فوتو: Transfermarkt
وزبەكستان ۇلتتىق قۇراماسى مەن تاشكەنتتىڭ «پاحتاكور» كلۋبىنىڭ ويىنشىلارى يگور سەرگەەۆ پەن حوجياكبار اليجونوۆ يراندىق «پەرسەپوليس» كلۋبىنان جوعارى قارجىلىق ۇسىنىستار الدى. الايدا فۋتبولشىلار بۇل ۇسىنىستارعا ءارتۇرلى شەشىم قابىلدادى. بۇل تۋرالى فەرعانا اگەنتتىگى جازدى، دەپ حابارلايدى “ادىرنا”.
جۋرناليست نارزۋللا سايدۋللاەۆتىڭ حابارلاۋىنشا، يگور سەرگەەۆ يراندىق كلۋبتىڭ ۇسىنىسىنا كەلىسىم بەرىپ، قاڭتار ايىنىڭ باسىندا تەگەرانعا اتتانعان. ول «پەرسەپوليسپەن» ءبىر جارىم جىلدىق كەلىسىمشارتقا قول قويىپ، كەيىن كوماندامەن بىرگە كاتاردا وقۋ-جاتتىعۋ جيىنىنا قاتىستى. كەيبىر دەرەكتەرگە سۇيەنسەك، سەرگەەۆكە ۇسىنىلعان كەلىسىمشارتتىڭ قۇنى 1,5 ميلليون اقش دوللارىنا دەيىن جەتكەن.
سەرگەەۆكە رەسەيدىڭ سامارا قالاسىنداعى «كرىليا سوۆەتوۆ» كلۋبىنان دا ۇسىنىس تۇسكەن. الايدا «فەرعانا» باسىلىمىنا بەرگەن سۇحباتىندا كوماندانىڭ باس باپكەرى ماگومەد اديەۆ كەلىسىمگە كەلە الماعاندارىن ايتتى. ونىڭ سوزىنشە، فۋتبولشىنىڭ قارجىلىق تالاپتارى كلۋب مۇمكىندىگىنەن جوعارى بولعان. سونىمەن قاتار، سەرگەەۆتىڭ قولىندا «پەرسەپوليستىڭ» ناقتى ۇسىنىسى بولعانى دا شەشىم قابىلداۋعا اسەر ەتكەن.
ال حوجياكبار اليجونوۆ يراندىق كلۋبتىڭ ۇسىنىسىنان باس تارتتى. «پاحتاكور» ويىنشى ءۇشىن وتەماقى تالاپ ەتكەن، ال «پەرسەپوليس» ونى تولەۋگە دايىن بولعان. دەگەنمەن كەلىسسوزدەر ءجۇرىپ جاتقان ۋاقىتتا يراندا الەۋمەتتىك-ساياسي احۋال كۇردەلەنىپ، جاپپاي نارازىلىقتار باستالدى. سونىڭ ناتيجەسىندە اليجونوۆ شەتەلگە كەتۋدەن باس تارتىپ، «پاحتاكورمەن» بىرگە ەل چەمپيوندىعىن جەڭىپ الۋدى ماقسات ەتەتىنىن مالىمدەدى.
ايتا كەتەيىك، بۇعان دەيىن يراننىڭ «فۋلاد» كلۋبىندا ويناعان وزبەكستان قۇراماسىنىڭ قاقپاشىسى وتكىر يۋسۋپوۆ نامانگاننىڭ «ناۆباحور» كومانداسىنا قايتا ورالعان بولاتىن.
سوڭعى جىلدارى يران فۋتبول ليگاسى ورتالىق ازيا ويىنشىلارى ءۇشىن تارتىمدى باعىتقا اينالىپ كەلەدى. ساياسي تۇراقسىزدىققا قاراماستان، ايماق فۋتبولشىلارى يراندىق كلۋبتاردىڭ قوماقتى قارجىلىق ۇسىنىستارىنا قىزىعۋشىلىق تانىتۋدا. 2026 جىلدىڭ قاڭتار ايىنداعى دەرەك بويىنشا، يران چەمپيوناتىندا 39 شەتەلدىك فۋتبولشى تىركەلگەن. ولاردىڭ ىشىندە ەڭ كوبى وزبەكستاندىقتار— 5 ويىنشى، سونداي-اق 2 تاجىكستاندىق جانە 1 قىرعىزستاندىق بار. وسىلايشا، يرانداعى ءاربىر بەسىنشى لەگيونەر ورتالىق ازيادان شىققان.
