الماتىنىڭ «قازاقكونتسەرت» زالىندا حالقىمىزدىڭ قايتالانباس اتاقتى كومپوزيتور ءانشىسى مۇحيت مەرالىۇلىنىڭ 170 جىلدىعىنا وراي ءال-فارابي اتىنداعى قازاق ۇلتتىق ۋنيۆەرسيتەتى مەن «ادىرنا» ۇلتتىق-ەتنوگرافيالىق بىرلەستىگىنىڭ بىرلەسىپ ۇيىمداستىرۋىمەن «ءان مۇحيتى» اتتى كەش ءوتتى. قازاق مۋزىكا ونەرىنىڭ ماقتانىشى مۇحيتتىڭ اندەرىن ساعىنىپ، سۋساپ قالعان انسۇيەر قاۋىم كوپ جينالدى. سالتاناتتى كەشتى اتاقتى ءانشى عاريفوللا قۇرمانعاليەۆتىڭ شاكىرتى، ودان ءتالىم-تاربيە العان، رەسپۋبليكاعا ەڭبەگى سىڭگەن ءارتىس ساۋلە جانپەيىسوۆا جۇرگىزىپ وتىردى. ساۋلە مۇحيتتىڭ قاراتوبە توپىراعىندا ومىرگە كەلگەنىن، ونىڭ شىعارماشىلىق مۇراسىنىڭ مۋزىكالىق التىن قورىمىزعا ەنگەنىن، ول اسىل مۇرانى ءالى دە بولسا تەرەڭ زەرتتەۋ قاجەت ەكەنىن تىلگە تيەك ەتىپ، تولعامدى پىكىرلەرىن ءبىلدىردى.
كەشكە قاتىسىپ ونەر كورسەتكەن رامازان ستامعازيەۆ، ايگۇل قوسانوۆا، جولامان قۇجيمانوۆ، ىرىستى سۇلەيمەنوۆا، ەركىن شۇكىمانوۆ، ايگۇل ماقاشەۆا، ءازىمحان بايماعانبەتوۆ، نۇرىم اسقانوۆ، جانعوزا اياپوۆ، جۇلدىز سۇندەتقاليەۆا، ۆەنەرا قارجاۋباەۆا، بيبىگۇل ساۋىتوۆا، سامال ومىرزاقوۆا، مارحابات مىقتىبەكوۆ، ەركىن نۇرقانوۆ مۇحيتتىڭ اندەرىن ناشىنە كەلتىرە ورىنداپ، انسۇيەر قاۋىمدى قۋانىشقا كەنەلتتى. ساۋلە جانپەيىسوۆا مۇحيتتىڭ بۇرىن ايتىلماعان، حالىققا جەتپەگەن بىرنەشە اندەرىن شىرقاپ، كورەرمەندەردىڭ قوشەمەتىنە بولەندى.
ۇلتتىق ءان-كۇي – قازاقتىڭ جانى مەن رۋحى. رۋحىنان ايىرىلعان حالىق قۇلدىقتىڭ قامىتىن كيەدى. ەل بولاشاعىنا بەيجاي قاراي المايتىن ونەر جاناشىرلارى كوبەيە بەرسىن دەگىمىز كەلەدى.
عالىم قۇراش، جۋرناليست.
