قازاقستاندىق 2-3 مۋزەيدى الەمدىك دەڭگەيگە شىعارۋ كەرەك. بۇل تۋرالى ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا ت.ع.د.، پروفەسسور، «ش.ءۋاليحانوۆ اتىنداعى تاريح جانە ەتنولوگيا ينستيتۋتى» رمقك ديرەكتورى حانكەلدى ءابجانوۆ ءمالىم ەتتى.
«ەلىمىزدە مۋزەيلەر از ەمەس، 300-دەي مۋزەي بار. ەندى وسىلاردىڭ كەم دەگەندە 2-3-ءىن الەمدىك دەڭگەيگە كوتەرۋىمىز كەرەك. ماسەلەن، تانىمال «لۋۆر»، «ەرميتاج» سەكىلدى. ال بۇل دەڭگەيگە جەتۋ ءۇشىن ءبىزدىڭ الەمدىك دەڭگەيگە كوتەرىلەتىن مۋزەيدىڭ وزىندىك برەندى بولۋى قاجەت. اتاپ ايتقاندا، بۇل تۇرعىدا «التىن ادامدى» نەمەسە بەرەلدەن تابىلعان جادىگەرلەر، سارايشىقتان شىققان دۇنيەلەردى نەگىزگە الۋ كەرەك. وسىنداي الەم سۇيسىنەتىن، دۇنيەجۇزىنەن ادامدار ارنايى كەلىپ قارايتىن برەند كەرەك»، - دەدى عالىم.
وسى ورايدا ح. ءابجانوۆ قازاقستان اۋمىعىنان كوپتەگەن قۇندى جادىگەرلەر تابىلعانىن ايتا كەلە، وسىلاردى ۇلكەن مۋزەيلەردىڭ برەندىنە اينالدىرۋعا ەرەكشە ءمان بەرۋ كەرەك ەكەنىن جەتكىزدى.
«ەسىكتەن تابىلعان «التىن ادامدى» مۋزەيدىڭ برەندىنە اينالدىرۋ قاجەت. قازىرگى كەزدە قاي مۋزەيگە بارساڭ دا «التىن ادام» (كوشىرمەسى) تۇر. نەگىزى وسى قۇندى جادىگەرلەردى ءبىز مۋزەيدىڭ برەندىنە اينالدىرساق، الەمدىك دەڭگەيدەگى كەم دەگەندە 2-3 مۋزەيدى قۇرا الار ەدىك»، - دەدى پروفەسسور.
سونىمەن قاتار عالىم تاريحي-مادەني قورىق-مۋزەيلەردىڭ اۋماقتىق تۇتاستىعىن ساقتاۋعا ەرەكشە نازار اۋدارۋ كەرەك ەكەنىن اتاپ ءوتتى.
KAZMUSEUM.KZ
