شىعىس قازاقستان ونەر مۋزەيىندە قىلقالام شەبەرلەرىنىڭ قازاق حاندىعىنىڭ 550 جىلدىعىنا ارنالعان «تاريح تولقىنىندا» اتتى سۋرەت كورمەسى اشىلدى.
- بۇگىنگى كورمەدە ءبىز تاريحتىڭ تەرەڭىنە ۇڭىلە وتىرىپ، بابالارىمىزدىڭ مۇراتتارىن قايتادان جاڭعىرتۋعا، قازىرگى قوعامنىڭ بىرلەسۋى مەن ءوزارا شوعىرلانۋىنىڭ ومىرشەڭ فورمالارىن ءتۇزىپ شىعىپ، ەرتە زامان مەن جاڭا زاماننىڭ ساباقتاستىعىن نەگىزدەۋگە تىرىستىق. تاريحتىڭ عىلىم رەتىندەگى وعاشتاۋ قاسيەتى – وتكەن زامان تۋرالى ءبىلىمدى بىزگە جاناما تۇردە عانا بەرەتىندىگى. اقىننىڭ، جىلناماشى مەن سۋرەتشىنىڭ ءوز زامانىنان ءجۇز پايىز بەيتاراپ جانە ءادىل بولۋى مۇمكىن ەمەس. كوركەم شىعارما، سۋرەت، ءان تاريحتى ۇرپاقتىڭ جادىندا ۇزاق ساقتالاتىنداي، ناقتى بولعان وقيعادان بولەكتەۋ ەتىپ، قايتادان جازىپ شىعاتىن سياقتى، - دەيدى ونەر مۋزەيىنىڭ سەكتور مەڭگەرۋشىسى گۇلنارا كاپسانوۆا. «تاريح تولقىنىندا» اتتى كورمە كونە جانە قازىرگى زامان وقيعالارىن سۋرەتشىلەردىڭ ناق وسىلايشا تالداۋى، ءتۇسىنۋى ارقىلى كورەرمەندەرگە ۇسىنىپ وتىر. سۋرەتشىلەر – تاريحشى ەمەس. ولار كورەرمەنگە ءوز تۋىندىلارىن ۋاقىتتى ەرەكشە، كوركەم، قىلقالام شەبەرىنىڭ سۋبەكتيۆتى، اسەرلى قابىلداۋى تۇرىندە ۇسىنعان. ماسەلەن، سۋرەتشىلەر قۇداش نۇرسادىقوۆ، گۇلنار بەكبەردينوۆا، ەرجان تۇرعانباەۆ قازاق حاندىعىنىڭ مۇراسىن تەك ەرلىك، ەپيكالىق نۇسقادا ەمەس، كۇندەلىكتى ومىردەگىدەي، سۋرەتشىلەر «تۇرمىستىق» دەپ اتايتىن جانردا كورە بىلگەن. قايسان قادىربەكوۆ ابىلايحاننىڭ وبرازىن شارتتى كوركەمدىك كەڭىستىكتە سومداعان. مۇنداعى سۋرەتتىڭ قوس قاپتالىنداعى سوبور مەن قىتاي قورعانىنىڭ ارحيتەكتۋرالىق نىشاندارى قازاقستاننىڭ رەسەي مەن قىتاي اراسىنداعى كەڭىستىگىن بىلدىرەدى.
ايتمۇحامبەت قاسىموۆ،
ونەر مۋزەيىنىڭ قىزمەتكەرى
