قازاقستان مەن ۇلىبريتانيا قورعانىس ۆەدومستۆولارى اراسىنداعى اسكەري ىنتىماقتاستىق جوسپارىنا قول قويىلدى، دەپ حابارلايدى “ادىرنا”.
قۇجات ەكى ەلدىڭ قورعانىس ۆەدومستۆولارى اراسىنداعى ءوزارا ءىس-قيمىلدىڭ نەگىزگى باعىتتارىن ايقىندايدى.
قول قويۋ ءراسىمى لوندوندا قازاقستان قورعانىس مينيسترلىگى اپپاراتىنىڭ باسشىسى پولكوۆنيك ەربول قۇماربەكۇلى باستاعان قازاقستاندىق دەلەگاتسيانىڭ رەسمي ساپارى اياسىندا ءوتتى.
ۆەدومستۆو مالىمەتىنشە، تاراپتار قازىرگى ماسەلەلەرمەن قاتار اسكەري ارىپتەستىكتى دامىتۋ بويىنشا بولاشاق قادامداردى تالقىلادى. نەگىزگى نازار بىتىمگەرشىلىك قىزمەتكە، تىلدىك دايارلىققا جانە قازاقستاندىق وفيتسەرلەردى ۇلىبريتانيانىڭ اسكەري اكادەميالارىندا وقىتۋعا اۋدارىلدى.
«ءىس-شارا قورىتىندىسى بويىنشا قازاقستان رەسپۋبليكاسىنىڭ قورعانىس مينيسترلىگى مەن ۇلىبريتانيا جانە سولتۇستىك يرلانديا بىرىككەن كورولدىگىنىڭ قورعانىس مينيسترلىگى اراسىندا 2025–2026 جىلدارعا ارنالعان اسكەري ىنتىماقتاستىق جوسپارىنا قول قويىلدى» دەپ جازىلعان حابارلامادا.
