Book for life دەگەن كەرەمەت جوبا

3706
Adyrna.kz Telegram

قالا جاستارىنىڭ اراسىندا ءتۇرلى اكتسيالار مەن قايىرىمدىلىق ىستەرى بەلسەندى وتكىزىلىپ كەلەدى. وسى باعىتتا الماتى قالاسى اكىمشىلىگىنىڭ قولداۋىمەن قۇرىلعان «ەرىكتىلەر ليگاسى» جۇمىس ىستەيدى. الەۋمەتتىك جەلىلەردە «Book for life» اتتى جوبانىڭ كەڭ تارالىپ جاتقانىن كوردىك. جوبا اۆتورى التىناي مۋليكوۆا يگى شارا جايىندا كەڭىنەن تارقاتىپ ايتىپ بەردى.

-«Book for life»-تىڭ يدەياسىن جۇزەگە اسىرۋعا 6 اي ۋاقىت كەتتى. سىزدەرگە تۇسىنىكتى بولۋى ءۇشىن نەگىزگى جۇمىس بارىسىن ايتىپ بەرەيىن: ءبىز كىتاپتاردى جيناپ، ارنايى قاپتاماعا وراعاننان كەيىن سىرتىنا شىعارمانىڭ قىسقاشا مازمۇنىن جازامىز. اۆتور دا، تۋىندىنىڭ اتى دا كورسەتىلمەيدى. مۇنداعى باستى ماقسات- كىتاپتىڭ بار قازىناسى سىرت كورىنىسىنە بايلانىستى ەمەس ەكەندىگىن جەتكىزۋ بولدى. بارلىق كىتاپ بىردەي باعادا، 700 تەڭگەدەن ساتىلىمعا شىقتى. ولاردىڭ اراسىندا ءتۇرلى باعالى ەنتسيكلوپەديالار دا، شەتەل، قازاق ادەبيەتى دە، كلاسسيكا مەن شىتىرمان وقيعالار دا، جالپى ايتقاندا، بارلىق جانرداعى كىتاپتار بولدى. بۇل قايىرىمدىلىق شاراسى بولعاندىقتان، كىتاپتارىمىزدىڭ باسىم كوپشىلىگى بۇرىن قولدانىستا بولعان، ۇقىپتى ۇستالعان. ءبىر قۋانتاتىنى: ساتىپ الۋشىلار مەن كىتاپ وتكىزۋشىلەردىڭ دەنى- جاستار. ياعني، وسى جەردە «جاستار كىتاپ وقىمايدى» دەگەن قاساڭ قاعيدانىڭ قاتە ەكەنىن كورە الامىز.
شارامىز «Azamat 3.0» باعدارلاماسىنىڭ كومەگىمەن جۇزەگە اسىپ جاتىر. كىتاپتاردى جيناپ، ىرىكتەپ، قاپتاپ، مازمۇنىن جازۋدا «ەرىكتىلەر ليگاسى» كوپ كومەك كورسەتتى. العاشىندا قورقىنىش بولعانى جاسىرىن ەمەس. قيىندىقتار دا كوپ كەزدەستى. دەسە دە، قازىرگى تاڭدا الماتى قالاسىنداعى جوعارعى وقۋ ورىندارىندا، ساۋدا ورتالىعىندا كىتاپ كورمەسىن ۇيىمداستىرىپ ۇلگەردىك. جوبا اياسىندا شىمكەنت قالاسىنا بارۋدىڭ دا ءساتى ءتۇستى. الداعى ۋاقىتتا رەسپۋبليكا كولەمىنە تارالساق دەگەن نيەت، جوسپار بار.
جوعارىدا ايتىپ وتكەندەي، قالىڭدىعى مەن قۇندىلىعىنا قاراماستان، بارلىق كىتابىمىز 700 تەڭگەدەن ساتىلادى. جينالعان قارجى ونكولوگيالىق اۋرۋى بار بالالارعا كومەك ەسەبىندە ءتيىستى ورىنعا بەرىلەدى.
بۇرىننان بالالارعا كومەكتەسكىم كەلەتىن. سەبەبىن قايدام، كوزىمە بالالار ءجيى ەلەستەيدى. سوندىقتان دا جوبانىڭ نەگىزگى ماقساتى- بالالارعا كومەك كورسەتۋ بولدى.
ءوزىڭىز دە ءتۇسىنىپ تۇرعان بولارسىز، ونكولوگيالىق اۋرۋى بار ءبىر عانا بالانى ەمدەتۋگە اسا كوپ قاراجات جۇمسالادى. ءبىزدىڭ شارامىز بارلىق بالالاردى قامتۋعا نەگىزدەلگەندىكتەن، ونكوورتالىقتاعى ارنايى ەمدەۋ، ويىن-ساۋىق زالىنا ءمان بەرگىمىز كەلدى. راسىندا، بالاقايلار ءۇشىن بۇل تاپتىرماس قۋانىش، مۇمكىندىك.

-ءسوز سوڭىندا وقىرماندارىمىزعا ايتارىڭىز بار ما؟

- جۇرەكتەرىڭىز ىزگىلىككە تولى بولسىن دەگىم كەلەدى. كىتاپ وقيىق، جاقسىلىق جاسايىق. شىن مانىندە ءوزىمىز قانداي بولساق، اينالامىز دا سونشالىقتى قۇلپىرىپ تۇرادى عوي. قۇلپىرىپ جۇرە بەرۋلەرىڭىزگە تىلەكشىمىن.

مادينا وقاس

پىكىرلەر