SIM: 4500 etnıkalyq qazaq Qytaı azamattyǵynan bas tartty

1791

Bıyl qańtar men qyrkúıek aıy aralyǵynda 4500 etnıkalyq qazaqtyń Qytaı azamattyǵynan shyǵýy rásimdelgen. Bul týraly Qazaqstan syrtqy ister mınıstrligi Azattyqqa málimdedi.

"9400 qazaq Qazaqstandaǵy týystarymen kezdesý úshin qujat aldy" delingen mınıstrliktiń Azattyqqa jibergen jazbasha jaýabynda.

Mınıstrliktiń málimdeýinshe, 2019 jyldyń alǵashqy toǵyz aıynda Qazaqstannyń Qytaıdaǵy elshiliginen 35 myń etnıkalyq qazaq Qazaqstanǵa vıza alǵan.

Ishki ister mınıstrliginiń deregi boıynsha, bıyl qańtar men qyrkúıek aralyǵynda 10790 etnıkalyq qazaq Qazaqstan azamattyǵyn qabyldaǵan, Mınıstrlik dereginshe, ótken jyly 18 myńnan astam etnıkalyq qazaq azamattyq alǵan.

Qazaqstanda turyp jatqan, biraq azamattyǵy joq adamdarǵa Qazaqstan prezıdentiniń jarlyǵymen Qazaqstan azamattyǵy beriledi. Al shetelden kóship kelgen etnıkalyq qazaqtar Qazaqstan azamattyǵyn jeńildetilgen tártippen ala alady.

Shilde aıynda jergilikti aqparat quraldary Eńbek jáne halyqty áleýmettik qorǵaý mınıstrliginiń deregine silteme jasap, 2019 jyldyń alty aıynda 7000-ǵa jýyq etnıkalyq qazaqtyń Qazaqstanǵa qonys aýdarǵanyn habarlaǵan bolatyn. Sonyń ishinde Ózbekstannan - 3800, Qytaıdan 1553 adam kóship kelgen. Munan basqa Túrikmenstannan 532, Mońǵolııadan - 402, Reseıden - 145, Irannan - 62, Qyrǵyzstannan - 46, Tájikstannan - 11, Túrkııadan úsh etnıkalyq qazaq tarıhı otanyna oralǵan.

"Azattyq" radıosy

Pikirler