پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين سوڭعى جىلدارى رەسپۋبليكالىق بيۋدجەتتىڭ شىعىستارى نەگە ءوسىپ كەتكەنىن ءتۇسىندىردى، دەپ حابارلايدى “ادىرنا”.
ونىڭ ايتۋىنشا، پاندەميا جىلدارىندا، 2020 جىلدان باستاپ بيۋدجەت شىعىستارى شامامەن 7-8 ترلن تەڭگەگە ءوسىپ كەتكەن.
«سوسىن ۇلتتىق قوردان قاراجاتتى اياماي الدىق. 2020 جىلدان بەرى قوردان الىنعان قاراجات دەڭگەيى 5 ترلن تەڭگەدەن تۇسپەدى. بيىل جوسپار بويىنشا كەلەسى جىلعا نىسانالى ترانسفەرتتەردى ۇلتتىق قوردان سۇرامايمىز. ول دەگەن قازىر ەسەپتەگەندە – 3,2 ترلن تەڭگە. وسى اقشانى ۇلتتىق قوردا قالدىرامىز. ويتكەنى سالىق رەفورماسىنان جاڭا كىرىستەر كۇتەمىز. بىراق شىعىستارىمىز نەگە ءوسىپ كەتتى؟ سەبەبى پاندەميا كەزىندە ادامدارعا قاراجات بەردىك، ەكونوميكا جارتى جىل دۇرىس جۇمىس ىستەگەن جوق، ادامدار ۇيدە وتىردى، 41 مىڭ تەڭگەدەن بەردىك. ازاماتتارىمىزدى قولداۋ ءۇشىن بارىمىزدى شاشتىق قوي»، - دەيدى جۇمانعارين ماجىلىستە وتكەن ۇكىمەت ساعاتىندا.
سونىمەن قاتار، ونىڭ ايتۋىنشا، 2022 جىلى ەلىمىزدە ايلىق ەداۋىر ءوستى.
«2022 جىلدىڭ باسىندا مەملەكەتتىك قىزمەتشىلەردىڭ جالاقىسىن كوتەردىك، سودان كەيىن ءاربىر جىل يندەكساتسيا جاسادىق. 2020-2022 جىلدارى ينفلياتسيا 22 پايىز بولدى. سوعان بايلانىستى مىندەتتى تۇردە وسى پايىزعا يندەكساتسيا جاسادىق. سوندىقتان جالاقى مىقتى ءوسىپ كەتتى. ينفراقۇرىلىمعا دا سول كەزدەرى قاراجاتتى جاقسى بەردىك. سونىڭ اسەرىنەن بيۋدجەتتىڭ شىعىستارى كوبەيدى»، - دەپ ءتۇسىندىردى جۇمانعارين.
مينيستر ەكونوميكانىڭ ءوسۋى ەكونوميكانىڭ دامۋ بيۋدجەتىنە سالىنعان قاراجاتقا بايلانىستى ەكەنىن اتاپ ءوتتى.
ۇقساس جاڭالىقتار
