جامبىلدىقتار ءىستى سوتقا جەتكىزبەي شەشكەندى ءجون كورەدى

3329
Adyrna.kz Telegram

سوڭعى جىلدارى بولماشى ىسپەن سوتقا جۇگىرەتىن ازاماتتار پايدا بولدى. ءتىپتى كەيدە وتباسىلىق ۇستاق-تۇيەك شارۋالارمەن قۇقىق قورعاۋ ورگاندارىنىڭ ارىزداناتىن جاندار كەزدەسىپ قالىپ جاتادى. مىنە وسىنداي جاعداي تۋىنداي قالسا، مەدياتسيا قىزمەتىنە جۇگىنگەن ءجون.

جامبىل ولبلىسىندا ارازداسقان ازاماتتاردى جاننا ماماشەۆا  باسقاراتىن «مەديا قىزمەتكەرلەرى قاۋىمداستىعى» جاستار قوعامدىق بىرلەستىگى تاتۋلاستىرىپ ءجۇر. اتالعان قوعامدىق بىرلەستىك وبلىستىق ىشكى ساياسات باسقارماسىنىڭ مەملەكەتتىك تاپسىرىسى بويىنشا اۋليەاتا ايماعىندا ەڭبەك ەتۋدە.

قوعامدىق بىرلەستىك ءتورايىمىنىڭ ايتۋىنشا، ءىستى سوتقا دەيىن جەتكىزبەي شەشۋ وتە ماڭىزدى شارۋا بولىپ سانالادى.

«ءبىز بيىل «بىتىمگەر» جوباسى بويىنشا جۇمىس جاساپ جاتىرمىز. ياعني ارازداسقان ەكى تاراپتى سوتقا دەيىن مامىلەگە كەلتىرىپ، تاتۋلاستىرۋ باعىتىندا ەڭبەك ەتەمىز. جامبىل وبلىسى سوتىنىڭ جانىنداعى ارداگەرەر كەڭەسىنىڭ ىشىنەن بيلەر كەڭەسى قۇرىلعان بولاتىن. وڭلاسىن ەسىركەپوۆ باسقاراتىن بيلەر كەڭەسىمەن بىرلەسىپ اۋدان-اۋدانداردى ارالاپ، وقىتۋ سەمينارلارىن وتكىزدىك. بۇدان بولەك «قازاقستاندىق مەدياتورلار پالاتاسى» قوعامدىق بىرلەستىگىنىڭ باسشىسى ەلميرا ەسىمبەتوۆا ۇيىمداستىرۋىمەن 4 كۇندىك سەمينارعا قاتىستىق. نەگىزى كاسىبي مەدياتور مەن قاراپايىم مەدياتوردىڭ اراسىندا جەر مەن كوكتەي ايىرماشىلىق بار. كاسىبي مەدياتور اكىمشىلىك پەن سوتقا جالپى كەز-كەلگەن مەملەكەتتىك مەكەمەگە بارىپ جۇمىس ىستەي الادى. ماسەلەن ەڭبەك داۋلارى تۋىنداسا، مەدياتور ونى بەيبىت جولمەن سوتقا دەيىن جەتكىزبەي شەشۋگە تىرسادى. ءبىز اتقارعان جۇمىستاردىڭ ارقاسىندا جامبىل وبلىسىندا سوتقا ارىزداناتىن ادامداردىڭ سانى ايتارلىقتاي ازايدى. ەگەر دە قاندايدا ءبىر ازامات سوتتىڭ شەشىمىنە قاناعاتتانباسا جوعارى سوتقا اپپەلەتسياعا بەرەدى. ال مەدياتسيانىڭ شەشىمىن ەشقانداي جوعارى نەمەسە وبلىستىق سوت جوققا شىعارا المايدى»، – دەيدى ول.

جاننا ماماشەۆانىڭ ايتۋىنشا، اعايىن-تۋىستاردىڭ اراسىندا مۇلىككە تالاساتىن جاعدايلار كەزدەسىپ قالىپ جاتادى. الايدا ول مەدياتسيانىڭ ارقاسىندا كوپتەگەن اعايىندار ارازدىقتى قويىپ، ءوزارا كەلىسىمگە كەلگەنىن جەتكىزدى.

«شىنى كەرەك قازاق حالقىنىڭ اراسىندا سوتتاسىپ، بەت كورىسپەي كەتەتىندەي جاعداي بولعان ەمەس. اقساقالداردىڭ اقىلىنىڭ ارقاسىندا وتباسىنداعى كەيكىلجىڭ اۋىلدان اسىپ كەتپەي، ءوز شەشىمىن تاۋىپ وتىرعانى كوپشىلىككە بەلگىلى. قازىرگى تاڭدا ەسكى زامانداعى اقساقالداردىڭ ميسسياسىن مەدياتسيا قىزمەتى اتقارىپ جاتىر»، – دەدى ول.

جالپى سوڭعى جىلدارى مەدياتسيا قىزمەتى حالىقا اراسىندا كەڭىنەن ناسيحاتتالىپ جاتىر. سەبەبى حالىق اراسىندا بولماشى ماسەلە ءۇشىن سوتقا جۇگىنەتىن ازاماتتار كوبەيىپ كەتكەن بولاتىن. ايتسە دە، كەيىنگى كەزدەرى سوتتاسقاننان گورى بىتىمگە كەلگەندى قوش كورەتىن بولعان.

«ادىرنا»

ۇلتتىق پورتالى

 

پىكىرلەر