ءسىم: 4500 ەتنيكالىق قازاق قىتاي ازاماتتىعىنان باس تارتتى

1792

بيىل قاڭتار مەن قىركۇيەك ايى ارالىعىندا 4500 ەتنيكالىق قازاقتىڭ قىتاي ازاماتتىعىنان شىعۋى راسىمدەلگەن. بۇل تۋرالى قازاقستان سىرتقى ىستەر مينيسترلىگى ازاتتىققا مالىمدەدى.

"9400 قازاق قازاقستانداعى تۋىستارىمەن كەزدەسۋ ءۇشىن قۇجات الدى" دەلىنگەن مينيسترلىكتىڭ ازاتتىققا جىبەرگەن جازباشا جاۋابىندا.

مينيسترلىكتىڭ مالىمدەۋىنشە، 2019 جىلدىڭ العاشقى توعىز ايىندا قازاقستاننىڭ قىتايداعى ەلشىلىگىنەن 35 مىڭ ەتنيكالىق قازاق قازاقستانعا ۆيزا العان.

ىشكى ىستەر مينيسترلىگىنىڭ دەرەگى بويىنشا، بيىل قاڭتار مەن قىركۇيەك ارالىعىندا 10790 ەتنيكالىق قازاق قازاقستان ازاماتتىعىن قابىلداعان، مينيسترلىك دەرەگىنشە، وتكەن جىلى 18 مىڭنان استام ەتنيكالىق قازاق ازاماتتىق العان.

قازاقستاندا تۇرىپ جاتقان، بىراق ازاماتتىعى جوق ادامدارعا قازاقستان پرەزيدەنتىنىڭ جارلىعىمەن قازاقستان ازاماتتىعى بەرىلەدى. ال شەتەلدەن كوشىپ كەلگەن ەتنيكالىق قازاقتار قازاقستان ازاماتتىعىن جەڭىلدەتىلگەن تارتىپپەن الا الادى.

شىلدە ايىندا جەرگىلىكتى اقپارات قۇرالدارى ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگىنە سىلتەمە جاساپ، 2019 جىلدىڭ التى ايىندا 7000-عا جۋىق ەتنيكالىق قازاقتىڭ قازاقستانعا قونىس اۋدارعانىن حابارلاعان بولاتىن. سونىڭ ىشىندە وزبەكستاننان - 3800, قىتايدان 1553 ادام كوشىپ كەلگەن. مۇنان باسقا تۇرىكمەنستاننان 532, موڭعوليادان - 402, رەسەيدەن - 145, يراننان - 62, قىرعىزستاننان - 46, تاجىكستاننان - 11, تۇركيادان ءۇش ەتنيكالىق قازاق تاريحي وتانىنا ورالعان.

"ازاتتىق" راديوسى

پىكىرلەر