچاگانسك دەپ اتالاتىن اۋدانىنا جەتكەن كەزدە زارداپ شەككەن قىزدى جەدەل جاردەم الىپ كەتكەن. الگى جەردە پوليتسيا قىزمەتكەرلەرى تۇرعان. بوكەنوۆتىڭ ايتۋىنشا، ول اپات بولعان جەرگە بارعان وبلىستىق پوليتسيا دەپارتامەنتىنىڭ باستىعى ماحسۇتحان ابلازيموۆقا سۇراق قويعان. ءوزىن تۇسىرۋگە تىيىم سالعان پوليتسيا شەنەۋنىگى بلوگەردىڭ سمارتفونىن قولىنان جۇلىپ الىپ، قاراماعىنداعى قىزمەتكەرلەرىنە اپات بولعان جەردە تۇسىرىلگەن جازبالاردى ءوشىرىپ تاستاۋدى بۇيىرعان. بوكەنوۆتى اۋەلى مەديتسينالىق تەكسەرۋدەن وتكىزۋگە اپارعان، كەيىن زاچاگانسك پوليتسيا بولىمشەسىنە جەتكىزىپ، ۇستىنەن "پوليتسيا قىزمەتكەرىنىڭ تالابىنا باعىنباۋ" بابى بويىنشا اكىمشىلىك قۇقىقبۇزۋشىلىق تۋرالى حاتتاما تولتىرعان. "مەن بوگەت جاساعان جوقپىن، سۇحبات الماقشى بولدىم" دەدى ازاتتىققا بوكەنوۆ 19 قاراشادا.

سەيسەنبى كۇنى تۇستەن كەيىن وبلىستىق پوليتسيا دەپارتامەنتى وزىنە قاراستى قىزمەت كولىگى جول اپاتىنا ۇشىراعانىن راستادى. دەپارتامەنتتىڭ ءباسپاسوز قىزمەتىنە سىلتەگەن Tengrinews.kz سايتى كولىكتى باسقارعان پوليتسيا اعا لەيتەنانتى بايمۇقاشەۆقا قاتىستى قىلمىستىق كودەكستىڭ 345-بابى ("جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋ") بويىنشا تەرگەۋ باستالعانىن حابارلادى.

بۇعان قوسا پوليتسيا دەپارتامەنتى بلوگەر ايبولات بوكەنوۆتىڭ "بەيبەرەكەت قوزعالىپ، ءوزى مەن وزگە ادامدارعا قاۋىپ توندىرگەنىن، پوليتسيا قىزمەتكەرلەرىنىڭ ءىس-قيمىلىن تۇسىرمەكشى بولىپ جول ۇستىنە شىعىپ كەتكەنىن" ايتىپ، "تەرگەۋگە كەدەرگى كەلتىردى" دەپ تۇسىندىرگەن. پوليتسيا وكىلدەرى بوكەنوۆ ەسكەرتۋدى ەلەمەي، "اگرەسسيا تانىتقان" جانە مەديتسينالىق تەكسەرۋ قورىتىندىسى كورسەتكەندەي، "ماساڭداۋ كۇيدە بولعان" دەيدى.

"ازاتتىق" راديوسى

پىكىرلەر