3 ماۋسىم كۇنى تاڭەرتەڭ الماتى قالاسىنىڭ الاتاۋ اۋدانىنىڭ شەتىندە ورنالاسقان رايىمبەك داڭعىلى بويىندا ەكى كولىك سوقتىعىسىپ، ەكى ادام زارداپ شەكتى، دەپ حابارلايدى "ادىرنا" ۇلتتىق پورتالى.
ەكى كولىك تە باتىس باعىتتا قوزعالعان. ءبىر كولىكتىڭ جۇرگىزۋشىسى ايەل بولعان. ول ورتاڭعى جولاقپەن كەلە جاتىپ، الماتى شەتىندە ورنالاسقان جانارماي قۇيۋ بەكەتىنە بۇرىلماق بولعان.
سول ساتتە ونىڭ وڭ جاعىمەن قاتارلاس ەكىنشى كولىك كەلە جاتقان. ونىڭ جۇرگىزۋشىسى بۇل مانەۆردى كۇتپەگەن، سوقتىعىسۋدان قاشۋعا تىرىسقانىمەن، ايەل ادام بۇرىلۋىن جالعاستىرعان. ناتيجەسىندە ەكى كولىك سوقتىعىسىپ، جانارماي بەكەتىنە كىرىپ كەتكەن. جولىندا تۇرعان جانارماي كولونكاسىن سوعىپ، ورنىنان جۇلىپ كەتكەن. كولىك بەكەتتىڭ تىرەۋىشىنە سوعىلىپ، سول جەردە توقتاعان.
جانارماي بەكەتى قىزمەتكەرلەرى كولىكتى ۇنتاقتى ءورت سوندىرگىشپەن بۇركەپ، ءورتتىڭ الدىن العان.
قازىر جانارماي بەكەتىنىڭ باسشىسى شىعىندى ەسەپتەۋدە. بەكەتكە كەلگەن زاقىمعا بايلانىستى، قازىرگى ۋاقىتتا جۇمىس ىستەمەيدى.
جول اپاتى سالدارىنان ەكى ادام زارداپ شەكتى. ولار ءتۇرلى جاراقاتپەن جاقىن ماڭداعى اۋرۋحاناعا جەتكىزىلدى. جۇرگىزۋشىنىڭ بىرنەشە سۇيەگى سىنعان. كۋاگەرلەردىڭ ايتۋىنشا، ولار الدىڭعى اينەك ارقىلى ۇشىپ كەتكەن.
وقيعا ورنىندا جول-پاترۋلدىك پوليتسيا قىزمەتكەرلەرى جۇمىس ىستەپ جاتىر.
