بۇگىنگى ءمۇسىن ونەرى تۋرالى اڭگىمە كوپ. ءتىپتى بۇگىنگى عانا ەمەس، كەشەگى كەڭەستىك داۋىردە دە بۇل ونەر جونىندە ءار ءتۇرلى وي قوزعاعاندار بولعان. سول ويدىڭ كوپشىلىگى ءبىزدىڭ ەلدەگى مۇسىندىك تۋىندىلاردىڭ امسە كوڭىل كونشىتە بەرمەيتىنىنە نازار اۋدارتاتىن-دى. وعان ونەرتانۋشىلاردىڭ ءۋاجى –ونەرگە ساياساتتىڭ ارالاسۋى بولسا، ال قازىر قاي ءمۇسىنشىنىڭ قولىن كىم بايلاپ وتىر؟ نەگىزگى كىنارات نەدە؟ وسى ساۋالدار توڭىرەگىندە «جاۋھار» ۇلتتىق سالت-ءداستۇردى قولداۋ قورىنىڭ ۇيىمداستىرۋىمەن دوڭگەلەك ۇستەل ءوتتى…
تىلەۋبەردى بيناشەۆ، ءمۇسىنشى:
– بۇگىنگى ءمۇسىن ونەرىنە نە جەتىسپەيدى؟
– تابيعي دارىن دەگەن قاسيەت اللادان كەلەدى. شەتەلدەن ءبىلىم الۋ دارىنسىزعا دارىن قوسىپ بەرمەيدى. قازىرگى ءمۇسىن ونەرىندە تابيعي دارىن جەتىسپەۋدە. ساناۋلى. ال شىنايى تالانتتارعا جاعداي جاساۋ كەرەك. جاعدايى وڭباعان سوڭ، ءار تاراپقا ناپاقا ىزدەپ كەتۋدە. شەبەرحانا – ءبىزدىڭ ەكىنشى ءۇيىمىز. ءوز كەزىمدە ءۇيىم دە، كۇيىم دە بولمادى. جاستىعىم جاعدايدى تۇزەۋمەن ءوتتى. بۇگىندە سول تىنىمسىز ەڭبەكتىڭ ارقاسىندا جەكە شەبەرحانام مەن مۋزەيىمدى اشتىم. ەگەمەندىككە قول جەتكەن تاۋەلسىز ەلىمىزدە جاستارعا جاقسى جاعداي جاسالىنۋى ءتيىس. اتتى دا بايگەگە شاپتىرۋ ءۇشىن جاقسىلاپ باپتايمىز عوي. ونەر ادامى دا تۋرا سول ىسپەتتى. ال كۇيى دۇرىس بولماسا، تالانتى جايىندا قالادى. ومىرلىك سىڭارىنا دا كوپ نارسە بايلانىستى. كەيبىر تالانتتى جىگىتتەردىڭ وتباسىلىق جاعدايى جاقسى بولماي شىعىپ، ىشكىلىككە سالىنىپ كەتتى. ونەر دەگەن كىتاپتان وقىپ-بىلەتىن نارسە ەمەس. ول اللادان، تابيعاتتان كەلەدى دەپ ايتتىم عوي. الىپ كەتە الماساڭ، جوعالىپ كەتۋىڭ دە مۇمكىن. سونداي قيىندىقتارى بار. قازىر ونەر اكادەمياسىندا ايلىق وتە از. ءمۇسىنشى دەگەن تەوريالىق جانە پراكتيكالىق دەپ 2-گە بولىنەدى. تەوريالىق تۇرعىداعىسى وقىتۋعا، ساباق بەرۋگە عانا بەيىم. كوپ مۇسىنشىلەر تەوريالىق بىلىمگە باي بولعانىمەن، پراكتيكاعا كەلگەندە قولى جۇرمەي قالادى. كىتابىن قۇشاقتاپ، جىلدىق باعدارلاماسىمەن ساباق بەرگەن وندايلاردىڭ اسىعى الشىسىنان تۇسەدى. نە ىلكىمدى جۇمىس جوق. سودان كەيىن وي جەتىسپەي جاتىر. اتتىڭ دا ءتۇرىن اجىراتا ءبىلۋ كەرەك قوي. ماسەلەن، اتتىڭ ايعىرى، سوعىمعا سويىلاتىنى، بايلايتىنى بولادى. قازىر ءبىزدىڭ حان، باھادۇرلەرىمىزدىڭ كوبىن ابدەن سەمىرتىپ سوعىمعا سوياتىن اتتارعا مىنگىزىپ قويعان. نەگىزى باتىر تۇلپاردى جاراتۋى ءتيىس. تۇلپاردى دا دۇرىس ايىرا المايدى. دەمەك، وي تاپشى. بۇگىندە تىلىمەن سايرايتىندار كوپ. ءىسى از. جوق دەسەك تە بولادى. نە كورمە اشپايدى. كوشەدە تۇرعان ەسكەرتكىشتەردىڭ بارلىعى شىعارماشىلىققا جاتپايدى. تاپسىرىسپەن جاسالعان دۇنيەلەر. ال شىعارماشىلىق ءوز جۇرەگىڭنىڭ قالاۋىمەن تۋادى. شىنايى تالانتپەن بىرگە حالتۋرششيكتەر دە كەزدەسەدى. حالتۋرادا اقشا كوپ بولادى. ايىرا ءبىلۋ كەرەك. بۇگىندە كوپ مۇسىنشىلەر تاپسىرىسپەن ىستەيدى. بىراق، ولاردا شىعارماشىلىق جوق. سونسوڭ تۇلعالار اتتىڭ ۇستىندە وتىرعاننان جالىقتى. وزگە دە قاھارمان جەتەرلىك. الدار كوسە، قوجاناسىردى اسپەتتەپ، نەگە بەينەلەمەسكە؟! جۋىردا «مۇڭلىق-زارلىقتى» الماتىدا قويامىز دەگەن باستاما كوتەرىلىپ ەدى. قارجى ماسەلەسىمەن اياقسىز قالدى. بۇل مۇسىندە بەينەلەنگەن ارال، ءتورت سىردىڭ تولقىنى، تورتكۇل دۇنيەنىڭ ءتورت بۇرىشىنا ءمالىم دەگەنگە مەڭزەيدى. ارعى جاعىنان قاراساڭ، قوبىزبەن تۇرعان مۇڭلىقتى كورەسىڭ. مۇڭلىقتىڭ زامانىندا جازۋ از دامىعاندىقتان نە نارسە دە قوبىز ارقىلى جەتكەن. بەرگى جاعىنان قاراساڭ، الگى قوبىز قىلىشقا اينالادى. ول ەل قورعاعان باتىر بولعان-دى. ەكەۋى ەگىز ءومىر سۇرگەن. سول قالىپتارىندا كيىكتىڭ ۇستىندە وتىر. اناسى الپەشتەپ اسىراعان. وسىنداي تاربيەلىك-تالىمدىك ماڭىزى زور ءمۇسىن قويىلۋى كەرەك. قازىرگى مۇسىندەر قىتايدا جاسالىپ، مۇندا اكەلىنىپ جاتىر. ولاردىڭ قازاققا ايتارى دا، بەرەرى دە شامالى. وسىندايدا قازاقتا ونەر، تاريح جوق پا دەپ، قانىڭ باسىڭا شابادى. بىزدە ساياباق كوپ. جۇرت دەمالاتىن جەرلەرگە قازاق قىزىنىڭ ءپروتوتيپىن قويسا قۇبا-قۇپ. مىسالى، بايان-سۇلۋ، ەڭلىك-كەبەكتەرىمىزدى. جاستاردىڭ «قوزى-كورپەشتىڭ» اللەياسىندا كەزدەسەمىز دەگەنى قانداي عانيبەت! وسىلايشا جاستاردىڭ تاريحقا دەگەن قىزىعۋشىلىعى ارتادى. ۇرپاققا ماڭگىلىك وشپەس مۇرا بولىپ قالادى.
– جاستاردىڭ بەتالىسى قانداي؟
– جاستاردى اۋىزعا الماس بۇرىن اعا بۋىندى ءسوز ەتەيىكشى. حاكىمجان ناۋرىزباەۆ دەگەن اتاقتى ءمۇسىنشى الماتىداعى ابايدىڭ، م.اۋەزوۆتىڭ، شوقاننىڭ ءمۇسىنىن تۇڭعىش قويعان. بۇگىندە ۇمىتىلىپ بارادى. ءبىز وسى كىسىلەرمەن ماقتانساق كەرەك. مارقايا جازساق ەدى. ول – قازاق ءمۇسىن ونەرىندەگى تۇڭعىش ءمۇسىنشى. جاس قايىڭداي جەلكىلدەپ ءوسىپ جاستار دا جەتىلدى. جۋساننىڭ، قويدىڭ قيىنىڭ ءيىسىن سەزبەي، قالاداعى اسفالتتىڭ ۇستىندە وسكەن. كورەتىندەرى – شەتەلدىڭ كينوسى. ءتول تۇرمىس-سالتىمىز جوعالۋعا شاق. ءوز ەسەپتەرىندە وزدەرىن تىم زاماناۋيمىز دەپ ەسەپتەيدى. سوندا ءبىزدىڭ ۇلتشىلدىعىمىز، قازاقتىعىمىز قايدا قالدى؟ بويىن ءوز ۇلتىنان اۋلاق ۇستاعىسى كەلەتىن جاستاردىڭ بىزگە كەرەگى نە؟ مۇنداي جاستار كەز كەلگەن ۋاقىتتا وتانىن ساتۋعا بارادى. ەڭ الدىمەن، تاريحىمىزدى ۇمىتپاساق يگى ەدى.
– بۇگىنگە دەيىن قانشا كورمە وتكىزدىڭىز؟
– ەسىمدە قالماپتى. اسىرەسە، كەڭەس وداعىنىڭ كەزىندە كوپ وتكىزدىك قوي. قازىرگى ۋاقىتتا كورمە ماقسات ەمەس. بارلىعىن ۇيىمداستىرىپ، ۇيلەستىرەتىن، ءسويتىپ ىرىكتەيتىن كوركەمدىك كەڭەس جوق. اركىم ءارتۇرلى دەڭگەيدە جۇمىس ىستەۋدە. قاراجاتتان قينالعان كەي مۇسىنشىلەر ءدىننىڭ الۋان اعىمىمەن كەتۋدە. «مامبەتيزم» دەگەن ۇعىم شىققان عوي. ءبىزدى مەنسىنبەيدى، كەمىتەدى دەپ نامىستاناتىن جىگىتتەر دە بار.
– ءسىزدىڭ ءبىر تۋىندىڭىزدىڭ جارىققا شىعۋى ءۇشىن قانشا ۋاقىت كەتەدى؟
– مەن ۋاقىتپەن جۇمىس ىستەمەيمىن. كوڭىلىڭ بولماسا، تۇك تە شىقپايدى. تەز ارادا ءبىتىرۋ كەرەك دەگەن نيەتتە ىستەسەڭ، حالتۋرا شىعادى. كوزبوياۋشىلىق. سەن ونى ۇقپاۋىڭ مۇمكىن. بىراق، مەن ىشتەي ءتۇسىنىپ تۇرام. سىرتى جىلتىراعانىمەن، ءىشى ايتەۋىر جاسالۋى مۇمكىن. سەنى قورشاعان ورتا جاقسى بولۋى كەرەك. بىرەۋ توبەڭدە تۇرسا، ەشنارسە دە ونبەيدى. كوپ سۋرەتشىلەر وتباسىنان اجىراسىپ كەتتى.
– وسى كۇنى تاپسىرىس جايى قالاي؟ تاپسىرىس بەرەتىندەر بار شىعار…
– وتە از. ونەرگە قىزىعاتىنداردىڭ سانى الدەقايدا كەمىدى. پەندەلەر قۋ دۇنيەنىڭ سوڭىندا ءجۇر. ونەر تاسادا قالىپ قويدى. ارباتتا وتىراتىنداردىڭ جۇمىسى سۇلۋ ەكەن دەپ ويلاماڭىز. ءتۇرىڭىزدى كەلتىرۋدى بىلەدى. بىراق، ول جۇمىستى ەشقايدا قويا المايسىڭ. ويتكەنى، ەشقانداي قۇندىلىعى جوق. سۋرەت ونەرىندە مىناداي ءتامسىلدى ەستىگەنسىڭ بە؟ سالۆادور دالي دەگەن سۋرەتشى بۇكىل الەمگە تانىلعان. ءبىر كۇنى سول مەيرامحانادا دەمالىپ وتىرسا كەرەك. ول ءوزى وتە باي ءارى باققۋاتتى كىسى بولعان دەسەدى. جاڭاعى مەيرامحاناعا ءبىر قىز بەن جىگىت كىرەدى. جىگىتتىڭ داليدىڭ اس تا توك بايلىعىنان جاقسى حابارى بولسا كەرەك-ءتى. قاسىنداعى قالىڭدىعىنا افتوگروف الۋدى ۇسىنادى. قىمبات سۋسىن جىبەرەتىن شىعار دەپ جوريدى. قىز داليدان افتوگراف سۇرايدى. ال داليدىڭ قولىندا نە قاعازى، نە قالامى بولماعان سوڭ، قول سۇرتەتىن قاعازعا بىرنارسەنى سىزىپ بەرەدى. جىگىتى ەكەۋى كەلگەنىن بايقاعان ول: «مىناۋ– سەندەردىڭ تويلارىڭا سىيلىعىم»،-دەيدى. قىز داڭقتى سۋرەتشىگە سونشالىقتى ساراڭ بولار ما ەدى دەپ قاپالانادى. ءبىر جىلدان سوڭ، دالي ومىردەن وزادى. كەيىن الگى ايقىش-ۇيقىش سالىنعان سۋرەتتى ءبىر اۋقاتتى ادام ميلليون دوللارعا ساتىپ الىپتى. سويتسە، ول داليدىڭ ومىرىندەگى تۇڭعىش سالفەتكاعا سالعان سۋرەتى ەكەن. قىز سول كەزدە ونىڭ ۇلىلىعىنا باس ءيىپتى. پيكاسسولاردىڭ جۇمىستارىن مەنىڭ ءوزىم كوبىنەسە تۇسىنبەيمىن. ال بىراق وتە قىمبات باعالانادى. ونىڭ جۇمىسى ءالى كۇنگە دەيىن زەرتتەلۋدە. مەنىڭ دە باسىمدا ءبىر قىزىق ءجايت بولدى. ءبىر كۇنى قىزدىڭ بەينەسىن جاسادىم. سول ءمۇسىن وزىمە ەش ۇنامادى. الدىم دا، جەرگە لاقتىرىپ جىبەردىم. قازىرگى ءتۇرى ەندى ەكسپوناتقا ۇقسايدى. بابالاردان قالعان زات ىسپەتتى. قازىپ العان سياقتىمىن. شەدەۆر. بالكىم، بۇل بايان سۇلۋ، قىز جىبەكتەر شىعار. ناعىز تۋىندىعا اينالىپ شىعا كەلدى. سونداي قىزىق بۋىرقانعان ساتتەردى وتكەرەمىز.
– مۋزەيىڭىزدىڭ اشىلعانىنا قانشا بولدى؟
– مۋزەيىمدى حوببي ءۇشىن اشتىم. ادامدار رۋحاني تاربيە السىن دەگەن ماقساتتا كەلۋشىلەرگە قىزمەت كورسەتەدى.
كوركەمدىك كەڭەستىڭ قادىرى ءوتتى-اۋ!..
مارات ومىرسەرىكۇلى، دوتسەنت:
- بۇگىنگى ءمۇسىن ونەرىنىڭ ناسيحاتتالۋى قانداي؟
– ەكى استانامىزدا كەيىنگى كەزدەرى كوپ مۇسىندەر ورناتىلۋدا. وكىنىشكە قاراي، كوپشىلىگى اياق استىنان جارىققا ءۇستىرت شىعىپ جاتىر. ىرىكتەۋدەن وتكەنىمەن، شىندىعىنا كەلگەندە، ساپاسى سىن كوتەرمەيدى. كەڭەس ۋاقتىسىندا ۇكىمەت قاۋلى شىعاراتىن. ول قاۋلى سۋرەتشىلەر وداعىنا بەرىلىپ، ارنايى ماماندار تارتىلاتىن. جارىستان وتكەننەن سوڭ دا، تالاي سىنعا ىلىگەتىن. جەكە كوركەمدىك كەڭەس جۇمىس ىستەيتىن. قۇرامىنا عالىم، ساۋلەتشى، سۋرەتشى، مۇسىنشىلەر جاساقتالاتىن. باردى بار، جوقتى جوق دەيتىن ەدى. كوركەمدىك كەڭەستىڭ سىن تەزىنەن شىققان تۋىندىعا سۇرانىس اسا زور بولاتىن-دى. كورمەگە ءبىر اپتا قالعاندا عانا حابارلانامىز. نەگە ەكەنىن بىلمەيمىن، كەي كەزدە ەشقانداي دا حابار كەلمەيدى. بالا قۇرساقتا توعىز اي جاتۋى كەرەك قوي. سول سياقتى ءمۇسىننىڭ دە مەزگىلى بولادى. بۇل وڭاي جۇمىس ەمەس. ەكىنشىدەن، مۇنداي كۇردەلى جۇمىس تاجىريبەلى مامانعا بەرىلەتىن. كەيىنگى كەزدەرى ءمۇسىندى كەز كەلگەنى جاساي بەرەتىندى شىعاردى. اۋەسقويلار كوبىنەسە ساپاسىز ءمۇسىن جاسايدى.
– ءمۇسىن ونەرىمەن شۇعىلدانىپ كەلە جاتقانىڭىزعا قانشا ۋاقىت بولدى؟
– 1973 جىلى لەنينگرادتاعى اكادەميانى تامامداعاننان بەرى شۇعىلدانىپ كەلەمىن. وقۋدى بىتىرىسىمەن بۇكىلوداقتىق جارىس ءوتتى. ءاليا دەگەن باتىر قىزىمىزعا ارنالىپ مەنىڭ اۆتورلىعىمداعى ەسكەرتكىش ورناتىلدى. جامبىلدىڭ، ابايدىڭ، شوقاننىڭ، ماعجاننىڭ، ساكەن سەيفۋللين، شاكەن ايمانوۆ، ساتباەۆ، قىزىلوردادا اسقار توقماعامبەتوۆكە، ۇلى وتان سوعىسىنىڭ ارداگەرلەرىنە ارنايى قويىلعان ەسكەرتكىشتەر مەنىڭ شەبەرحانامنان شىققان جۇمىستار.
1993 جىلى مەنى 3 ايعا تۇركياعا جىبەرگەن. سوڭىنان ءۇش اي ون ءبىر جىلعا اينالدى. ستامبۋلدا ۇلى ابايدىڭ ەسكەرتكىشىن، انكارا قالاسىندا ماعجانعا، ابايعا، اۋەزوۆكە، اتاتۇرككە جانە تاعى باسقا تۇلعالارعا بىرنەشە ەسكەرتكىش جاسادىم. سودان قايتىپ كەلگەننەن كەيىن بالام سايات ەكەۋمىز ماسكەۋدە چيستوپرودنىي بۋلۆارىندا 2006 جىلى ابايدىڭ ەسكەرتكىشىن ورناتتىق. 2007 جىلى يراننىڭ استاناسى تەگەراندا تاعى دا دانا ابايدىڭ ەسكەرتكىشىن جاسادىق .
– جەكە شەبەرحاناڭىز بار ما؟
– بار. ۇلكەن وكىنىشكە قاراي، قازىرگى جاستارعا وتە قيىن. بۇرىن كەڭەس ۇكىمەتى جاقسى جاردەم بەرەتىن. قازىر جاستاردا نە شەبەرحانا، نە ءۇي جوق. شەبەرحانا ماسەلەسى – جاستار ءۇشىن كۇرمەۋى كوپ ماسەلە. سۋرەتشىلەر وداعىندا شەبەرحانا بەرىلۋدە. الايدا، اياقسىز قالىپ قويۋدا. ءالى ەشكىمگە تولىق عيمارات بەرىلمەدى. قولدارىندا قۇجاتتارى دا جوق.
– ءسىز كىمنىڭ شاپانىنان شىقتىڭىز؟
– مەنىڭ ۇستازىم – جۋراۆلەۆ نيكولاي ستەپانوۆيچ دەگەن ءمۇسىنشى. قازىر الماتىدا اباي اتىنداعى قازۇپۋ-دا ءدارىس بەرەدى. لەنينگرادتا پەنچۋك، انەكوشينداردىڭ شەبەرحاناسىنان شىقتىم.
قاراپايىم اقپار الاتىن ءباسپاسوز اشىلسا…
مالىك سۇلتانۇلى، پروفەسسور:
–ء مۇسىن ونەرىندەگى قوردالانىپ قالعان ماسەلەلەردى شەشۋ ءۇشىن ءسىزدىڭ قانداي ۇسىنىسىڭىز بار؟
– قازىر قاي جەردە قايسىبىر ءمۇسىن اشىلىپ جاتقاندىعىنان بەيحابارمىز. اركىم وزىنشە قيمىلداۋدا. كەڭەس كەزىندە ماسكەۋدەن سۋرەتشى، ءمۇسىنشى، ساۋلەتشىلەر جايلى جۋرنالدار وقىرمانعا جول تارتاتىن-دى. شەتەلدەن كەلەتىن باسىلىمدار دا بارشىلىق ەدى. سول جۋرنالداردان جەر-جەردەن حابار-وشار الىپ وتىرۋشى ەدىك. سۋرەتشىلەردىڭ ەڭبەگى كەڭىنەن ناسيحاتتالاتىن. قازىر جۋرنالعا اقشا جەتپەسە دە، ەڭ قۇرىعاندا رەسپۋبليكاعا تارالاتىن گازەت بولسا دەگەن تىلەگىمىز بار. اكادەميا قابىرعاسىنداعى قابىرعا گازەتى ەشكىمگە جەتپەيدى. ونەردىڭ كينو، تەاتر سالاسى جاپ-جاقسى ناسيحاتتالىپ ءجۇر عوي. سول سياقتى ءمۇسىن ونەرى دە كولەڭكەدە قالىپ قويماسا يگى ەدى. قاراپايىم اقپارات الاتىن ءباسپاسوز بولسا، ايىمىز وڭىنان تۋار ەدى. ءوز كوزىڭمەن كورمەگەن سوڭ، ادام ونىڭ قاندايلىعىن قايدان ايتسىن؟! بىرەۋدىڭ اۋزىنان ەستىپ، الدەبىر قورىتىندىعا كەلۋگە بولمايدى عوي. بولات ساپارۇلى وسىدان ەكى جىل بۇرىن ءوزى جاساعان ءمۇسىندى اشتى. تالايلار تاڭداي قاقتى. ەندى بىرەۋلەرگە ۇناماي قالدى. ءوزىم كورىپ، ءمۇسىننىڭ ءاپ-ادەمى ەكەنىن بايقادىم. ەشقانداي كەمشىلىك اڭعارمادىم. ونەر اكادەمياسىنا سوڭعى جيىرما جىلدا ەشبىر اكىم باسىن سۇقپادى. بيىل اۋدان اكىمى كەلىپ، ستۋدەنتتەردىڭ جۇمىستارىن كورىپ، ءوز ويىن ايتتى. بالالارعا ءوز ۇسىنىسىن ءبىلدىردى. اتقامىنەر ازاماتتاردىڭ اكادەمياعا ات باسىن بۇرۋى جاقسى ءۇردىس قوي.
ءوزىمنىڭ ويىمشا، ەسكەرتكىش تە يدەولوگيالىق قۇرالدىڭ ءبىر ءتۇرى. ول كەرەگىنە كەرەك. دەگەنمەن، ادام دەمالىپ جۇرگەندە كورەتىن، ايالدايتىن ساياباقتارعا ءجاي مۇسىندەر قويىلسا. قايسىبىر ءمۇسىنشى جەكە شەبەرحاناسىندا ەسكەرتكىشتەن وزگە كوپتەگەن ءوز قيالىنان تۋعان الۋان مۇسىندەر جاسايدى.
– قازىر قانداي ءمۇسىن جاساۋداسىز؟
– اباي اتىنداعى قازۇپۋ-دىڭ الدىندا تۇرعان ابايدىڭ ەسكەرتكىشىن ءوزىم ىستەگەنمىن. «I club»-تاعى ەكى ءمۇسىندى جاسادىم. تورعايدا شاقشاق جانىبەكتىكى بار. وتكەن جىلى بولات ساپارۇلى ەكەۋمىز ماقانشىدا قابانباي باتىردى قويدىق. قازىر ۇكىلى ىبىرايمەن ءجۇرمىن.
– ءسىزدى جاقىندا شەبەرحاناعا قول جەتكىزدى دەپ ەستىدىك. راس پا؟
– ساتباەۆ كوشەسىندە بۇرىن كومبينات بولعان-دى. 50 ادامداي ىستەگەنبىز. شۇكىر، شەبەرحانا الدىم. ءۇش جىل بويى كۇتتىم. بىراق، ءالى ءىشىنى كىرۋگە رۇقسات جوق. جىل سايىن 6 بالا وسى اكادەميانى بىتىرەدى. تاڭسىقباەۆ اتىنداعى ۋچيليششەدەن دە تۇلەكتەر بار دەگەندەي، جىلدا ون شاقتى مامان تۇلەپ ۇشۋدا. بۇرىن جاقسى باعدارلامالار بار ەدى. 80-جىلدارى وكىمەت كوپ كومەكتەسەتىن. قازىر ونىڭ ءبىرى دە جوق. جاس مۇسىنشىلەر قاتتى قينالۋدا.
ءمولدىر كەنجەباەۆا
