Qala jastarynyń arasynda túrli akııalar men qaıyrymdylyq isteri belsendi ótkizilip keledi. Osy baǵytta Almaty qalasy ákimshiliginiń qoldaýymen qurylǵan «Eriktiler lıgasy» jumys isteıdi. Áleýmettik jelilerde «Book for life» atty jobanyń keń taralyp jatqanyn kórdik. Joba avtory Altynaı Mýlıkova ıgi shara jaıynda keńinen tarqatyp aıtyp berdi.
-«Book for life»-tyń ıdeıasyn júzege asyrýǵa 6 aı ýaqyt ketti. Sizderge túsinikti bolýy úshin negizgi jumys barysyn aıtyp bereıin: biz kitaptardy jınap, arnaıy qaptamaǵa oraǵannan keıin syrtyna shyǵarmanyń qysqasha mazmunyn jazamyz. Avtor da, týyndynyń aty da kórsetilmeıdi. Mundaǵy basty maqsat- kitaptyń bar qazynasy syrt kórinisine baılanysty emes ekendigin jetkizý boldy. Barlyq kitap birdeı baǵada, 700 teńgeden satylymǵa shyqty. Olardyń arasynda túrli baǵaly enıklopedııalar da, shetel, qazaq ádebıeti de, klassıka men shytyrman oqıǵalar da, jalpy aıtqanda, barlyq janrdaǵy kitaptar boldy. Bul qaıyrymdylyq sharasy bolǵandyqtan, kitaptarymyzdyń basym kópshiligi buryn qoldanysta bolǵan, uqypty ustalǵan. Bir qýantatyny: satyp alýshylar men kitap ótkizýshilerdiń deni- jastar. Iaǵnı, osy jerde «jastar kitap oqymaıdy» degen qasań qaǵıdanyń qate ekenin kóre alamyz.
Sharamyz «Azamat 3.0» baǵdarlamasynyń kómegimen júzege asyp jatyr. Kitaptardy jınap, iriktep, qaptap, mazmunyn jazýda «Eriktiler lıgasy» kóp kómek kórsetti. Alǵashynda qorqynysh bolǵany jasyryn emes. Qıyndyqtar da kóp kezdesti. Dese de, qazirgi tańda Almaty qalasyndaǵy joǵarǵy oqý oryndarynda, saýda ortalyǵynda kitap kórmesin uıymdastyryp úlgerdik. Joba aıasynda Shymkent qalasyna barýdyń da sáti tústi. Aldaǵy ýaqytta respýblıka kólemine taralsaq degen nıet, jospar bar.
Joǵaryda aıtyp ótkendeı, qalyńdyǵy men qundylyǵyna qaramastan, barlyq kitabymyz 700 teńgeden satylady. Jınalǵan qarjy onkologııalyq aýrýy bar balalarǵa kómek esebinde tıisti orynǵa beriledi.
Burynnan balalarǵa kómekteskim keletin. Sebebin qaıdam, kózime balalar jıi elesteıdi. Sondyqtan da jobanyń negizgi maqsaty- balalarǵa kómek kórsetý boldy.
Ózińiz de túsinip turǵan bolarsyz, onkologııalyq aýrýy bar bir ǵana balany emdetýge asa kóp qarajat jumsalady. Bizdiń sharamyz barlyq balalardy qamtýǵa negizdelgendikten, onkoortalyqtaǵy arnaıy emdeý, oıyn-saýyq zalyna mán bergimiz keldi. Rasynda, balaqaılar úshin bul taptyrmas qýanysh, múmkindik.
-Sóz sońynda oqyrmandarymyzǵa aıtaryńyz bar ma?
- Júrekterińiz izgilikke toly bolsyn degim keledi. Kitap oqıyq, jaqsylyq jasaıyq. Shyn máninde ózimiz qandaı bolsaq, aınalamyz da sonshalyqty qulpyryp turady ǵoı. Qulpyryp júre berýlerińizge tilekshimin.
Madına Oqas
