قارجى مينيسترلىگى سالىقتان جالتارعان rاسىپكەرلەردى انىقتاۋ ءۇشىن اقشالاي اۋدارىمدار تەكسەرىلەتىنىن مالىمدەگەن ەدى
قازاقستاندىقتاردىڭ اقشا اۋدارىمدارىن تەكسەرۋ ماسەلەسى ءالى تالقىلانىپ جاتىر. بۇل تۋرالى بۇگىن ۇلتتىق بانك توراعاسى ەربولات دوساەۆ مالىمدەدى، دەپ حابارلايدى Sputnik قازاقستان تىلشىسى.
"قارجى مينيسترلىگى Kaspi bank ارقىلى جاسالاتىن اقشا اۋدارىمدارىنا سالىق سالادى دەپ ويلامايمىن. تەك وسى تولەمدەردەن سالىق تولەنىپ-تولەنبەگەنىن كورىپ وتىرعىسى كەلەدى. بۇل ماسەلەنى ۇلتتىق بانك پەن قارجى مينيسترلىگى بىرلەسىپ قاراپ جاتىر. قولما-قول اقشاسىز تولەم جاساۋ كولەمى ۇلعايسا، بيۋدجەتكە تۇسەتىن كىرىس تە ارتۋى كەرەك دەپ ويلايمىن. بۇل قالىپتى نارسە، سەبەبى اقشا كولەڭكەلى ەكونوميكادان شىعادى", - دەدى دوساەۆ جۋرناليستەرگە بەرگەن سۇحباتىندا.
ول بۇل ماسەلە تەك Kaspi بانككە عانا ەمەس، بۇكىل بانك سەكتورىنا قاتىستى ەكەنىن قاداپ ايتتى.
"كولەڭكەلى ەكونوميكانىڭ ۇلەسىن ازايتۋ باعىتىنداعى بىرلەسكەن جۇمىس قوسىمشا تابىس الۋ تۇرىندەگى وڭ ناتيجەلەرمەن جالعاسقانىن قالايمىز. بۇل ازىرگە قارجى مينيسترلىگىنىڭ ۇسىنىسى عانا، بانك قاۋىمداستىعىمەن تالقىلانىپ جاتىر", - دەدى ۇلتتىق بانك توراعاسى.
بۇعان دەيىن قارجى مينيسترلىگى سالىقتان جالتارعان كاسىپكەرلەردى انىقتاۋ ءۇشىن اقشالاي اۋدارىمدار تەكسەرىلەتىنىن مالىمدەگەن ەدى.
قارجى ۆيتسە-ءمينيسترى رۋسلان ەڭسەباەۆتىڭ ايتۋىنشا، قازىرگى ۋاقىتتا Kaspi Gold تولەم جاساۋدىڭ ەڭ ءجيى قولدانىلاتىن ءتۇرى. الايدا تولەم جۇيەسى سالىق زاڭناماسىنىڭ تالابىنا ساي ەمەس.
ۆەدومستۆو باسىندا Kaspi.kz ارقىلى اۋدارىم جاساۋعا تىيىم سالۋدى ويلاپتى. بىراق، بۇل ەل ەكونوميكاسىنا كەرى اسەرىن تيگىزۋى مۇمكىن دەگەن پايىمعا كەلگەن.
