14 ماۋسىمدا ۆاشينگتوندا اقش ارمياسىنىڭ 250 جىلدىعىنا ارنالعان كەڭ اۋقىمدى اسكەري پاراد ءوتتى، دەپ حابارلايدى "ادىرنا" ۇلتتىق پورتالى.
DW حابارلاعانداي، پاراد اقش پرەزيدەنتى دونالد ترامپتىڭ 79 جاسقا تولعان كۇنىمەن تۇسپا-تۇس كەلەن. پاراد بارىسىندا پرەزيدەنت حالىق الدىندا ءسوز سويلەپ، جاڭا ساربازداردى سالتاناتتى تۇردە اسكەر قاتارىنا قابىلدادى.
پارادقا شامامەن 6600 اسكەري قىزمەتكەر، 50 تىكۇشاق جانە M1 Abrams تانكتەرى قاتىسقانى حابارلاندى. وسىعان بايلانىستى قالادا قاۋىپسىزدىك شارالارى كۇشەيتىلگەن.
ترامپ جۇبايى مەلانيامەن بىرگە سالتاناتتى شاراعا قاتىسىپ، تريبۋنادان پارادتى تاماشالادى.
"اقش ارمياسىنا قوش كەلدىڭىزدەر! ومىرلەرىڭىزدە ساتتىلىك تىلەيمىن!" – دەدى پرەزيدەنت ترامپ.ءدال وسى كۇنى اقش-تىڭ بىرنەشە قالاسىندا دونالد ترامپتىڭ ساياساتىنا قارسى نارازىلىق شەرۋلەرى ءوتتى. «پاتشاعا جول جوق» ۇرانىمەن وتكەن ميتينگتەر ۇيىمداستىرىلدى. ەرەۋىلشىلەر اۆتوريتاريزمگە، ميللياردەرلەر مۇددەسىن كوزدەيتىن ساياساتقا جانە دەموكراتيانىڭ ميليتاريزاتسيالانۋىنا قارسىلىق ءبىلدىرۋدى ماقسات ەتكەن. نارازىلىق شارالارى نيۋ-يورك، فيلادەلفيا، حيۋستون، لوس-اندجەلەس سەكىلدى قالالاردا ءوتتى. الايدا ميننەسوتا شتاتىندا جوسپارلانعان ميتينگ سوڭعى ساتتە توقتاتىلدى. سەبەبى سول كۇنى شتاتتا دەموكراتيالىق پارتيانىڭ ەكى ساياساتكەرىنە شابۋىل جاسالىپ، بىرەۋى قازا تاپتى. كۇدىكتىنىڭ كولىگىنەن «پاتشاعا جول جوق» دەپ جازىلعان قاعازدار تابىلعان.
ۇقساس جاڭالىقتار
