Shyǵys Qazaqstan óner mýzeıinde qylqalam sheberleriniń Qazaq handyǵynyń 550 jyldyǵyna arnalǵan «Tarıh tolqynynda» atty sýret kórmesi ashyldy.
- Búgingi kórmede biz tarıhtyń tereńine úńile otyryp, babalarymyzdyń murattaryn qaıtadan jańǵyrtýǵa, qazirgi qoǵamnyń birlesýi men ózara shoǵyrlanýynyń ómirsheń formalaryn túzip shyǵyp, erte zaman men jańa zamannyń sabaqtastyǵyn negizdeýge tyrystyq. Tarıhtyń ǵylym retindegi oǵashtaý qasıeti – ótken zaman týraly bilimdi bizge janama túrde ǵana beretindigi. Aqynnyń, jylnamashy men sýretshiniń óz zamanynan júz paıyz beıtarap jáne ádil bolýy múmkin emes. Kórkem shyǵarma, sýret, án tarıhty urpaqtyń jadynda uzaq saqtalatyndaı, naqty bolǵan oqıǵadan bólekteý etip, qaıtadan jazyp shyǵatyn sııaqty, - deıdi óner mýzeıiniń sektor meńgerýshisi Gúlnara Kapsanova. «Tarıh tolqynynda» atty kórme kóne jáne qazirgi zaman oqıǵalaryn sýretshilerdiń naq osylaısha taldaýy, túsinýi arqyly kórermenderge usynyp otyr. Sýretshiler – tarıhshy emes. Olar kórermenge óz týyndylaryn ýaqytty erekshe, kórkem, qylqalam sheberiniń sýbektıvti, áserli qabyldaýy túrinde usynǵan. Máselen, sýretshiler Qudash Nursadyqov, Gúlnar Bekberdınova, Erjan Turǵanbaev Qazaq handyǵynyń murasyn tek erlik, epıkalyq nusqada emes, kúndelikti ómirdegideı, sýretshiler «turmystyq» dep ataıtyn janrda kóre bilgen. Qaısan Qadyrbekov Abylaıhannyń obrazyn shartty kórkemdik keńistikte somdaǵan. Mundaǵy sýrettiń qos qaptalyndaǵy sobor men qytaı qorǵanynyń arhıtektýralyq nyshandary Qazaqstannyń Reseı men Qytaı arasyndaǵy keńistigin bildiredi.
Aıtmuhambet QASYMOV,
óner mýzeıiniń qyzmetkeri
