العان جارىڭ جاقسى بولسا

2853
Adyrna.kz Telegram

قاز داۋىستى قازىبەك ەل ارالاپ ءجۇرىپ ءبىر ۇيگە ءتۇسىپتى.

 ەرىنىڭ ۇيدە جوعىنا قاراماستان، ايەلى قوناقتاردى جاقسى كۇتىپتى. سوندا قازىبەك: «ايەلى مۇنداي، مۇنىڭ ەرى قانداي ەكەن؟» – دەپ تاماشالاپ، جۇرە قويماي وتىرعاندا، ۇيىنە ەرى كەلەدى. قاراسا، ەرى ۇيا بەرىكتەۋ عانا ادام ەكەن، قازىبەك ازىلدەپ، جولداستارىنا قاراپ بىلاي دەپتى:

جاراڭدار، بۇل ءسوزىمنىڭ ءمانىسى بار،

ءمانسىزدىڭ ماندىمەنەن نە ءىسى بار؟

قۇدانىڭ قۇدىرەتىنە قاراپ تۇرسام،

جاپالاق ۇيرەك العان ءبىر ءىسى بار.

سوندا ايەل قازىبەكتىڭ ءسوزىن ءتۇسىنىپ قالىپ:

بيەكە، ول ءسوزىڭنىڭ ءمانىسى بار،

ءمانسىزدىڭ مادىمەنەن كوپ ءىسى بار.

جاپالاق ىلگەن قۇسىن مىسە تۇتپاي،

الدە دە قوڭىر قازدان دامەسى بار، – دەپتى.

سوندا قازىبەك ايەلگە ريزا بولىپ:

بالاڭ جامان بولسا،

كورىنگەننىڭ مازاعى ەمەس پە!

اتىڭ جامان بولسا،

شىبىن جاننىڭ ازابى ەمەس پە!

قاتىن جامان بولسا،

بۇل جالعاننىڭ توزاعى ەمەس پە!

تۋعان بالاڭ جاقسى بولسا،

ءتان مەن جاننىڭ شىراعى ەمەس پە!

مىنگەن اتىڭ جاقسى بولسا –

بۇل دۇنيەنىڭ پىراعى ەمەس پە!

العان جارىڭ جاقسى بولسا،

جيعانىڭ مەن مەيمانىڭنىڭ تۇراعى ەمەس پە! – دەپتى.

 

پىكىرلەر