1992 جىلى قازاقستان رەسپۋبليكاسىنىڭ مەملەكەتتىك رامىزدەرىن ازىرلەۋ ءۇشىن ارنايى جۇمىس توبى قۇرىلىپ، شىعارماشىلىق كوميسسيا جاساقتالعان. ەل تاۋەلسىزدىگىنىڭ ايعاعى بولاتىن تۋ، ەلتاڭبا جانە ءانۇران جوبالارىن دايىنداۋعا جالپىرەسپۋبليكالىق كونكۋرس جاريالانعان.
كونكۋرسقا 600-دەن استام ادام قاتىسىپ، ءاربىرى بىرنەشە نۇسقاسىن ۇسىندى. ماسەلەن، مەملەكەتتىك تۋ بويىنشا 1200-گە جۋىق ەسكيز ۇسىنىلدى. ناتيجەسىندە، سۋرەتشى شاكەن نيازبەكوۆتىڭ نۇسقاسى تاڭدالىپ، قازىرگى تۋ رەسمي تۇردە بەكىتىلدى.
ەلتاڭبا بويىنشا وتكىزىلگەن بايقاۋعا 245 سۋرەت جوباسى مەن 67 كەسكىندەمەلىك جۇمىس ۇسىنىلعان. بايقاۋ كوميسسياسى ۇزدىك جوبا رەتىندە جانداربەك مالىبەكوۆ پەن شوتا ءۋاليحانوۆتىڭ اۆتورلىق ەسكيزىن تاڭدادى. ولاردىڭ ۇسىنعان ەلتاڭبا جوباسى ۇلتتىق ناقىشتى، تاريحي تەرەڭدىكتى جانە زاماناۋي مەملەكەتتىڭ بولمىسىن قاتار ۇشتاستىرا ءبىلدى. بۇل ۋاقىتتا جانداربەك مالىبەكوۆ 50 جاستا ەدى. ول وزبەكستانداعى سامارقاند قالاسىندا باس ساۋلەتشى بولىپ قىزمەت ەتكەن.
1943 جىلى ءدال وسى كۇنى قازاق كسر-ءنىڭ العاشقى مەملەكەتتىك ءانۇرانىن جازۋعا بايقاۋ جاريالانعان. ءانۇران ءسوزى بويىنشا وتكىزىلگەن بايقاۋدا قايىم مۇحامەدحانوۆتىڭ ءماتىنى تاڭداپ الىنعان. 27 جاستاعى جىگىتتىڭ جازعان ءانۇرانى «ەر قازاق ەجەلدەن ەركىندىك اڭساعان» - «گەرويچەسكي كازاحسكي نارود يزدرەۆلە مەچتال و سۆوبودە» دەپ باستالادى. بۇل ماتىنگە 30 جاستاعى كومپوزيتور مۇقان تولەباەۆ ءان جازعان.
