«تەڭگە 30 پايىزعا قۇنسىزدانادى» - ساراپشى

785

اقش-تىڭ ەڭ ءىرى ينۆەستيتسيالىق بانكتەرىنىڭ ءبىرى - Bank of America (BofA) ساراپشىلارى «2020 جىلدىڭ باسىندا قازاقستانعا تەڭگەنى 30 پايىزعا قۇنسىزداندىرۋعا تۋرا كەلەدى» دەپ مالىمدەدى. اتالمىش بانك ساراپشىلارىنىڭ بايىپتاۋىنشا، قازاقستان مۇنداي ارەكەتكە ەرىكسىز بارادى. «ەگەر ولاي ەتپەسە بۇل ەلدى ەكونوميكالىق تۇراقسىزدىق كۇتىپ تۇر» دەيدى حالىقارالىق ساراپشىلار.
حالىقارالىق ساراپشىلار العا تارتىپ وتىرعانداي، الەمدىك نارىقتاعى مۇناي باعاسىنىڭ ءتۇسۋى، رەسەي ءرۋبلىنىڭ شەگىنە جەتە قۇلدىراۋى، رەسەي مەن قازاقستان اراسىنداعى ساۋدا-ساتتىق بايلانىسىنىڭ تومەندەۋى جانە ساۋدا-ساتتىق بايلانىسىندا باعا تەپە-تەڭدىگىنىڭ بولماۋى ماسەلەنى وسىعان اكەلىپ تىرەپ وتىر. اقش بانكىنىڭ جورامالىنشا، ءبىزدىڭ ۇلتتىق ۆاليۋتامىز بيىلعى جىلدىڭ سوڭىنا دەيىن قۇنسىزدانىپ، ەلدە ءبىر دوللار 420 تەڭگەدەن اسىپ كەتۋى عاجاپ ەمەس.
ال بۇعان قاتىستى وتاندىق ساراپشىلارىمىز، ۇلتتىق بانكتىڭ تەڭگەنى قولداۋعا قاتىستى ساياساتىنا بايلانىستى وتاندىق ەكونوميست-ساراپشىلارىمىزدىڭ ءبىرازى «تەڭگەنى قولداۋدا جالعىز ۇلتتىق بانك پەن ۇكىمەتتىڭ ساياساتى ازدىق ەتەدى. الەم بويىنشا بىرقاتار ەلدەردىڭ ۆاليۋتاسى ءتۇسىپ جاتقاندا ءبىز تەڭگەنى قاشانعا دەيىن تەجەپ ۇستاي الار ەكەنبىز» دەگەن ويلارىن العا تارتىپ وتىر.
بۇعان قاتىستى ەكونوميكا عىلىمىنىڭ دوكتورى، پروفەسسور، بەيسەنبەك زيابەكوۆ،
«قازىر ۇلتتىق بانك اقشا-نەسيە ساياساتىن رەتتەي الىپ وتىر. دەگەنمەن، دەۆالۆاتسيانى بولدىرۋ نەمەسە بولدىرماۋ تەك قانا ۇلتتىق بانكتىڭ قولىندا تۇرعان جوق. بىلەسىز، كورشىلەس رەسەي ءرۋبلى كۇن سايىن قۇنسىزدانۋدا. الەمدە شيكىزات باعاسى تۇسۋدە. الەم بويىنشا بىرقاتار ەلدەردىڭ ۇلتتىق ۆاليۋتاسى قۇنىن ءتۇسىردى. وسىلايشا شيكىزات باعاسى تومەندەپ، ەكسپورتتان تۇسەتىن دوللار كولەمى شەكتەلىپ وتىرعان كەزدە، تەڭگەنىڭ باعامىن تەجەپ ۇستاۋ – ءبىزدىڭ التىن-ۆاليۋتا قورىمىزعا قاۋىپ توندىرەتىن جايت. وسى ۋاقىتقا دەيىن ۇلتتىق بانك تەڭگەنىڭ قۇنىن ۇستاپ تۇردى. ەندى بۇدان ءارى ۇستاپ تۇرۋعا مۇمكىندىك تە بولماي قالا ما دەپ ويلايمىن. ويتكەنى الەمدىك ەكونوميكالىق احۋالدىڭ قيىنداي تۇسەتىنى بارشاعا بەلگىلى.سوندىقتان ءبىز تەڭگەنى ۋاقىتشا عانا تەجەپ ۇستاپ تۇرا الامىز. ءبىز شيكىزاتقا تاۋەلدى ەل بولعاندىقتان، شيكىزات باعاسى تۇسكەن سايىن بىزگە كەلەر ءتۇسىمنىڭ دە ازاياتىنى ءمالىم. ال مۇنىڭ ارتى ۇلتتىق ۆاليۋتامىزدىڭ قۇنسىزدانۋىنا اپارىپ سوقتىراتىنى داۋسىز»،-دەدى.
جالپى، تەڭگە باعامىنا قاتىستى قارجىگەر ارمان ءمۋسيننىڭ پايىمداۋىنشا، ەگەر الداعى ەكى ايدا الەمدىك نارىقتا مۇناي باعامى 65 دوللارعا كوتەرىلىپ، رەسەي ءرۋبلى ەڭسە تىكتەر بولسا، سونداي-اق قازاقستان نارىعىندا رۋبل 5,2 تەڭگەنىڭ كولەمىنە كوتەرىلەر بولسا، وندا ۇلتتىق بانك تەڭگەنىڭ باعامىن 380-388 تەڭگەنىڭ ارالىعىندا ۇستاپ تۇرا الادى.
«بىراق، كەشەلى بەرى حالىقارالىق ەكونوميكالىق دامۋ ورتالىعىنىڭ ساراپشىلارى مۇناي باعاسىنىڭ ارزانداۋىنا قاتىستى رەسەيدىڭ 2020 جىلى بيۋدجەت كولەمى تاعى دا دە ازاياتىنىن، ءرۋبلدىڭ باعامى تاعى دا 20 پايىزعا قۇنسىزدانۋى مۇمكىن ەكەنىن قۇلاققاعىس جاسادى. مۇندايدا تەڭگەنىڭ 30 پايىزعا دەۆالۆاتسيالاۋعا تۋرا كەلەدى»،-دەيدى قارجىگەر.
بۇل رەتتە ەكونوميست-عالىم بەيسەنبەك زيابەكوۆ:
«رەسەيدىڭ ورتالىق بانكىنە ءرۋبلدى تەجەپ ۇستاپ تۇرۋ ارزانعا سوعىپ تۇرعان جوق. ءبىزدىڭ ەكونوميكامىز رەسەيگە بايلانىپ تۇرعاندىقتان بۇل جەردە رەسەيدىڭ ۆاليۋتاسىنىڭ قۇنسىزدانۋى بىزگە اسەر ەتپەيدى دەۋگە نەگىز جوق. ازىرگە ۇلتتىق بانك تەڭگەنىڭ باعامىن قالىپتى ۇستاپ تۇرا الادى. بىراق بۇل ۋاقىتشا قۇبىلىس. ءبىزدىڭ ەكونوميكامىز تىكەلەي مۇنايدان تۇسەتىن تۇسىممەن تولىعىپ وتىرعاندىقتان بۇل جەردە ءبىز الەمدىك مۇناي باعاسىنا قاتىستى، ەلگە تارتىلىپ جاتقان ينۆەستيتسيالارعا قاتىستى دا بولجام جاساعانىمىز ابزال. ەگەر بولاشاقتا مۇنايدان تۇسەتىن ءتۇسىم ارتسا تەڭگە باعامى دا نىعايماق، ءتۇسىم ازايسا وندا تەڭگەنى دەۆالۆاتسيالاۋعا تۋرا كەلەدى. بۇل ەندى بارشاعا بەلگىلى جايت. ال قازىر ءبىز ەل ەكونوميكاسىن دوللاردان ارىلتۋعا، ۇلتتىق قوردان قارجى ءبولىپ وتاندىق ءوندىرىستى قولداۋعا، سىرتتان ينۆەستيتسيا تارتۋعا كۇش سالىپ جاتىرمىز. ەگەر مۇنىڭ بارلىعى ساۋاتتى، ورىندالسا، ءبىز داعدارىستان ۇتىپ شىعۋىمىز دا مۇمكىن. سوندىقتان قوردان بولىنگەن قارجىنى قاتاڭ باقىلاۋدا ۇستاپ، ءاربىر سالانى قولداۋعا بەيىل تانىتقانىمىز ءجون...

قارلىعاش زارىقحانقىزى،
"ادىرنا" ۇلتتىق پورتالى

 

 

پىكىرلەر