جاستار ەسىرتكى ساتۋشىلاردان ءالى دە زارداپ شەگۋدە

137

تاۋەلسىزدىكتىڭ العاشقى جىلدارىندا ناشاقورلىققا سالىنعان جاستار تۋرالى كوپ ەستيتىنبىز. سوندىقتان دا ماعان ەسىرتكىگە تاۋەلدىلىكتەن ءبىرجولا قۇتىلعان سياقتى بولىپ كورىنەدى. ويتكەنى اينالامىزداعى تانىس-تامىرلاردان ناشاقورلىققا قۇمارتقاندار كەزدەسپەيتىن ەدى. ايتسە دە، «قوي تەرىسىن جامىلعان قاسقىرلار» ءالى دە بولسا ارامىزدا بار كورىنەدى.

جامبىل وبلىسىندا «وڭتۇستىك-ارىلۋ» قوعامدىق قورىنىڭ پرەزيدەنتى داۋرەن باعجانوۆ ناركومانيا ماسەلەسەسىمەن كوپتەن بەرى اينالىسىپ كەلەدى. ونىڭ ايتۋىنشا، وبلىستىق ناركوديسپانسەردە 9 مىڭعا جۋىق ازامات تىركەلگەن.

«قازىرگى كەزدە ەسىرتكىگە تاۋەلدىلىكتىڭ فورماسى وزگەرگەن. نوركوديلەرلەر ينتەرنەت ارقىلى جاستارعا ەسىرتكىسىن تاراتىپ جاتىر. ارينە ۇقك مەن وبلىستىق پوليتسيا دەپارتامەنتى اۋقىمدى جۇمىستار اتقارۋدا. ونىڭ ۇستىنە مەملەكەت باسشىسى قاسىم-جومارت توقاەۆ ەسىرتكى بويىنشا جازانى قاتاڭداتۋدى تاپسىردى. الايدا بۇل دەرتپەن قوعام بولىپ كۇرەسپەسەك، قۇقىق قورعاۋ ورگاندارى مەن ءبىز سياقتى ۇيىمداردىڭ شاماسى ناقتى ناتيجەگە جەتۋگە جەتپەيدى شىن مانىسىندە پسيحولوگيالىق ناركومانيا دەگەن وتە قاۋىپتى دەرت بولىپ وتىر. باسقا ناركومانيا بولسا, ونىڭ بەتىن قايتارۋعا بولادى. ال پسيحولوگيالىق ناركومانياعا شالدىققان ادام 2-3 جىلدان ارتىق ءومىر سۇرە المايدى»، – دەيدى ول.

داۋرەن باعجانوۆ ەلىمىزدىڭ ۇلى جىبەك بويىندا ورنالاسۋىنىڭ ارتىقشىلىعىمەن قاتار، كەمشىلىگى دە بار ەكەنىن ايتادى. ماسەلەن ءبىزدىڭ تەرريتوريامىز ارقىلى اۋعانستاننان رەسەي مەن قىتايعا ەسىرتكى زاتتارى وتەدى. وكىنىشكە قاراي وسى ەسىرتكى زاتتارىنىڭ بەلگىلى بولىگى ەلىمىزدە قالىپ قوياتىن كورىنەدى.

«قازىرگى تاڭدا ناشاقورلىقتان ەمدەيتىن ورتالىق الماتى مەن پاۆلودار قالاسىندا عانا بار. ءبىزدىڭ  كاسىبي مىندەتىمىز – ەسىرتكى زاتتارىنا تاۋەلدىلەردى انىقتاپ، ولاردى اتالعان ورتالىقتارعا جىبەرۋگە قولداۋ كورسەتۋ بولىپ وتىر. بىزگە ناشاقورلىققا سالىنعان ادامدار كەزدەسىپ قالسا نەمەسە حابارلاسسا اتالعان ورتالىقتا ەمدەلۋگە موتيۆاتسيا بەرەمىز. سۇرانىس ۇسىنىستى تۋدىرادى دەگەن بار ەمەس پە؟ مەنىڭ پوزيتسيام اۋرۋدى ەمدەگەننەن قاراعاندا الدىن العان ءجون دەگەنگە سايادى. سول سەبەپتى دە ءبىز جاستارمەن ءجيى كەزدەسىپ، ۇگىت-ناسيحات جۇمىستارىن قارقىندى تۇردە جۇرگىزىپ جاتىرمىز. ەگەر ناقتى جوسپار بويىنشا كاسىبي تۇردە جۇمىس جاسايتىن بولساق، الداعى 5-7 نەمەسە 10 جىلدا جاستاردى بۇل كەسەلگە جولامايتىنداي ەتە الامىز»، – دەيدى داۋرەن باعجانوۆ.

«ادىرنا»

ۇلتتىق پورتالى

 

 

پىكىرلەر