اقمولا وبلىسى پوليتسيا دەپارتامەنتى اكىمشىلىك سوت شەشىمىمەن قاماۋدا وتىرعان دۋلات اعادىلدىڭ "قاشىپ كەتكەنىن" ايتادى. بۇل حابارعا كۇمان كەلتىرگەن قۇقىق قورعاۋشىلار مەن جاقتاستارى بەلسەندىنىڭ "قاشقانى" جايلى ۆيدەونى كورسەتۋدى تالاپ ەتتى.
"ۆيدەونى كورسەتۋدى تالاپ ەتەمىز!"
قاراشانىڭ 14-ءى كۇنى نۇر-سۇلتان قالاسىندا قازاقستان ىشكى ىستەر مينيسترلىگى الدىنا جينالعان ءبىر توپ ازامات جەرگىلىكتى بەلسەندى دۋلات اعادىل تۋرالى تولىمدى اقپارات بەرۋدى تالاپ ەتتى. نارازىلارمەن سويلەسكەن ىشكى ىستەر مينيسترلىگى اكىمشىلىك پوليتسيا كوميتەتىنىڭ وكىلى، پوليتسيا پولكوۆنيگى كارىم جارىلقاسىنوۆتىڭ ايتۋىنشا، اقمولا وبلىسى تسەلينوگراد اۋدانى ورتالىعى اقمول كەنتىندەگى ۋاقىتشا قاماۋ يزولياتورىندا اكىمشىلىك قاماۋدا وتىرعان جالعىز ادام – بەلسەندى دۋلات اعادىل عانا وتىرعان.
- باقىلاۋ كامەراسىنا ونىڭ كيىمىن كيىپ، جارىقتى ءوشىرىپ كامەرادان شىققانى، دالىزدە ارى-بەرى سەرۋەندەپ جۇرگەنى جازىلعان. اياعى اۋىراتىنىن ايتقان سوڭ وعان دالىزدە سەرۋەندەۋگە رۇقسات بەرگەن. كەشە ول كەزەكشىنىڭ تەلەفونعا جاۋاپ بەرىپ جاتقان ءساتىن پايدالانىپ، ءبىرىنشى قاباتتاعى تەرەزەنىڭ سىرتقى تورى اشىق قالعانىن كورگەن سوڭ، سول ارقىلى سىرتقا شىعىپ كەتكەن، ىزدەرى بار، - دەدى جارىلقاسىنوۆ.
"كۇيەۋىم بۇگىن شىعۋى ءتيىس بولاتىن، قاشىپ كەتكەن دەگەنگە سەنبەيمىن، باقىلاۋ كامەراسىنىڭ جازباسىن كورسەتۋىڭىزدى سۇرايمىن" دەگەن دۋلات اعادىلدىڭ جۇبايىنا اكىمشىلىك پوليتسيا كوميتەتى وكىلى جارىلقاسىنوۆ:
- بۇگىن ەمەس، دۋلات اعادىل قاراشانىڭ 19-ى كۇنى شىعۋى ءتيىس بولاتىن. سەبەبى، الدىڭعى مەرزىمىنە "سوتتى قۇرمەتتەمەگەنى ءۇشىن" تاعى بەس تاۋلىك جازا مەرزىمى قوسىلعان، ول تۋرالى سوت قاۋلىسى بار، - دەپ جاۋاپ بەردى.
باقىلاۋ كامەراسىنداعى جازبانى كورسەتۋدى تالاپ ەتكەن بەلسەندىنىڭ تۋىستارى مەن جاقتاستارىنا ول تسەلينوگراد اۋداندىق پوليتسيا بولىمىنەن ءمان-جايدى انىقتاۋعا بولاتىنىن ايتتى.
بەلسەندى بيبىگۇل تۇياقوۆانىڭ الەۋمەتتىك جەلىدەگى ترانسلياتسياسى:
"قايدا ەكەنى بەلگىسىز"
پوليتسيا قىزمەتكەرلەرىنىڭ اكىمشىلىك سوت شەشىمىمەن قاماۋدا وتىرعان دۋلات اعادىلدىڭ "قاشىپ كەتكەنىن" حابارلاپ، ونى ىزدەۋگە كىرىسكەنى تۋرالى قاراشانىڭ 13-ءى كۇنى الەۋمەتتىك جەلىدە نۇر-سۇلتاندىق بەلسەندى نۇرجان سەيىتجانوۆ حابارلاعان. ول سارسەنبى كۇنى ۇيىنە "اعادىلدى ىزدەپ كەلگەن" پوليتسەيلەردىڭ ديۆاننىڭ استىنا ءۇڭىلىپ، تەكسەرىپ جاتقان ساتىنەن تۇسىرىلگەن ۆيدەونى جاريالاعان.
بەيسەنبى كۇنى ازاتتىق ءتىلشىسى سويلەسكەن دۋلات اعادىلدىڭ ادۆوكاتى دانيار اقتانوۆ ۋاقىتشا قاماۋ يزولياتورىنا كىرۋگە رۇقساتى بولماعاندىقتان قولىندا بەلسەندى جايلى ەشقانداي اقپارات جوعىن، قازىر ونىڭ قايدا ەكەنىن بىلمەيتىنىن ايتتى. ونىڭ سوزىنشە، قاماۋدا بولعان كەزدە اعادىل ەشكىممەن بايلانىسقا شىقپاعان.
- قاشىپ كەتتى مە، الدە قاشپادى ما، نەمەسە باسقا جاققا الىپ كەتتى مە، ول جاعى ازىرگە تۇسىنىكسىز، - دەدى ول.
اقتانوۆ قاراشانىڭ 13-ءى كۇنى كەشكە اعادىلدىڭ ۇستىنەن قوزعالعان ءىستى جۇرگىزىپ جاتقان تەرگەۋشىگە تەلەفون شالىپ، بەلسەندى تۋرالى اقپارات تۇسسە وزىنە حابارلاۋىن سۇراعانىن ايتتى.
قازاقستاندىق قۇقىق قورعاۋشىلار مەن بەلسەندىلەر بيلىكتى دۋلات اعادىلگە بايلانىستى بارلىق ءمان-جايدى انىقتاپ، بارلىق اقپاراتتى جاريالاۋعا شاقىردى.
42 جاستاعى دۋلات اعادىل ازاماتتىق قۇقىقتار مەن ساياسي بوستاندىقتاردىڭ ساقتالۋىن تالاپ ەتىپ جۇرگەن بەلسەندى رەتىندە تانىمال. ول بيلىككە نارازىلىق اكتسيالارىنا قاتىسقانى ءۇشىن بۇعان دەيىن بىرنەشە رەت اكىمشىلىك قاماۋدا بولعان. سوڭعى رەت قاراشانىڭ 4-ءى كۇنى اقمول كەنتىندە "سوتقا اپارماق بولعان پوليتسيانىڭ زاڭدى تالابىنا باعىنباعان" دەگەن ايىپ تاعىلىپ، سوت شەشىمىمەن 10 تاۋلىككە قامالعان.
وعان دەيىن، قازاننىڭ 28-ءى كۇنى تسەلينوگراد اۋداندىق سوتى دۋلات اعادىلدى "قازاننىڭ 17-ءى كۇنى اۋداندىق پوليتسيا بولىمىندە بيلىك وكىلدەرىنىڭ تالابىنا مويىنسۇنباعان" دەگەن ايىپپەن 10 تاۋلىككە قاماۋعا شەشىم شىعارعان.
تامىزدىڭ 27-ءى كۇنى نۇر-سۇلتانداعى مامانداندىرىلعان اۋدانارالىق اكىمشىلىك سوتى بەلسەندى دۋلات اعادىلدى "شەرۋ وتكىزۋ ءتارتىبىن بۇزدى" دەپ ايىپتاپ، ون تاۋلىككە قاماعان. ادۆوكاتى دانيار احتانوۆتىڭ ايتۋىنشا، اكىمشىلىك سوت بەلسەندىنىڭ ۇستىنەن ءبىر كۇندە ەكى سوت وتكىزگەن. "بەيبىت ميتينگ، شەرۋ، پيكەت وتكىزۋ ءتارتىبىن بۇزۋ" بابى بويىنشا ايىپ تاعىلعان ونى ءبىر سۋديا اقتاسا، ىلە-شالا ەكىنشى سوت بولىپ، باسقا سۋديا ءدال سول باپپەن ايىپتى دەپ تانىپ، ون تاۋلىككە قامادى" دەگەن ادۆوكات.
سودان ءۇش كۇنى بۇرىن، تامىزدىڭ 24-ءى كۇنى دۋلات اعادىل "پوليتسياعا باعىنبادى" دەپ ايىپتالىپ، بەس تاۋلىككە قامالعان ەدى. سوت ونى تامىزدىڭ 24-ىنە نۇر-سۇلتان پوليتسيا دەپارتامەنتىنىڭ الدىندا "زاڭسىز اكتسيا وتكىزدى" دەپ ايىپتاپ، دالەل رەتىندە بەلسەندىلەردىڭ تامىزدىڭ 23-ءى اقش ەلشىلىگى مەن ازىرەت سۇلتان مەشىتى الدىنداعى "ساياسي تۇتقىنداردى" بوساتۋدى تالاپ ەتكەن نارازىلىقتان تۇسىرىلگەن ۆيدەونى پايدالانعان.
دۋلات اعادىل وزىنە تاعىلعان بارلىق ايىپتاردى جوققا شىعارىپ، مويىندامايتىنىن مالىمدەگەن.
بيىل ماۋسىمنىڭ 9-ى، قازاقستاندا كەزەكتەن تىس پرەزيدەنت سايلاۋى وتكەن كۇنى نۇر-سۇلتاندا پوليتسەيلەر ازاتتىق راديوسىنىڭ تىكەلەي ەفيرىنە بارا جاتقان دۋلات اعادىلدى ۇستاپ، ەسىل اۋداندىق پوليتسيا بولىمىنە اپارعان. كەيىن بەلسەندى پوليتسيا بولىمىندە بيلىك وكىلدەرى وزىنە كۇش كورسەتكەنى تۋرالى مالىمدەگەن.
- ءبىر مايور مەن ەكى-ءۇش ادام ۇرىپ تەپكىلەپ، قولىمدى شىعارىپ جىبەردى. يىعىم كوگەرىپ، ءىسىپ كەتكەن سوڭ جەدەل جاردەم شاقىرىپ ەدى، ولار №1 قالالىق ەمحانا الىپ باردى. يىعى شىققان دەپ سالىپ، گيپستەپ بەردى، - دەگەن ول ازاتتىق تىلشىسىنە.
دۋلات اعادىل پوليتسيانىڭ ۇستىنەن سول كۇنى تۇندە كەزەكشى پروكۋرورعا ارىزدانعان. سونىمەن بىرگە ول باس پروكۋراتۋراعا ماۋسىمنىڭ 9-ىندا پوليتسيا تاركىلەپ الىپ كەتكەن تەلەفونىن قايتارۋدى سۇراپ، شاعىم جازعان.
بەلسەندىنىڭ شاعىمى بويىنشا قانداي شارا قابىلدانعانىن باس پروكۋراتۋرا حابارلاعان جوق.
"ازاتتىق" راديوسى
