قازاقستان ۇكىمەتى قازاقستاندىقتاردىڭ بالىق اۋلاۋ جانە اۋىلشارۋاشىلىق وندىرىسىندە ماۋسىمدىق جۇمىس ىستەۋى ءۇشىن وڭتۇستىك كورەيا ۇكىمەتىنەن رۇقسات سۇرايدى، دەپ جازادى «كازاحستانسكايا پراۆدا» ءسىم وكىلى ايبەك سمادياروۆقا سىلتەمە جاساپ.
بۇل پرەزيدەنت قاسىم-جومارت توقاەۆتىڭ تاپسىرماسى بويىنشا جاسالدى، - دەدى ايبەك سمادياروۆ. قازىرگى ۋاقىتتا قازاقستاندىقتاردىڭ وڭتۇستىك كورەيادا زاڭدى جۇمىسپەن قامتىلۋى ەكىجاقتى ىنتىماقتاستىقتا قاراستىرىلماعان.
كورەياعا 30 كۇنگە ۆيزاسىز كىرۋ جۇمىسقا ورنالاسۋدى قامتاماسىز ەتپەيدى، سوندىقتان كورەياعا وسى ماقساتتا جىبەرەتىن بارلىق قازاقستاندىق كومپانيالار زاڭسىز جۇمىس ىستەيدى.
ءسىم سەۋل اۋەجايىندا «زاڭسىزدىققا» شاعىمدانعان قازاقستاندىق ايەلدىڭ ىسىنە قاتىستى تۇسىنىكتەمە بەردى. ايەل بيلەت ساتىپ الىپ، جۇمىس بەرۋشى كومپانيا ارقىلى قوناقۇيگە تاپسىرىس بەرگەن، بىراق شەكاراشىلار ونىڭ كىرۋىنە تىيىم سالعان. ول ايەلمەن بىرگە تاعى 70 قازاقستاندىق جەرتولەگە جەتكىزىلدى، ولارعا تاماق ساتىپ الۋعا دا رۇقسات بەرىلمەدى. ايەلدىڭ قالتاسىندا تەك تەڭگە بولعان، سوندىقتان قايتۋ بيلەتىن وعان قىزى ساتىپ الۋعا ءماجبۇر بولدى.
قازاقستاندىقتار وڭتۇستىك كورەيادا ۆيزاسىز 30 كۇن بولا الادى. وسى ەلدە وقۋدى، جۇمىس ىستەۋدى نەمەسە تۇرۋدى جوسپارلاعاندار ءۇشىن بۇل ەرەجە قولدانىلمايدى. رەسمي مالىمەت بويىنشا كورەيادا 10 مىڭنان استام قازاقستاندىق زاڭسىز ءجۇر.
10 قازاندا جاريالانعان ءسىم-ءنىڭ بۇل مالىمەتتەرى رەسپۋبليكانىڭ ءبىرىنشى پرەزيدەنتى نۇرسۇلتان نازارباەۆتىڭ ناۋرىزدا قازاق اكتريساسى ويناعان قىرعىز ميگرانتى تۋرالى فيلمگە تۇسىنىكتەمە بەرگەن ءسوزىن جوققا شىعارادى: «قۇدايعا شۇكىر، مەن ءاردايىم تاۋەلسىزدىكتىڭ 27 جىلىندا قازاقستاندىقتار ەش جەردە ميگرانت بولعان ەمەس دەپ ايتتىم» دەگەن بولاتىن ەلباسى.
21 قازاندا وڭتۇستىك كورەيادا جولدا بالانى قاعىپ كەتىپ، وقيعا ورنىنان قاشىپ كەتكەن ميگرانت قازاقپەن بولعان وقيعادان كەيىن سەۋل زاڭسىز شەتەلدىكتەردى كوشىرۋ ەرەجەلەرىن قاتاڭداتۋ تۋرالى شەشىم قابىلدادى.
"ادىرنا" ۇلتتىق پورتالى
