بۇۇ باس اسسامبلەياسىنىڭ 79-سەسسياسىندا "بۇكىلالەمدىك جىلقى كۇنى" بەكىتىلدى، دەپ حابارلايدى "ادىرنا" ۇلتتىق پورتالى.
11 شىلدە - رەسمي تۇردە بۇكىلالەمدىك جىلقى كۇنى بولىپ جاريالاندى. بۇل باستامانى موڭعوليا پرەزيدەنتى ۋحنااگين حۋرەلسۇح كوتەرىپ، جوباعا الەمنىڭ بارلىق وڭىرىنەن 56 مەملەكەت قوسىلىپ، بىرلەسكەن اۆتور رەتىندە قولدادى. ولاردىڭ قاتارىندا اۆستريا، باحرەين، برازيليا، قىتاي، وڭتۇستىك كورەيا، رەسەي، گەرمانيا، جاپونيا، تۇركيا، پورتۋگاليا جانە ورتالىق ازيانىڭ بەس ەلى بار.
بۇۇ ازىق-تۇلىك جانە اۋىل شارۋاشىلىعى ۇيىمىنىڭ مالىمەتىنشە، بۇگىندە الەمدە 57 ميلليوننان استام ءۇي جىلقىسى بار. جىلقىلار كولىك، سپورت، تۋريزم، دەمالىس، مەديتسينا مەن تاعام ءوندىرىسى سالالارىندا قولدانىلادى. الايدا، سوڭعى جىلدارى جىلقى سانى ازايىپ كەلەدى. بۇعان تەحنيكالىق پروگرەسس، ەكونوميكالىق باعىتتاردىڭ وزگەرۋى، كليمات پەن ەكولوگيالىق جاعدايلاردىڭ وزگەرۋى، سونداي-اق ادامنىڭ ءومىر سالتىنىڭ ترانسفورماتسياسى سەبەپ بولىپ وتىر
جاڭا مەرەكەنى ەنگىزۋدەگى باستى ماقسات – الەم جۇرتشىلىعىنىڭ نازارىن جىلقىنىڭ ادامزات وركەنيەتىندەگى ەرەكشە رولىنە اۋدارۋ، جىلقى تۇقىمدارىن ساقتاۋ مەن دامىتۋعا قولداۋ ءبىلدىرۋ جانە اتقا ءمىنۋ مادەنيەتىن دارىپتەۋ. سونىمەن قاتار، بۇل كۇن جىلقى وسىرۋمەن اينالىساتىن حالىقتاردىڭ تاريحي مۇراسىن قۇرمەتتەۋگە، اسىرەسە كوشپەلى حالىقتاردىڭ ءومىر سالتى مەن مادەنيەتىن ناسيحاتتاۋعا باعىتتالعان.
ۇقساس جاڭالىقتار
