ەلىمىزدە «ەڭبەك» باعدارلاماسى ارقىلى ەكڭ قولعا ءبىر كۇرەك تاپقان ازاماتتار جەتەرلىك. سونداي-اق جامبىل وبلىسىنىڭ تۇرعىندارى دا اتالعان باعدارلامانىڭ يگىلىگىن كورىپ جاتىر.
قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرجان جىلقىباەۆ جامبىل وبلىسىنا جۇمىس ساپارمەن كەلىپ، الەۋمەتتىك سالادا اتقارىلىپ جاتقان جۇمىستار تۋرالى باياندادى. سونداي-اق ۆيتسە-مينيستر پرەزيدەنتتىڭ قازاقستان حالقىنا جولداۋىنىڭ نەگىزگى باعىتتارىن ءتۇسىندىرىپ، مۇگەدەكتەر مەن جۇمىسسىزدارعا مەملەكەتتىك قولداۋ شارالارى تۋرالى ەگجەي-تەگجەيلى ايتىپ بەردى.
«بيىل مۇمكىندىگى شەكتەۋلى ازاماتتارعا بەرىلەتىن جاردەماقىعا جالپى 315 ميلليارد تەڭگە ءبولىندى. جالپى بۇل قارجى وتكەن جىلعا قاراعاندا 10 پايىزعا ارتىق بولىپ وتىرعانىن ايتىپ وتكىم كەلەدى. سونداي-اق، الەۋمەتتىك قىزمەت كورسەتۋ جۇيەسىن جاڭعىرتۋ، قىزمەتتەر مەن وڭالتۋ قۇرالدارىنىڭ ساپاسى مەن قولجەتىمدىلىگىن ارتتىرۋ ماقساتىندا 2020 جىلعى 1 قاڭتاردان باستاپ قازاقستاندا الەۋمەتتىك قىزمەت كورسەتۋ پورتالى ەنگىزىلەتىنىن حابارلادى» – دەدى ول.
ۆيتسە-مينيستر تاراز قالالىق جۇمىسپەن قامتۋ ورتالىعىنىڭ قىزمەتكەرلەرىمەن اڭگىمەلەسۋ بارىسىندا، «ەڭبەك» مەملەكەتتىك باعدارلاماسى اياسىندا گرانتتار مەن ميكروكرەديتتەر بەرۋ بويىنشا جۇمىستى جانداندىرۋدى ۇسىندى.
«مەملەكەت باسشىسى قازاقستان حالقىنا جولداۋىندا كوپبالالى جانە تابىسى از وتباسىلاردى كاسىپكەرلىككە بەلسەندى تۇردە تارتۋدى تاپسىردى. ول ءۇشىن «ەڭبەك» مەملەكەتتىك باعدارلاماسىندا «بيزنەس باستاۋ» جوباسى اياسىندا كاسىپكەرلىك نەگىزدەرىنە وقىتۋدان باستاپ، گرانتتار مەن ميكروكرەديتتەر بەرۋگە دەيىنگى بارلىق قاجەتتى قۇرالدار بار. جامبىل وبلىسىندا ءوز بيزنەس-جوبالارىن قورعاعان 2 934 ادامنىڭ 1 046-ى ميكروكرەديت الدى. جوسپارلانعان 1 783 گرانتتىڭ تەك 1 314 نەمەسە 73,7 پايىزى عانا بەرىلدى. جوسپارلانعان كورسەتكىشتەرگە جەتۋ ءۇشىن ولاردى ميكروكرەديتتەر مەن گرانتتار بەرۋ بويىنشا جۇمىستى جانداندىرۋ قاجەت دەپ سانايمىن»، – دەدى ەرجان جىلقىباەۆ.
ءمينيستردىڭ ءبىرىنشى ورىنباسارى «ەڭبەك» باعدارلاماسىن جۇزەگە اسىرۋ اياسىندا ميكرونەسيە العاننان كەيىن ءوز بيزنەسىن تابىستى دامىتىپ وتىرعان تارازدىقتارمەن كەزدەستى. ول تارازدىق ايەلدەردىڭ بەلسەندىلىگىن ايرىقشا ايتىپ ءوتتى.
«تارازدا مەملەكەت ۇسىناتىن مۇمكىندىكتەردى پايدالانۋدىڭ وڭتايلى مىسالدارى بار. مەن ايەلدەردىڭ بەلسەندىلىگىن اتاپ وتكىم كەلەدى، «ەڭبەك» باعدارلاماسىنا قاتىسۋشىلاردىڭ ءبىرى سۇلۋلىق سالونىن، ەكىنشىسى – ويىن كلۋبىن، ال ءۇشىنشىسى – تروتۋار تاقتالارىن، قابىرعا بلوكتارىن، جول جيەكتەرىن، قاپتاۋ ماتەريالدارى ءوندىرىسىن اشقان. ەڭ باستىسى، بۇل ايەلدەر ءوز وتباسىلارىنىڭ ماتەريالدىق جاعدايىن جاقسارتىپ قانا قويماي، باسقا ادامداردى جۇمىسپەن قامتىپ وتىر»، – دەپ اتاپ ءوتتى جىلقىباەۆ.
«ادىرنا»
ۇلتتىق پورتالى
