تۇركىستان وبلىسىنىڭ قارجى باسقارماسى «قىران» فۋتبول كومانداسىنىڭ باسشىلىعىنا ونىڭ شارتتارىن ساقتاماعاندىقتان سەنىم شارتىن بۇزعانى تۋرالى حابارلاما جىبەردى دەپ حابارلايدى "كازپراۆدا".
سەبەبى، ويىنشىلار جەتى اي بويى جالاقى المادى دەگەن حابار تاراعان بولاتىن. الدىمەن مۇنداي مالىمدەمەلەر الەۋمەتتىك جەلىلەردى تولتىرىپ جىبەردى، سودان كەيىن سپورت شەنەۋنىكتەرى وتكەن اپتادا تۇركىستاندا وتكەن ءباسپاسوز كونفەرەنتسياسىنا جۋرناليستەردى شاقىرىپ، جاعدايعا تۇسىنىك بەردى.
وندا تۇركىستان وبلىسىنىڭ اكىمدىگى «قىران» فۋتبول كومانداسىنداعى جاعدايعا الاڭداۋلى ەكەندىگىن ايتتى، سەبەبى "قىراننىڭ" ويىنشىلارى جەتى ايدان بەرى جالاقى الماعان.
بۇعان دەيىن كلۋب يەلەرى وبلىس اكىمىنىڭ ورىنباسارى جانە ءتيىستى باسقارما باسشىلارىمەن كەزدەسكەن. كەزدەسۋدە تاراپتار قارجىلىق ماسەلەلەردى تالقىلادى. فۋتبول كومانداسىنىڭ جاعدايىمەن تانىسقاننان كەيىن، ايماق باسشىلىعى، ەڭ الدىمەن، سپورتشىلار الدىنداعى قارىزدى وتەۋ كەرەكتىگىن ايتتى.
وبلىستىق قارجى باسقارماسىنىڭ حابارلاۋىنشا، سەنىم بىلدىرىلگەن تۇلعا كەلىسىمشارت تالاپتارىن ساقتاماعان. ول وبلىستىق دەنە شىنىقتىرۋ جانە سپورت باسقارماسىمەن كەلىسپەي، قىزمەتكەرلەردىڭ جالاقىسىن كوتەرىپ، ديرەكتورلاردى بىرنەشە رەت اۋىستىرعانى بەلگىلى بولدى. سونىمەن قاتار، بيىل وبلىستىق بيۋدجەتتەن بولىنگەن 281 ميلليون تەڭگە باسقا ماقساتتارعا پايدالانىلعان. اتاپ ايتقاندا، قاراجات ەكىنشى ليگاعا قاتىسۋ ءۇشىن «قىران» فۋتبول كلۋبىندا تاعى ءبىر كوماندا قۇرۋعا جۇمسالدى.
زاع بۇزۋشىلىقتار انىقتالعاننان كەيىن وبلىستىق قارجى باسقارماسى «قىران» فۋتبول كومانداسىنىڭ باسشىلارىنا كەلىسىمشارت تالاپتارىن ورىنداماعانى تۋرالى حابارلاما جىبەردى. كەلىسىم-شارت بۇزىلعان كۇننەن باستاپ 10 كۇن ىشىندە مۇلىك مەملەكەتكە قايتارىلۋى كەرەك. ەگەر سەنىم بىلدىرىلگەن تۇلعا تالاپتارعا كەلىسپەسە، باسشىلىق سوتقا جۇگىنۋ قۇقىعىن وزىندە قالدىرادى.
ەسكە سالايىق، «قىران» فۋتبول كومانداسى 2017 جىلدىڭ جازىندا مارتەبەسىن ساقتاي وتىرىپ، بەلگىلى ءبىر ازاماتقا 10 جىل مەرزىمىندە سەنىمگەرلىك باسقارۋعا بەرىلگەن بولاتىن. «قىراندا» مەنەدجەردى الۋعا تەندەرگە ءۇش ادام قاتىستى. ولاردىڭ ەكەۋى فۋتبول كلۋبىنىڭ وكىلدەرى - سول كەزدەگى ديرەكتور جانە سپورت جەتەكشىسى بولعان. ول ەكەۋىنەن بولەك قاتىسقان تاعى ءبىر ازامات تەندەردى جەڭىپ العان ەدى.
ۇلتتىق ەكونوميكا مينيسترلىگى بەكىتكەن ەرەجەلەرگە سايكەس مەملەكەت، قۇرىلتايشى جانە كلۋبتى باسقارۋدى قولعا العان تۇلعا اراسىندا سەنىم شارتى جاسالدى. وندا بارلىق جاعداي قاراستىرىلعان. اتاپ ايتقاندا، مەنەدجەر قۇرىلىمدى دامىتۋعا بەلگىلى ءبىر ينۆەستيتسيالار سالۋى كەرەك. مەملەكەت ونى قارجىلاندىرۋدى جالعاستىرۋعا ۋادە بەردى، بىراق سونىمەن بىرگە مەنەدجەرگە ءوزىن دالەلدەۋگە مۇمكىندىك بەردى.
